1CO 15
15
1Cuhleiah unau hna, thawngṭha ka chimmi kha nan cohlan i dirnâk ah nan hmanmi kha, cu bia cu chimh ṭhan kan duh hna, 2kan chimhmi hna bia kha nan zumh mênmên si loin fek tein nan i tlaih ahcun, cucu khamh nan sinâk cu a si. 3Zeitintiah a hmasa bikah, keizong nih ka hmuhmi kha kan chimhchin hna: Cathiang ning tein Krih cu kan sual ruangah a thi, 4phum in a um i Cathiang ning tein nithum niah a tho ṭhân, 5Peter sinah â lang, cun hleihnih hna sinah, 6Cu hnu ah cân khat ah unau zanga nâk tam nih an hmuh, cuhna lakah a tamdeuh cu atu tiangin an nung i a cheu tu cu an i hngilh cang. 7Cuhnuah Jeim sinah â lang i cuhnu ah lamkaltu vialte sinah â lang. 8A donghnâk ah, a cânlo ah a chuakmi bang, keimah sin zongah â lang ve. 9Zeitintiah kei cu lamkaltu lakah a hmebik, Pathian kawhhran hna ka serhsat ruangah lamkaltu ti awk hmanh ah kâ tlâk lo. 10Asinain Pathian zângfahnâk ruangah atu ka sining hi ka rak si, ka cung i a zângfahnâk cu a sawhsawh a si lo. Cucaah annih vialte nâkin thaba deuh in ka ṭuan, asinain keimah ṭuanmi cu a si lo. Pathian zângfahnâk keimah i a ummi nih a ṭuanmi a si. 11Cucaah, annih le kei â danghlei lo, bia kan chim i nannih nih nan rak zumh. 12Krih cu thihnâk in thawhter a si tiah chim a si lio ah, zeiruangahdah nan lakah cheukhat nih, mithi thawhṭhannâk a um lo, tiah nan ti. 13Mithi thawhṭhânnâk a um lo ahcun, Krih zong a tho ṭhân lo tinâk a si. 14Krih kha a thawhṭan lo ahcun kan chimmi bia hi zeihmanhlo a si lai i nan zumhnâk zong zeihmanhlo a si lai. 15Asi, Pathian nih Krih a thawhter tiah kan hngalhpi caah, Pathian lei ah hngalhpitu deu kan si lai - mithi thawhter an si lo ahcun Krih zong thawhter a si lai lo. 16Zeitintiah mithi hna thawhter an si lo ahcun Krih zong thawhter a si hlei lo tinâk a si. 17Krih kha thawhter a si lo ahcun nan zumhnâk cu pakpalawng a si lai i nan sualnâk ah nan um peng rih tinâk a si. 18Cuti a si ahcun, Krih i â hngilhmi hna kha an tlaulan tinâk a si hnga. 19Hi nunchung ca lawng i Krih ah ruahchannâk kan ngeih ahcun mi vialte lakah zângfah awk tlak bik kan si. 20Asinain Krih cu thihnâk in a thoṭhân i â hngilhmi hna caah theitlai hmasa bikah a cang. 21Zeitintiah thihnâk hi minung ruangah a um, Minung ruang ṭhiamṭhiam in thawhṭhannâk zong a um. 22Zeitintiah Adamah mi vialte an thih bantukin Krih ah mi vialte nunter in an um lai. 23Asinain mah le cân cio ah Krih cu theipar hmasa a si, a rat ṭhân tikah a thoṭhân dingmi cu Krih ta an si te lai. 24Cuticun biaceihnâk vialte, nawlngeihnâk vialte le ṭhawnnâk vialte a donghter tikah donghnâk tak tak a phân lai i Pa Pathian sinah Pennâk cu a chanh lai. 25Zeitintiah a ral vialte a ke tang i a chiah dih hlan lo Amah nih bia cu a ceih lai. 26Hmadung bik ral hrawh in a um cu thih hi a si. 27Zeitintiah “A ke tangah zeizong vialte a chiah.” Asinain “A ke tangah zeizong vialte a chiah,” a ti tikah, a tang i zeizong vialte a chiatu Pathian cu â tel ve lo, ti kha a langhter. 28Cubangin a tang i zeizong vialte chiah a si tikah, Fapa zong cu a tang i zeizong vialte chiatu tangah a um ve lai, cucu Pathian kha zeizong i zeizong a si khawh nâkhnga. 29Mithi hna hi thoṭhân hna hlah sehlaw, mithi hna ca i baptisma in hi zeitindah a si kun lai? Zeiruangah dah mithi hna caah baptisma an in tawn? 30Cun kannih zong suimilam cân kip i `ihphâng ngai i kan um hi zeiruangah? 