Markus 8
8
Yesu a viɗi ɗai dubu puɗu midini aftiɗi ɗai zamai
Mat. 15.32-39; Mark. 6.30-34
1War mefeŋ ni ɗa, won hlai na firiɗi ɗai n'abai a tapa ɗa, wala n'e simiŋ aŋ kai, a yikiɗi ɗai zi hitri a miɗiɗi: 2Ɗai hanɗa e bindi ara haw, e zi gaya na ɗa mefeŋ hu e simi wala kai; 3na ɓa mu tikiɗi piɗi li gaini wiyamai maini hanɗa ɵa ɗa, gdaŋɗi aga a vada warɗi futi, buri zamai arbaɗi e hilisi gaigai par. 4Ɗaini zi hitri e wiyini seŋ: Hlai na mu ɗumu warni na ɗa, simi na mu nuvuŋmusi kapai ɗai e vi ɗa wata par ɗa? 5A zilbiɗi: Peŋ aŋ tiki gama ɗa? E miɗini: Peŋ muguzak. 6A miɗiɗi: miɗiɗi wiiɗi ɗai buri e simni azumai. Asakal par a mula peŋ na muguzak ɗa yaw, a sa tese, a ɗuklaŋ a siŋɗi wiiɗi ɗaini zi hitri buri e ɓûrwiŋɗi wiiɗi ɗai ɗa. Nagai e ɓûrwiŋɗi wiiɗi ɗai lai. 7Hilif n'agogoi a na fu tiɗi agwi lai, a sa tese miɗini, a muɗa buri e ɓûrwiŋɗi lai. 8E simi, e vi lai. E mili pini n'a hina amai, a va dologo muguzak. 9Pɵaɗi a za gobi ɗai dubu puɗu, asakal par a tikiɗi piɗi e hili. 10Asakal par a niya war hulum gaiɗi ɗaini zi hitri e hili midini afti na Dalmanuta.
Wala zi siŋki na warni hlai n'amai par aga a za kai
Mat. 16.1-14; 12.38-39; Luk. 11.16-29
11Farisekai e hilisi sini, e tiki piɗi aŋ sispi gaini, aŋ titimiŋ lai, e zilbiŋ buri a ziɗi wala zi siŋki ktai na war hlai n'amai par. 12A suŋfa war sezeni a muɗa: Pinziba hanɗa e piyi wala zi siŋki buri ma ɗa? Jre mu miɗiki Wala zi siŋki aga a za siɗi kai zaŋ. 13Asakal par a hiniɗi, a niya warni hulum, a bunda anene kata.
Is na wiiɗi Farisekai gaini na wiini Herod
Mat. 16.5-12
14Midiɗi a wula skeŋ, e mili peŋ tiɗi kai; peŋ a na fu tiɗi war hulum ktai pal. 15A gidiɗi: Ki zi hangal, ki giɗimi siki gaini is na wiiɗi Farisekai gaini na wiini Herod. 16Hanɗa, buri ɓa peŋ tumu kai ɗa. 17Won hlai na Yesu a sɗa hanɗa, a miɗiɗi: Ki miɗi arbaɗi marki ɓa hanɗa buri peŋ tiki kai ɗa buri ma ɗa? A yima midiki kai hai ɗi? Midiki a mala kai ɵa ɗi?
18Arki a na, amma ki tili kai,
ɵimaki a na, amma ki ɵini kaalai ɗi?
Midiki a kɵa kai zaŋ ɗi? 19Won hlai na mu ɗukla peŋ na ɵim buriɗi ɗai na dubu ɵim ɗa, pini n'a hina ki miliŋ amai ɗa, a mula amai ɗa a va dologo gama ɗa? E miɗi: Dologo doogo pi sulu. 20Won hlai na mu ɗukla peŋ na muguzak buriɗi ɗai na dubu puɗu ɗa, pini n'a hina na ki miliŋ amai ɗa, a va dologo gama ɗa? E miɗi: A va dologo muguzak. 21A miɗiɗi: Haa tiyana, ki ɵini kai hai?
