Markus 7
7
Sispai na wiini Yesu gaiɗi Farisekai burini seŋ na wiini de
Mat. 15.1-9
1Farisekai gaiɗi ɗai zi ɗû wazagai n'e hilisi a Yeruzalem par e tipisi sini Yesu. 2E tili ɓa zamai arbaɗi ɗaini zi hitri ɗa e simi gaini tiɗi hihir, a dara a muɗa e mi tiɗi edi kai. 3Buri pin de na wiiɗi Farisekai gaiɗi Yudiyakai paŋ, e simi ɗa sai e mi tiɗi edi pɗem yok haw, pini de na wiiɗi tamaiɗi a na ɗa maini nɵa. 4Won hlai n'e wiyisi li war hlai na ɗai e tipi warni ta ta ɗa paŋ ɗa, e zi siɗi edi hilu kai ɗa, e simi wala kai. De zamai viya n'e zi pini a na lai, maini mini kup, gaini grak, gaini argiŋ, gaini tasa zi kiya, gaini tabel lai. 5Farisekai gaiɗi ɗai zi ɗû wazagai ɗa e zilbiŋ e miɗi: Ɗaiku zi hitrai e zi pini deɗi tamaiɗi kai ɗa buri ma ɗa? E simi gaini tiɗi hihir buri ma ɗa? 6A miɗiɗi: Esaya a muɗa seŋ na wuze buriki woɗi futini, tiki ɗai zi rhai maini n'a ɗosi ɗa nɵa:
Ɗai hanɗa e kûlûŋa gaini miɗi n'amai,
amma agulɗi a na gaigai gaya.
7E hûrgû azumai wuza aŋ siiwiŋa gaini miɗi n'amai kadai,
e hitri edi a seŋ zi gadai na wiiɗi ɗai.
8Tiki ki hini gadai na wiini Alaw ɗa edi ta, ki zi pini de na wiiɗi ɗai gaini gdaŋki, 9A miɗiɗi: Ki hini edi na ɗa, a gadai na wiini Alaw mal mal aŋ zi pini de na wiiki ɗa. 10Buri Musus a muɗa: Apuku gaiɗi amuku ku kûlûɗi amai, ni n'a muɗa meefeŋ sini epini, zaw siɗi emini ɗa, aga a nava fiɗi n'edi. 11Tiki ki miɗi ɓa: Na ɓa ɗif a muɗa li sini epini, zaw siɗi emini ɓa: wala na mu hiinaŋ ɓa mu zina puku gaini ɗa a na korbaŋ, a dara a muɗa: A like n'a sa edi ta burini Alaw. 12Ki hiniŋ aŋ za pɗem sini epini gaiɗi emini kai, 13Nɵa tiki ki bindi seŋ na wiini Alaw edi aŋ kadai gaini deki na ki hitriŋɗi wiiɗi ɗai ɗa, ki zi wazagai zamai maini hanɗa ɵa lai.
Wazagai n'a bunda ɗif hihir
Mat. 15.10-20
14A yikiɗi ɗai paŋ sini pra a tika pini aŋ miɗiɗi: Ɵini pɗem, ki yimiŋ midiki lai. 15Wala n'anene sini ɗif par n'a niya amlai warni sek ɗa, a kiɗa a bundaŋ hihir kai, a bundaŋ hihir ɗa a wala n'a niya edi sini par ɗa. 16Ni na ɵimani zi ɵeŋ a na ɗa a pɗem ɓa a ɵina. 17Won hlai n'a wayasi li aha, aŋ siɗi ɗai gobi kir kai ɗa, ɗaini zi hitri e zilbiŋ miɗini seŋ zi siŋka maini hanɗa, 18A miɗiɗi: Tiki lai, ki ɗi na siɗi midiki kaalai ɗi? Wala n'a niya warni ɗif a sɗa aŋ bundaŋ hihir kai, ki ɵini hanɗa kai ɗi? 19Buri a niya ɗa warɗi agulni kai, amma warni aruni kadai, safai agwi a hala edi warni waŋ zi flai lai. Gaini miɗi hanɗa a dara a muɗa ɓa, wala zi simi paŋ ɗa a hilu. 20A muɗa: Wala n'a niyasi edi sini ɗif par a bundaŋ hihir. 21Buri hiini na maafanai paŋ a niyasi amlai warɗi agulni ɗif par, de na hihir, hill, fiɗini humok, 22maɵara, melew na pini wazagai, zini meefeŋ siɗi na zamai, payai zi siyer, yel na meefeŋ, zaida na meefeŋ, kûlûni-si, miɗi zi giɵibi, 23Wazagai na maafanai hanɗa paŋ a niyasi warni ɗif par, a bunda ɗif hihir lai.
Yimiɗi muni na Serofenesai
Mat. 15.21-28
24A fakaɗi woni par, a hala midini afti na Tirus gaiɗi Sidon, a niya aha warni dalam ktai dak, a firiya ɓa ɗai e siɗi hanɗa kai, paŋ ktai a kiɗa aŋ ŋoya kai. 25Buri muni ktai na ahiɗi ksalai aŋ midiɗi, te ɵinasi labarni ba, te halasi te hurga azumai ezini. 26Amma muni hanɗa te grek, war pinzibaɗi Serofenesai, te siiwaŋ buri a birga ksalai na hi hir edi siɗi ahiɗi par. 27A miɗiɗi: Hiniɗi aliyagoi ɗa e vi ca haw, buri ɓa ku mula simi na wiiɗi aliyagoi yaw, ku pokoŋ edi wiini hirgakai ɗa, a sɗa aŋ za kai kai ɗi? 28Amma te wiyini seŋ te miɗini: A jre, Epiɗ-ɗai, hirgakai azumai pini tabel ɗa, a suma ɗa a kolkoɗai n'a yakasi piɗi aliyagoi par kai ɗi? 29A miɗiɗi: Pin miɗiku hanɗa, hala wiiku, ksalai a niya edi siɗi ahiku par ya. 30Won hlai te co aha ɗa, te niviti ahiyagwi azumai midini li gaini fini waŋ, ksalai a niya edi dak.
Yesu a zuula ɗif na ganiŋ na ɓurtum edi midini afti na wiiɗi ɗai zamai
Mat. 15.29-31
31A halaɗi midini afti na Tirus ɗa par, a vugasi a Sidon ɗaw midini afti na Dekapolis ɗaw a hala sini yem-ra n'abai na Galileya sek. 32E kinisi ɗif ktai na ganiŋ sini, na alesini gaini pi duk, e siiwiŋ buri a tikiti tini sini. 33Yesu a yimaŋ edi kiini, a wa tini ɵimaɗi, a purfa teenek tini, a tetimiti alesini gaini teenek na mini par ɗa. 34Asakal par a bunda arni amai war hlai n'amai a suŋfa a muɗa: Effata, a dara a muɗa: Mala edi. 35Tizaw, ɵimaɗi a mala edi, alesini na gaini pi duk ɗa te pla edi lai, a tika pini aŋ muɗa seŋ gaglai. 36Yesu a gidiɗi buri e miɗi hanɗa wiini ɗif kai, a gidiɗi ɵa lai, amma nagai e miɗiŋ edi wuzaɗi sek a suwa a suwa lai. 37E bindi hiyak gara e miɗi: A za ɗa a wazagai na pɗamai sal koo, a bindiɗi na ganaŋai e ɵini, na ɓurtum ɗa e miɗi lai.
Currently Selected:
Markus 7: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
