Markus 6
6
Ɗai na Nazaret e yimi pini Yesu kai
Mat. 13.53-58; Luk. 4.16-30
1A fakasi woni par, a halasi midini aftini, ɗaini zi hitri e tipisi pini lai. 2Won hlai na Sabbat a gizi li, a tika pini aŋ hitira warni sinagogne. Ɗai viya n'e ɵini seŋni e bindi hiyak e zilbi siɗi ɓa: Ɗif hanɗa, sɗa na maini hanɗa ɵa a navaŋ wata par ɗa? 3Hanɗa a ɗif zi kilɗi luwuŋ kai ɗi? Ahiɗi Mariya kai ɗi? A tawalɗi miɗi Yakob gaini Yoses gaini Yudas gaini Simun ɗa kai ɗi? Tawalakaini na falakai e ɗa arbamu na ca ca kai ɗi? A bunda aŋ wala zi dibi buriɗi. 4Yesu a miɗiɗi: Ɗif na mini Alaw ɗa, e miisiŋ war hlai zamai kai, sai midini aftini, arbaɗi zagalakaini lai, aha war dalamni lai. 5Yesu a kiɗa aŋ za wala zi hiila woni kai, sai a tika tini midiɗi ɗai zi veglek ktai ktai kadai aŋ zûûliɗi. 6A bunda hiyak burini yimi kai na wiiɗi.
Yesu a ɵiniɗi na doogo pi sulu edi
Mat. 9.35; 10.1, 5-14; Luk. 9.1-6
A paya war fuŋ n'agogoi na ɵimaɗi paŋ aŋ hitriɗi ɗai. 7A yikiɗisi na doogo pi sulu sini, a tika pini aŋ ɵiniɗi sulu sulu, a siɗi spak miɗini ksalai, 8A gidiɗi buri e tiki wala ktai tiɗi buri morkoiɗi kai, sai a amaraŋa tar. E tiki wala zi simi tiɗi kai, guɓo tiɗi kai, sulai zi kiiya tiɗi kaalai, 9amma ki wi harabak eziki, ki wi sapa siki sulu kai. 10A miɗiɗi pra: Won hlai na ki niyi li aha war fuŋ ktai ɗa, ki simni warni ɵa haa ki vidi warni hlai ni par. 11Na ɓa, ki cû li war hlai ktai na ɗai e diri e yimiki siɗi kai, e ɵini seŋki kaalai ɗa, ki fiki woni par ɗa ki ɵiɓi alogodo n'eziki edi tiɓ tiɓ, kapai a hina aŋ zaida siɗi. 12E hili edi e ɓiki seŋ buri ɗai e bindi payaiɗi. 13E birgi ksalai edi viya, e girdi emel siɗi ɗai zi veglek viya, e zûûliɗi lai.
Mrini Yohana zi Baptisme
Mat. 14.1-12; Luk. 9.7-9
14Pai Herod a ɵina hanɗa, buri yikini Yesu a tika pini a wa gara. Ɗai e miɗi ɓa: Yohana zi Baptisme a ɵiya li amai arbaɗi zi mri par, spak a sa sini aŋ za wazagai zi hiila na ɗa burini hanɗa. 15Amma na zamai e miɗi ɓa a Eliyas, na zamai pra ɓa, a ɗif na mini Alaw ktai maiɗi marni na zamai ɗa ɵa. 16Herod, won hlai n'a ɵina hanɗa, a muɗa: Yohana na mu ɗukla wulani edi ɗa, a ɵiyasi amai na ɗa a ni.
Mat. 14.3-12; Luk. 3.18-20
17Buri Herod gaini midini dama a ɵiniɗi ɗai aŋ yimi Yohana, e yimiŋ, e rgiŋ warɗi daŋgai lai buri seŋ na wiiɗi Herodiyas na munini Filip, na Herod a tikiti aŋ munini. 18Buri Yohana a miɗini ɓa: Futi burini aŋ tikiti munini tawalni kai. 19Herodiyas te bla gaw sini, te dara aŋ fuɗaŋ lai, amma te kiɗa aŋ za hanɗa kai. 20Buri Herod a huna Yohana, buri a sɗa ɓa, a ɗif na jre-ɗikat, na sɗik lai. A hina wala na meefeŋ a za sini kai. Won hlai na Herod a ɵina seŋ hanɗa, a sɗa wala n'a za ɗa kai, paŋ ktai a firiya a zuɓura seŋ na Yohana a muɗaŋ ɗa gaini firiyi gara. 21Te niviti futi na te na piyiti ɗa, war mefeŋ na Herod a za fet na wiini wiini, war mefeŋ ni ɗa, a zizina simi buriɗi ɗaini n'abakai gaiɗi abakaiɗi askarai, gaiɗi n'abakai na war Galileya ɗa paŋ lai. 22Ahiɗi Herodiyas te niya amlai te didima, te yima arni Herod gaiɗi n'a yikiɗisi ɗa. Pai a miɗiɗi wiiɗi ahiyagwi ɗa ɓa: Zilba wala na ku firiyaŋ paŋ aga mu suŋku. 23A ha wala mini a miɗiɗi: Wala na ku zilbaŋ ɗa aga mu suŋku, koo ɓa a galɗi paiŋa tekeɗeɗi. 24Te niya anene te miɗiɗi wiiɗi emiɗi: Aga mu zilba ɗa a ma ɗa? Emiɗi te miɗiɗi: Ku zilba ɗa a humokni Yohana zi baptisme. 25Te purmasi witaw aŋ niya amlai sini pai buri te zilbaŋ, te muɗa: Mu dara ɓa ku saŋasi humokni Yohana zi baptisme tiyana warni tasa ta. 26Pai a kwima gara, amma burini wala n'a haŋ mini, gaiɗi ɗai n'a yikiɗisi lai ɗa, a dara a bla edi siɗi kai. 27Tizaw tar pai a ɵina askarni zi gɗam ktai buri a hala a kasi humokni Yohana zi baptisme. Ɗif zi gɗam a hala, a ɗuklasi humokni Yohana amlai warɗi daŋgai par. 28A kasi humokni warni tasa ta, a siŋɗi wiiɗi Ahiyagwi, ahiyagwi te siŋɗi wiiɗi emiɗi. 29Won hlai na ɗai zi hitri na wiini Yohana e ɵini labar hanɗa, e tiki sini e hili e piŋ.