Yesu a zuula ɗif na melveŋ a Betsaida
22E cû a Betsaida, e kinisi ɗif ktai na melveŋ sini, e siiwiŋ buri a tikiti tini sini. 23A yima ɗif na melveŋ tini, a kaŋ edi war baŋa sini fuŋ par, a purfa teenek arni, a tikiti tini sini a zilbaŋ a muɗa: Ku na tala wala ktai ɗi? 24A mula arni, a muɗa: Mu na tala ɗai, e tili ara na ɗa maini luwuŋ nɵa, amma e ɗa e hili. 25A waya a tikiti tini miɗini arni pra, won hlai n'a mala arni edi azi n'ag'aŋ sulu ɗa, a tala pɗem, a bunda a tala wazagai paŋ ɗa edi gaglai maini n'a na ɗa ɵa. 26A tikini pini aha, a muɗa: Ku niya aha warni fuŋ kai.
Peter a muɗa ɓa, Yesu ɗa a Kristu
Mat. 16.13-20; Luk. 9.18-21; Yoh. 6.67-71
27Yesu gaiɗi ɗaini zi hitri e hili midini afti na Sezareya na wiini Filip, a tika pini aŋ zilbiɗi ɗaini zi hitri, a miɗiɗi: Ɗai e miɗi maɗa ɓa, mu siya ɗa? 28E wiyini seŋ e miɗi: Na zamai e miɗi ɓa: Ku Yohana zi Baptisme, na zamai ɓa, ku Eliyas, za zamai pra ɓa, ku ktai arbaɗi ɗai na mini Alaw. 29A zilbiɗi pra: Tiki, ki miɗi ɓa, Ta, mu siya lai ɗa? Peter a waya seŋ a miɗini: Tuku, ku Kristu. 30A gidiɗi buri e miɗi hanɗa edi sini ɗif kai.
Yesu a muɗa edi miɗini mrini gaini ɵiyini n'amai
Mat. 16.21-28; Luk. 9.22-27
31A tika pini aŋ hitriɗi ɓa, Ahini ɗif aga a sɗa gir viya, n'abakai n'arbaɗi ɗai gaiɗi paakai zi ɓaka n'abakai gaiɗi ɗai zi ɗû wazagai lai, aga e hiniŋ edi, aga e fiɗiŋ edi lai, mefeŋ hu asakal par aga a ɵiya amai. 32A muɗa seŋ hanɗa arɗi ɗai doogo. Nɵa Peter a yimaŋ edi kiini a tika pini aŋ gadaŋ. 33Amma Ni a bundasi arni, a tiliɗi ɗaini zi hitri, a ɓara Peter a miɗini: waya duɓa sek Satan, hiini na wiiku a na maini na wiini Alaw ɵa kai, amma a na maini na wiiɗi ɗai nɵa.
Futi zi tiki na pini Yesu
Mat. 16.24-28; Luk. 9.23-27
34A yikiɗi ɗai sini gaiɗi ɗai zi hitri lai a miɗiɗi: Na ɓa ɗif a dara a hala pa ɗa, sai a hiina sini kir kai, a tika dagrani wulani, a tapasi pa. 35Buri asiya ɗi paŋ n'a dara a kora suŋfani ɗa, aga a baŋ, amma asiya ɗi paŋ n'aga a ba suŋfani buriya, burini labar na pɗem lai ɗa aga a kurɗaŋ. 36Na ɓa ɗif a niviti yai gaini abaiɗi paŋ, amma na ɓa a ba suŋfaɗi agulni ta ɗa, pɗemni aŋ wata ɗa? 37Ɗif a sɗa aŋ bunda suŋfaɗi agulni gaini a ma ɗa? 38Buri ɓa asiya ɗi paŋ n'a za siyer buriya, burini seŋŋa lai, arbaɗi pinziba na maafanai, na tuwarai hanɗa, Ahini ɗif lai aga a za siyer burini, war hlai n'aga a halasi warɗi abai na wiini Epini gaiɗi ɗai zi ɵeŋ na war fuŋ-n'Alaw par na sɗik pini.
Currently Selected:
Markus 8: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
