1CO 8
8
1Milem biaknâk i pêkchanhmi kongah; kan dihlak in hngalhnâk kan ngei cio tiah kan hngalh. Hngalhnâk nih lung a puamter, asinain dawtnâk nih mi a ṭhatter. 2Mizei pauh nih thil hngal ngai i â ruah ahcun a hngalh ding zat cu a hngal rih lo, tinâk a si. 3Asinain mizei pauh nih Pathian a dawt ahcun, Amah nih a hngalhmi a si. 4Cucaah milem biaknâk sa ei kongah, vawlei ah hin milem vialte cu zeihmanh lo a sinâk le Pathian dah tilo cu a dang a um lo ning kan hngalh. 5Zeitintiah vanah siseh, vawlei ah siseh, pathian tiah kawhmi tampi an um. (Cubantuk pathian le bawi cu tampi an si), 6asinain kan caah Pathian pakhat lawnglawng Pa cu a um, Amah sin in zeizong vialte hi a chuak i kan nih zong Amah caah a ummi kan si, cun Bawipa pakhat Jesuh Krih lawnglawng a um, Amah thawngin zeizong vialte a um i Amah thawgin a nungmi kan si. 7Asinain cubantuk hngalhnak cu mi vialte ah a um lo. micheukhat nih milem an hngalh ruangah milem biaknâk sa kha an ei peng i an chia ṭha hngalhnâk cu a ṭhawn lo caah thurter an si tawn. 8Asinain eiding nih hin Pathian lung a kan tonter lai lo, kan ei lo tikah kan ṭhadeuh hlei lai lo, kan ei zongah kan ṭha deuh hlei lai lo. 9Asinain i ralring u, zalong ngai i nan nun ah hin thazâng dermi caah dawnkhântu ah nan i cang tawn. 10Zeitintiah nang hngalhnâk ngeitu kha, milem biaknâk hmun i rawl na dumlio mi nih an in hmuh i chiaṭha hngalhnâk lei i thazâng dermi a rak si ahcun milem biaknâk rawl ei kha ngamhnâk ah a hman sual lai. 11Na hngalhnâk ruangah thazâng a dermi na unau, a thihding Krih nih a thih piakmi kha a lo tlau sual lai? 12Cubantukin unau cungah palhnâk a tuah i chiaṭha hngalhnâk ah a dermi kha na fahter hna ahcun Krih cungah palhnâk a tuahtu ah nâ cang. 13Cucaah eiding nih ka unau a tlukter ahcun, ka unau a tluk tinâk hngalo, sa ka ei ti lai lo.
Currently Selected:
1CO 8: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
