1CO 14
14
1Dawtnâk hi dawi ulaw, thlarau lei thilpêk zong duh u, a hlei in biaphuankhawhnâk hi duh u. 2Zeitintiah holh dangin bia a chimtu nih minung sinah chim loin Pathian sinah a chim, zeitintiah ahohmanh nih a chimmi cu an hngal lo nain thlarau ah biathli a chim. 3Asinain biaphuangtu nih cun minunghna sersiamnâk le, thapêknâk le hnangamnâk bia kha a chim tawn. 4Holh dangin biachimtu nih cun amah ṭhathnemnâk caah a chimmi a si, asinain biaphuanmi cu kawhhran ṭhathnemnâk caah a si. 5Nan dihlak in holh dangin bia nan chim hi kan duhpiak hna, bia nanphuan khawhnâk hi kan duhpiak chinchin hna. biaphuangtu cu holh dangdang chimtunâk in a ngan deuh, kawhhran ṭhathnemnâk dingah cun lehpiak a herh tawn. 6Atu ah hin ule nau hna, holh dangdang i bia chim awkah nan sinah ra ning law, langhnâk siseh, hngalhnâk siseh, biaphuan siseh, cawnpiak siseh ka chim lo ahcun zeidah ṭhathnemnâk kan pêk hna lai? 7Nunnâk ngei lo, thanglawi le kiṭa te hna zong hi sullam ngei in a awnh lo ahcun an tum chan a ho nih dah an hngalh khawh lai? 8Muko zong hi sullam ngeilo in an tum ahcun ahodah raldoh awkah â tim kho lai? 9Cubangin nannih zong nih hngalh fawi dingin bia nan chim lo ahcun nan biachim zeitindah an hngalh khawh lai? Zeitintiah thlilak i biachim nan si ko lai. 10Vawlei ah hin holh phunphun a um a si kho ko, sullam ngei lomi pakhat hmanh a um lo. 11Cucaah a holh sullam ka hngalh lo ahcun, kei hi a chimtu caah ramdang mi ka si lai i a chim tu zong ka caah ramdang mi a si lai. 12Thlarau lei thilpêk i ṭhahnem nan ngaih tuk caah kawhhran ṭhathnemnâk lei zong lam rak kawl chin u. 13Cucaah holh dang ngeitu nih a lehkhawh nâkhnga thlacam seh. 14Zeitintiah holh dang i thla ka cam ahcun, ka thlarau nih cun a cam ko nain ka hngalhnâk caah theipar a um lo. 15A tlângkawmhnâk cu zeidah a si kun lai? Ka thlarau in thla ka cam lai i ka hngalhnâk zongin ka cam lai. Ka thlarau in hla ka sa lai i ka hngalhnâk zongin ka sa lai. 16Culoahcun thlarau in thluachuah pe hmanh law, na chimmi zong a theihthiam lo i theithiamlonâk nih hmunhma a lang peng ko ahcun zeitindah lawmhnâk bia na chimmi ah, ‘Amen’ an pêk khawh lai. 17Zeitintiah nang nih ṭha tein lawmhnâk bia na chim na in, midang nih an ṭhatpi lo. 18Nannih vialte nakin holh dangdang i bia tamdeuh ka chim caah Pathian sinah lawmhnâk bia ka chim; 19asinain kawhhran hna sin ah cun holh dang i kâ 10000 chimnâk in midang ka cawnpiak khawh nâkhnga, hngalhnâk i bia kâ 5 chim ka duh deuh. 20Ule nau hna, hngalhnâk ah ngakchia si hlah u, asinain sualnâk lei tu ah bawh te si ulaw hngalhnâk ah upa si u. 21Nawlbia cauk ah, “Holh phundang a hmangmi hna hmurkâ in hi mi hna sinah bia ka chim lai, cu hnu hman ah anka ngai hlei lai lo, Bawipa nih a ti,” tiah ṭial a si. 22Cucaah holh dangdang hna hi zumtu hna caah hmelchunhnâk si loin zumlotu hna caah a si deuh, asinain biaphuan tu cu zumlotu hna caah si loin zumtu hna caah a si. 23Cucaah kawhhran vialte hmunkhat ah nan i pumh i nan dihlak i holh dangdang i nan chim ahcun, a hngalthiam lomi le zumlotu ra sehlaw, an hrut cang an in ti hna lai lo maw? 24Asinain nan dihlak in bia nan phuantu a si ahcun zumlotu maw, a hngalh bal lomi zong ra sehlaw, nan dihlak tuahmi nih a sualnâk a hngalhter lai i amah i hmuhchuahnâk ah a hman ko lai. 25Cun a lungchung i biathli hna cu langhter dih a si lai, cuticun bawhbu in Pathian a biak lai i nan lakah Pathian a um tak tak tiah a ti khawh lai. 26Unau hna zeitindah a si rih lai? Nan i pumh tikah mikip nih thangṭhatnâk hla siseh, cawnpiaknâk siseh, holh dang siseh, langhnâk siseh, holh lehnâk siseh, nan ngeih tikah thil vialte hi ṭhathnemnâk ah tuah dih si hna seh. 27Holh dang i bia an chim ahcun, cân khat ah pahnih maw, pathum maw, si hna sehlaw pakhat nih let seh. 28Asinain a lettu an um lo ahcun kawhhran pumhnâk ah dai tein um i zuam seh, amah le Pathian sintu ah chim seh. 29Profet zong nih pahnih maw, pathum in maw chim hna seh law mi dang nih ṭha tein rak hlathlai hna seh. 30Asinain a pawng i a ṭhumi mi dang sinah langhnâk a um ahcun, a hmasa cu dai tein um seh. 31Zeitintiah mi vialte nih an cawn i an hna a ngam khawh nâkhnga, pakhat hnu pakhat in phuang u. 32Profet hna thlarau cu profet hna nawlin a um tawn. 33Zeitintiah Pathian cu buainâk Pathian a si lo, kawhhran mithiang vialte hna an i pawlkomh bantukin, daihnâk Pathian a si. 34Kawhhran hna chungah nu cu dai tein um seh, zeitintiah biachimnâk nawl pêk an si lo; nawlbia nih a chim bangin, nawlngai te in um ko hna seh. 35Cawn an duhmi thil a um ahcun, inn lei ah an va le hal ko hna seh; kawhhran i nu bia chim cu ningzak a si. 36Asiloah Pathian bia hi a hramthawk in nanmah i a chuakmi maw a si? Asiloah nan sin lawngah maw a phanh? 37Mi zeipauh nih profet ah maw, thlarau mi ngai ah maw â ruah ahcun, nan sin i ka ṭialmi hi Bawipa nawlpêk a si ti a hngalhpi awk a si. 38A hngalhthiam lo ahcun hngalthiam lo in rak um ko seh. 39Cucaah ule nau hna, biaphuangtu si hi duh ulaw, holh dangdang biachim zong dawn hlah u. 40Thil vialte hi dawh te le ningcang tein tuah si hna seh.
Currently Selected:
1CO 14: HAKABSI
Highlight
Copy
Compare
Share
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
