Markus 10
10
Hitrini Yesu miɗini bidi n'edi arbani wus gaiɗi muni
Mat. 19.1-9
1A faka amai woni par, a hala midini afti na Yudiya gaini afti n'anene duɓani Yurdan par. 2Firiɗi ɗai e tipisi sini pra, maini n'a na zaŋ kûreɗ-kûreɗ nɵa, a tika pini aŋ hitriɗi pra. 3A waya seŋ a miɗiɗi: Musus a gidiki maɵa ɗa? 4E miɗi: Musus, a sa futi aŋ ɗo maktuɓ zi bidi buri e siŋɗi tiɗi muni ta, a biditi lai. 5Yesu a miɗiɗi: Musus a ɗo seŋ zi gadai hanɗa burini agulki na gdaŋ. 6Amma war pi zi tiki, won hlai n'Alaw a za wazagai paŋ ɗa, a rgiɗi wus gaiɗi muni. 7Nɵa wus aga a hina epini gaiɗi emini edi, a tapa gaiɗi munini, 8nagai gaini suliɗi e ɗi si ktai. 9Buri wala n'Alaw a tapaŋ li ɗa, ɗif aga a ɓurwaŋ edi kai. 10Won hlai n'e cû war dalam ɗa, ɗaini zi hiri e zilbiŋ miɗini seŋ hanɗa pra. 11A miɗiɗi: Asiya ɗi paŋ n'a biditi munini edi, a tikiti na zamai ɗa, a za maɵara siɗi munini n'avut ɗa. 12Na ɓa, muni te bada pini mofaɗi par bud, te hala te tika wus zamai, te za ɗa a maɵara lai.
Yesu gaiɗi aliyagoi n'agogoi
Mat. 16.13-15; Luk. 18.15-17
13Ɗai e kiɗinisi aliyagoi kapai a tikiti tini siɗi, amma ɗai zi hitri e ɓiriɗi. 14Won hlai na Yesu a tala hanɗa, a za hiy, a miɗiɗi: Hiniɗisi aliyagoi e hilisi sa, ki ɗiliɗi kai, buri paini fuŋ-n'Alaw te na buriɗi nagai na maiɗi nɵa ɗa. 15Jre, mu miɗiki Asiya ɗi paŋ n'a yimiti pai n'Alaw maini ahiyagwi nɵa kai ɗa, aga a niya warɗi kai zaŋ. 16Asakal par a miliɗi amai tini, a tika pini a ɓikiɗi, a tika tini midiɗi lai.
Yesu gaini gawla na faraini abai
Mat. 19.16-30; Luk. 18.18-30
17Ɗif ktai a lawasi mini, a hurga azumai wuzani a zilbaŋ: Api zi hitri na pɗem, na mu za ɗa a ma ɗa? Kapai mu nava suŋfa n'a vada kai aŋ bulum ɗa? 18Yesu a miɗini: Ku yikaŋa na pɗem buri ma ɗa? Ɗif na pɗem aŋ kai; sai a Alaw ktai. 19Seŋ zi gadai n'a muɗa ɓa: Ku ɵiɓa belek kai, ku za maɵara kai, ku hala wala kai, ku za eles pini maiku kai, ku zini meefeŋ wiini ɗif kai, ku tika walani ɗif kai, apuku gaiɗi amuku ku kûlûɗi amai; gadai hanɗa, ku sɗaŋ ya kai ɗi? 20A miɗini: Api zi hitri, wazagai hanɗa paŋ mu yimaŋ mada war agwiyeŋeŋa par. 21Won hlai na Yesu a talaŋ, a daraŋ, a miɗini: Wala a hina puku ktai, hala, ku wura wazagaiku paŋ edi, ku siŋɗi wiiɗi na murgakai, aga ku nava godai warni fuŋ-n'Alaw, asakal par ku halasi, ku tapasi pa. 22Arni a yirɓaɗi amai par buri seŋ n'a ɵinaŋ ɗa, a hala gaini kwimi burini buri faraini a na fu viya gara. 23Yesu a ɵa arni ɵimaɗi a muɗa wiiɗi ɗaini zi hitri: A gir gara buriɗi ɗai zi farai e niyi warɗi pai n'Alaw. 24Ɗaini zi hitri e bindi hiyak burini seŋni ɗa, amma Yesu a waya a miɗiɗi pra: Aliya, niyi na warɗi pai n'Alaw ɗa a wala na caŋ gara. 25ɵigini a niya warni baŋani lepre gop a suwa ɗif zi farai n'a niya warɗi pai n'Alaw. 26Ɗai zi hitri e bindi hiyak a suwa pra, e miɗi arbaɗi marɗi: Na ɓa ɵa ɗa, a sɗa aŋ kora ɗa asiya ɗa? 27Yesu a tiliɗi a muɗa: Wala n'a za gaini ɗif kai ɗa, Alaw a kiɗa a zaŋ, buri Alaw a za wala paŋ. 28Peter a tika seŋ a muɗa: Tala, tiyi mi hinisi wazagaiyi edi paŋ aŋ tipi puku. 29Yesu a waya seŋ a muɗa: Jre, mu miɗiki Ɗif n'a hinasi dalamni edi, zaw tawalakaini na maɵagai, zaw tawalakaini na falakai, zaw epini, zaw emini, zaw ali, zaw vowaini buriya, zaw burini labar na pɗem ɗa, 30n'aga a navaŋ a suwa hanɗa azi miya kai ɗa aŋ kai, war mefeŋ na tiyana. Aga a nava dalam gaiɗi tawalakai na maɵagai, gaiɗi tawalakai na falakai, gaiɗi tamai na falakai, gaiɗi ali, gaini vowai, gaini siɗini gir, war simni na wuzamu aga a nava suŋfa n'a vada kai lai. 31Amma n'avut aga e bindi aŋ asakal, n'asakal aga e bindi aŋ avut.