31Kan Bawipa Jesuh Krih ah kan hmaihngalpi hna nâk chalh in, “Ni chiarte ka thi tawn” ka ti. 32Efesa khua i sahrang hna kha minung phungin ka doh ahcun ka caah zeidah a ṭhahnem hnga? Mithi hna an thawhṭan lo ding ahcun, “Ra u, ei in ding hna u sih, thaizing ah pei kan thih ko lai cu.” 33Hlen in um hlah u: “Hawikawm ṭhalo nih nun ṭha a hrawh tawn.” 34Dingfel dingin i hlau u, sualnâk tuah hlah u; zeitintiah cheukhat cu Pathian hngalhnâk nan ngei lo. Nan ning azah nâkhnga hihi ka chimmi a si. 35Mi zeimaw nih, “Mithi hna cu zeitiset in dah thawhter an si lai? Zeibantuk pum in dah an rat lai?” tiah nan ti. 36Mihrutpa, na tuhmi thlaici hmanh a thihlo ahcun nunter in a um bal lo. 37Na tuhmi cu, a um laimi pum kha si loin, buh fang, asiloah thlaici dangdang zong a si ko. 38Asinain Pathian nih amah duhning in pum a pêk tawn, a fang kip caah takpum kha a pêk cio. 39Taksa vialte hi â lo dih lo, minung taksa â dang i saram taksa â dang, nga taksa le va taksa zong â dang. 40Van taksa a um i lei taksa zong a um. Van taksa sunparnâk â dang i lei taksa sunparnâk zong â dang. 41Ni nih sunparnâk phunkhat a ngei i thlapa nih sunparnâk a ngei ve. Arfi hna zong nih sunparnâk an ngei i arfi le arfi zong sunparnâk ah an i khat lo. 42Cubangin mithi thawhṭhannâk zong a si. Thu kho i tuh in a um i thu kho loin thawhter a si. 43Zeihmanhlo bangin tuh a si i sunpar ngaiin thawhter a si. Der ngaiin tuh a si i ṭhawng ngai in thawhter a si. 44Minung taksa in tuh a si i thlarau lei taksa in thawhter a si. Minung lei taksa a um ahcun, thlarau lei taksa zong a um lai. 45Cun hiti hin ṭial a si, “Minung hmasa bik Adam cu a nungmi a si,” Adam hmadung deuh cu nunnâk petu thlarau a rak si. 46Asinain thlarau lei cu a um hmaisa lo, minung lei kha a um hmasa deuh, cuhnu ah thlarau lei kha a rak um. 47Minung hmaisa bik cu vawlei, leidip i ser a si i pahnihnâk Minung cu vanlei mi Bawipa a si. 48Minung hi leidip i ser a si bantukin leidip i sermi dang zong an um, van lei mi bangkhan van lei mi hna zong an um. 49Leidip i sermi lawhnâk kan ngeih bangin Van lei Mi lawhnâk zong kan ngei. 50U le nau hna, thisa le thisen nih hin Pathian pennâk cu a co kho lai lo, thut hmangmi nih thuthmang lo cu a thleng kho lai lo, tiah ka chim. 51Ngaihmanh u biathli kan chimh hna lai. Kan dihlakin kan i hngilh dih theng lai lo, asinain thlen in kan um lai, 52muko hmadung bik an tumtikah, chikkhat teah, mitṭhep kar ah thlen kan si dih lai. Zeitintiah muko cu an tum hrimhrim lai. Cuticun mithi hna cu thu kho tilo dingin thawhter an si lai i kan nih zong thlen kan si lai. 53Zeitintiah hi thut a hmangmi nih thut a hmang lomi â hruk awk a si i hi a thi khomi nih a thi kho lomi â hruk awk a si. 54Cuticun hi thut a hmangmi nih thut a hmang lomi â hruk i hi a thi khomi nih a thi kho lomi â hruk tikah, cu cân hrimhrim ah, “Thihnâk cu teinâk nih a dawlh,” tiah ṭialmi hi a tling lai. 55Maw, thihnâk khuazeiahdah na sivai cu? Maw Mithi khua khuazeiahdah na teinâk cu? 56Thihnâk sivai cu sual a si i sual ṭhawnnâk cu nawlbia hi a si. 57Asinain kan Bawipa Jesuh Krih thawngin teinâk a kan petu Pathian sinah lawmhnâk bia um ko seh. 58Cucaah, ka dawtmi ule nau hna, fek tein, hninh khawh loin um ulaw, Bawipa rian biatak tein ṭuan zungzal ko u, Bawipa ah nan ṭuanman cu pakpalawng a si lailo ti kha hngal ko u.
Currently Selected:
1CO 15: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
