Markus 9
9
1Yesu a miɗiɗi pra: Jre mu miɗiki, zamai arbaɗi n'e ɗa won na aga e tili mri kai haa pai n'Alaw te halasi gaini spak.
Sini Yesu a bunda amai midiɗi huwuŋ
Mat. 17.1-13; Luk. 9.28-36
2Mefeŋ ɵaara asakalni hanɗa, Yesu a yima Peter gaini Yohana pini, a kiɗi edi war baŋa kiiɗi amai midiɗi huwuŋ na muguwi, sini a bunda wuzaɗi. 3Sapa na sini a bunda a ŋala gaini ŋili, muɗukwi tal, ɗif zi mi sapa na midiɗi yai n'a ma sapa muɗukwi tal maini hanɗa ɵa aŋ kai. 4Eliyas gaini Musus e siŋki siɗi arɗi, e ɗi fu aŋ miɗi gaini Yesu. 5Nɵa Peter a miɗini wiini Yesu: Rabbi, simni na won na pɗem, mu zuzunumu gumu hu, na ktai buriku, ktai burini Musus, ktai burini Eliyas lai. 6A siɗa wala n'a muɗaŋ kai buri hunai e yimiɗi gara. 7Ɗugul a halasi a dûgûɗi, wule a wasi edi arbani ɗugul par a muɗa: Hanɗa a Ahiya na mu daraŋ gara, ki ɵini pini pɗem. 8Tizaw, won hlai n'e tili arɗi ɵimaɗi ɗa, a hina ɗa a Yesu kiini zaw, ɗif zamai gaini kai.
9Won hlai n'e ɗa e niyisi azumai amai midiɗi huwuŋ par ɗa, a gidiɗi buri e miɗini wiini ɗif miɗini wala n'e tiliŋ kai, haa Ahini ɗif a ɵiyasi amai arbaɗi zi mri par. 10E yimi seŋni hanɗa, e zilbi arbaɗi marɗi ɓa: Ɵiyi n'amai n'arbaɗi zi mri par ɗa a siŋka ɗa a ma ɗa? 11E zilbi e miɗi: ɗai n'e ɗû wazagai ɗa e miɗi ɓa Eliyas a halasi haw ɗa buri ma ɗa? 12A waya seŋ a miɗiɗi: Eliyas aga a halasi avut aŋ zizina wazagai paŋ war futini. Ɗû a muɗa miɗini Ahini ɗif ɓa, aga a sɗa gir viya, aga e miisiŋ lai buri ma ɗa? 13Amma mu miɗiki, Eliyas a halasi ya, e zi sini maini n'e diri nɵa, maini ɗû a ɗosi miɗini nɵa lai.
Yesu a zuula ahiyagwi na gaini ksalai miɗini
Mat. 17.14-21; Luk. 9.37-43
14Won hlai n'e cûsi gobi siɗi ɗai zi hitri ɗa, e tili firiɗi ɗai n'abai a gûniɗi azumai gaiɗi ɗai n'e ɗû wazagai lai e ɗa sispi arbaɗi marɗi. 15Won hlai na firiɗi ɗai e tiliŋ tar ɗa, e bindi hiyak gara, e liwisi mini aŋ ɵiɓini wuti. 16Yesu a zilbiɗi: Ki sispi gaiɗi marki miɗini a ma ɗa? 17Arbani firiɗi ɗai par, ɗif ktai a waya seŋ a miɗini: Api zi hitri, mu kasi ahiya suku, aŋ gaini ksalai na numul miɗini. 18Hlai n'a yimaŋ woni paŋ ɗa, a huwyaŋ, a blaŋ azumai, mini a ha meɵeɵeɓe, a hirɗa sesiyeŋni, a giriya edi lai. Mu siiwiɗi ɗaiku zi hitri buri e birgi ksalai hanɗa edi, amma gdaŋɗi a sumaŋ kai. 19A miɗiɗi: Aga mu hina gaiki ɵa su haa kaswata ɗa? Aga mu libiki ɵa haa kaswata ɗa? 20Kiŋŋasi, e kiŋnisi, won hlai n'ahiyagwi a talaŋ tar ɗa, seze na meefeŋ a huwyaŋ meefeŋ gara, a kɵa azumai midini afti, a likita, meɵeɵeɓe a ha mini lai. 21Yesu a zilba epini: a yimaŋsi nɵa kaswata par ɗa? Epini ahiyagwi a wiyini seŋ: Aŋ sini war agwini par, 22hlai zamai ɗa, seze na meefeŋ a ɵiŋkaŋ arni afu aŋ fuɗaŋ edi, nɵa na ɓa ku kiɗa aŋ za wala, hiina buriyi, zina piyi lai. 23Yesu a miɗini: na ɓa ku kiɗa aŋ za wala, wala paŋ a kiɗa a za burini ɗif n'a yima ɗa. 24War hlai ni tizaw epini ahiyagwi a ɗuula a muɗa: Mu yima, zina pa! lawaŋa ɗuwal burini yimi kai na wiya. 25Won hlai na Yesu a tala firiɗi ɗai n'e ɗa e liwisi sini, a ɓara ksalai a miɗini: Tuku ksalai na numul, na ganiŋ lai, mu na muɗuku, niyasi edi sini ahiyagwi hanɗa par, ku waya sini kir kai. 26A niyasi edi sini par gaini ɗuwal n'abai, a huwyaŋ gdaŋ gara lai, ahiyagwi a bunda maini na ɓa aŋ gaini mri su nɵa, arbaɗi ɗai maa e miɗi ɓa a mra su. 27Amma Yesu a yimiti tini, a ɗiyaŋ amai, a faka amai lai.