Yesu a muɗa edi azi n'ag'aŋ hu miɗini mrini gaini ɵiyini n'amai war mri par
Mat. 20.17-19; Luk. 18.31-34
32E ɗi fu warɗi futi yaw aŋ hili warɗi Yeruzalem sek, Yesu a na fu wuzaɗi su, ɗai zi hitiri hunai te yimiɗi gara, ɗai n'e hili piɗi e hûni lai. Yesu a yikiɗi na doogo pi sulu sini pra, a tika pini aŋ miɗiɗi midini wazagai n'aga a za sini. 33Mu hulumu na ɗa a Yeruzalem, Ahini ɗif aga a sa edi tiɗi paakai n'abakai gaiɗi ɗai zi ɗû wazagai, aga e kûti sariya zi mri miɗini, aga e siŋ war tiɗi pinzibaɗi ɗai n'edi par lai. 34Aga e zini yewere, e pûrfini teenek sini, aga e ɵiɓiŋ gaini daɓala e fiɗiŋ edi lai, mefeŋ hu asakal par aga a ɵiyasi amai.
Siiwa na wiini Yakob gaini Yohana
Mat. 20.20-28; Luk. 22.25-27
35Alini Zebedewus na sulu, Yakob gaini Yohana e hilisi sini e miɗini: Api zi hitri, tiyi mi firiyi ɓa, wala na mi zulbuku miɗini na ɗa, ku zaŋ buriyi ta. 36A miɗiɗi: Ki firiyi mu za buriki ɗa a maɗa? 37E miɗini: Hiniyi aŋ simni ɵimaku warɗi abaiku, na ktai war galku na wus par, na ktai war galku na muni par lai. 38Yesu a miɗiɗi: Wala na ki zilbiŋ na ɗa, tiki ki sɗiŋ kai, aga ki ci gir n'aŋ warɗi kup n'aga mu caŋ ɗa ɗi? Zaw, ki kiɗi aŋ nivi gir na ta mu navaŋ ɗi? 39E wiyi seŋ e miɗini: Tiyi mi kiɗi, Yesu a miɗiɗi: Kup na wiini gir n'aga mu caŋ ɗa, ki kiɗi ki ciŋ sme, aga ki nivi baptisme na mu navaŋ lai. 40Amma simni na ki simni war graŋŋa na wus, zaw na muni ɗa, mu saŋ ɗa mu ta kai, hlai ni ɗa a wiiɗi nagai n'a zizina buriɗi.
41Nagai na doogo won hlai n'e ɵini seŋ hanɗa, e tiki piɗi aŋ zi hiy sini Yakob gaini Yohana. 42Yesu a yikiɗi sini a miɗiɗi: Tiki ki siɗi ɓa, nagai n'e ɗa e ŋi midiɗi ɗai ɗa, e ŋi na ɗa maiɗi paakai ɵa, n'abakai e siŋki spakɗi edi siɗi lai. 43Arbaki tiki ɗa, aga a za maini hanɗa ɵa kai, asiya ɗi paŋ n'a dara a bunda aŋ n'abai n'arbaki ɗa, aga a za aŋ ɵeŋ na wiiki gaini hlaiki. 44Asiya ɗi paŋ n'a dara a bunda aŋ n'avut ɗa, aga a za aŋ bege na wiiki gaini hlaiki lai. 45Buri Ahini ɗif a halasi buri ɓa ɗif a za aŋ ɵeŋni kai, amma buri Ni gaini midini dama a za aŋ ɵeŋ na wiiɗi ɗai, aŋ sa suŋfani edi, aŋ piliɗisi ɗai viya edi lai.
Yesu a zuula Bartimewus, ɗif na melveŋ
Mat. 20.26-34; Luk. 18.35-43
46E cû a Yeriko, won hlai n'a niyasi edi a Yeriko par gaiɗi ɗaini zi hitri gaini vok n'abai pini lai, ɗif na melveŋ ktai, Bartimewus ahini Timewus a na fu ɵimaɗi futi dam aŋ siiwa. 47A ɵina ɓa a vuga na ɗa a Yesu na Nazaret ɗa, a tika pini a ɗuula a muɗa: Yesu, ahini David, hiina haw buriya. 48Ɗai viya e ɓiriŋ kapai a ba, amma a ɗuula a suwa pra ɓa: Ahini David, hiina haw buriya. 49Yesu a ɗiya a muɗa: Yikiŋsi; e yikisi ɗif na melveŋ e miɗini: Pa arku, a na yukuku. 50A foko sapa na sini edi, a faka amai kot, a halasi sini Yesu. 51Yesu a zilbaŋ a muɗa: Ku dara ɓa mu za suku ɗa a ma ɗa? Ɗif na melveŋ a miɗini: Rabbuni, mu firiya ara ɗa a tala. 52Yesu a miɗini: Hala, yimiku a zuuluku li, tizaw tar arni a mala edi, a ɵa pini Yesu warɗi futi lai.
Currently Selected:
Markus 10: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