28Won hlai n'e cû aha war dalam li, ɗaini zi hitri e zilbiŋ edi kiiɗi ɓa: Tiyi kiiyi, mi kiɗi aŋ birgiŋ edi kai ɗa buri ma ɗa? 29A miɗiɗi: Zibani ksalai na maini hanɗa ɵa ɗa a niyasi edi sai gaini siiwa.
Yesu a muɗa edi miɗini mrini gaini ɵiyi n'amai ɗa pra
Mat. 17.22-23; Luk. 9.43-45
30Won hlai n'e hiliɗi woni par, e vigi afti na Galeliya, amma a firiya ɓa ɗif a sɗa hanɗa kai. 31A hitriɗi ɗaini zi hitri, a miɗiɗi ɓa: Ahini ɗif a na gobi aŋ sa edi tiɗi ɗai, aga e fiɗiŋ edi, mefeŋ hu asakalni mrini par aga a ɵiyasi amai. 32Amma ɗai zi hitri e ɵini ezini seŋ hanɗa kai, e zilbiŋ ɗa ɗe hunai piɗi ta lai.
Na abai ɗa asiya ɗa?
Mat. 18.1-5; Luk. 9.46-49
33E cû a Kapernahum, won hlai n'e cû aha ɗa, a tika pini aŋ zilbiɗi: warɗi futi par ɗa, ki sispi arbaɗi marki buri ma ɗa? 34Amma e dûgû miɗi ɓrat, buri warɗi futi par ɗa, e sispi ɓa, n'abai n'arbaɗi asiya ɗa? 35Nɵa a sumna azumai dam, a yikiɗisi na doogo pi sulu sini, a miɗiɗi: Na ɓa, ɗif a dara a bunda aŋ avut ɗa, a pɗem ɓa a za aŋ n'asakal piɗi marni. 36A yima arwagwi n'agwi ktai, a ɗiyaŋ amai arbaɗi zaw, a goboŋ aŋ ɵiɓini wuti, a miɗiɗi wiiɗi ɗaini zi hitiri: 37Asiya ɗi paŋ n'a yima arwagwi n'agwi maini hanɗa ɵa sini a yimaŋa mu ta, asiya ɗi paŋ n'a yimaŋa ta sini, a yimaŋa mu ta kai, amma a ni n'a ɵinaŋasi.
Nagai n'e zi sɗa gaini yikini Yesu
Luk. 9.46-50
38Yohana a miɗini: Api zi hitri, mi nivisi ɗif ktai blaŋ a birga ksalai edi war yikuku, mi firiyi mi ɗiliŋ, buri ni a na gaiyi kai. 39Yesu a waya seŋ a muɗa: Ki ɗiliŋ kai, buri ɓa ɗif a kiɗa a muɗa meefeŋ mada kai, na ɓa a na za wazagai zi hiila war yikiŋa ɗa. 40Buri ɓa Ni na a gawmu kai ɗa, a na pumu par. 41Asiya ɗi paŋ n'a siki yem zi ci war kop ɗaw buri ɓa ki ɗi wiini Kristu ɗa, jre mu miɗiki, vrakni aga a ba edi kai.
Wazagai n'a kasi kɵi n'azumai
Mat. 18.6-11; Luk. 17.1-2
42Amma na ɓa ɗif a za aŋ wala zi dibi azi burini ktai arbaɗi n'agogoi hanɗa, n'e yimi wara, pɗem burini ɓa, e rgitini funi zi siri wai n'amai wulani ɓak, e biliŋ war yem-ra n'abai. 43Na ɓa tuku te tunuku, ku ɗûklûti edi, a pɗem buriku ɓa ku niya warni suŋfa geɓerem, a suwa na gaini tuku sulu paŋ ku niya warɗi avai z'afu, arni afu n'a vada kai ɗa. 44Atla na won hlai ni, a mra kaalai, afu na woni a mra kaalai. 45Na ɓa azuku te tunuku, ku ɗûklûti edi, a pɗem buriku ɓa, ku niya war suŋfa daŋlaŋ, a suwa ɵiŋki na warɗi avai z'afu gaini azuku sulu paŋ ɗa. 46Won hlai n'atla na woni a mra kai, afu na woni a mra kaalai. 47Na ɓa arku te tunuku, ku hûrɗiti edi, a pɗem buriku aŋ niya hoɵoŋ warɗi pai n'Alaw, a suwa simni na warɗi avai z'afu gaini arku sulu paŋ ɗa. 48Atla na war hlai ni ɗa a mra kaalai, afu na woni a mra kaalai. 49Buri asiya, asiya paŋ aga a bunda setet gaini afu. 50Hum a wala na pɗem, amma na ɓa hum a ba lemni li edi ɗa, aga ki bindiŋ setet gaini a ma ɗa? Ki zi siki aŋ hum, ki simni gaini ɵeɗ arbaɗi marki.
Currently Selected:
Markus 9: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