Yesu a sa simi wiiɗi ɗai dubu ɵim
Mat. 14.13-21; Luk. 9.10-17; Yoh. 6.1-15
30Apostelai e tipi sini Yesu, e miɗini gaini wazagai n'e ziŋsi ɗa paŋ, n'e hitriŋɗi wiiɗi ɗai lai. 31A miɗiɗi: Yumumu sumu edi warni baŋa, kapai siki amla agwi. Buri ɗai e hilisi e wiyi, e hilisi e wiyi haa hlai n'e niviŋ agwi buri simi maa aŋ kai. 32E niyi warni hulum, e yimi siɗi edi kiiɗi war hlai na baŋa. 33Ɗai n'e tiliɗi e ɗa hili ɗa viya, ɗai na war fuŋ n'abai paŋ par e liwisi gaini eziɗi, e cû wuzaɗi lai. 34Won hlai n'a niyasi amai warni yem-ra n'abai ɗa par, a tala firiɗi ɗai n'abai, e bindi arni haw, buri nagai e ɗa arni maini adumai na ɗifni zi gɗam aŋ kai nɵa. A tika pini aŋ hitriɗi wazagai viya. 35Won hlai n'e tili ɓa futi te vuga vug ɗa, ɗaini zi hitri e hilisi sini e miɗini: Hlai hanɗa a baŋa, futi ɗe te hala ɗaw lai, 36ku tikiɗi piɗi ɗai ta kapai e hili e piyi wala zi simi miɗi war fuŋ n'agogoi n'aŋ ɵimaɗi hlai na ɗa. 37A waya seŋ a miɗiɗi: Tiki dama ki siɗi simi. Nagai e miɗini: kapai mi hili mi wûrisi wala zi simi gaini sulai na miya mi siŋɗi aŋ simi ɗi? 38Amma a zilbiɗi: Peŋ aŋ tiki gama ɗa? Hili tiliŋ haw, e hili e zilbiɗisi, e miɗini: peŋ a na ɵim gaini hilif sulu lai. 39Nɵa Yesu a muɗa buri e miliɗi azumai midini evek na hirnaŋ war vok ta ta. 40E simni azumai ca ca, war vok na miya miya, na doogo doogo ɵim ɵim lai. 41A mula peŋ na ɵim gaini hilif na sulu lai a bunda arni amai war fuŋ-n'Alaw, a sa tese, asakal par a ɗukla peŋ ɗa a siŋɗi wiiɗi ɗaini zi hitri kapai e ɓûrwiŋ edi, a ɓurwa hilif na sulu lai. 42E simi haa e vi paŋ, 43e mili pini n'a hina ɗa amai, a va dologo doogo pi sulu gaini hilif lai. 44Nagai n'e simi ɗa, pɵaɗi maɵagai taaha ɗa dubu ɵim.
Yesu a hala miɗini yem-ra-n'abai
45Asakal par agwi, a pa piɗi ɗaini zi hitri buri e niyi gaini amai warni hulum n'abai, e bindiɗi ka anene kata wuzaɗi Betsaida sek, Ni gaini midini dama a hina ka aŋ tikiɗi piɗi ɗai ɗa. 46A hiniɗi ka ca, a niya amai midiɗi huwuŋ buri a siiwa. 47Futi te za li koskoi ɗa, hulum n'abai ɗa a ɓata edi arbani yem-ra n'abai, Ni ɗa a hina ka amai gdaŋ kiini zaw. 48Won hlai n'e tiliɗi e ɗa siɗi gir war vilini hulum, buri smer a pasi arɗi tiɓ, war gorof n'abai ɗa, a halaɗi siɗi sek amai midini yem-ra blaŋ, a ka sini aŋ niya ɵimaɗi. 49Won hlai n'e tiliŋ a hala midini yem ɗa, e hiini ɓa a ksalai, e ɗûûli. 50Nagai paŋ e tiliŋ, paŋ e hûni lai. Amma Ni a muɗa siɗi: Hanɗa mu ta, ki hûni kai. 51A niya amai piɗi war hulum, smer a tika azumai, e bindi hiyak griŋ gara. 52Buri sɗa n'a za gaini peŋ ɗa, e ɵiniŋ kai, hiiniɗi a na fu gaini dûgû duk.
Yesu a zuula ɗif na Genezaret
Mat. 14.34-36; Yoh. 6.22-25
53Won hlai n'e gi anene kata li ɗa, e cû a Genezaret e yimi amai wulani daŋ. 54Won hlai n'e niyisi agoɗom warni hulum par tar ɗa, ɗai e siɗi Yesu tar. 55Ɗai e gûni midini afti paŋ, e tiki piɗi aŋ kiɗiŋsi ɗai zi veglek miɗini walaɗi zi feŋ, woɗi paŋ n'e ɵini li ɓa aŋ woni ɗa. 56Hlai paŋ n'a hala li woni ɗa, koo ɓa a fuŋ n'abai, koo ɓa a fuŋ n'agogoi, e kiɗi ɗai zi veglek ɗa won hlai na ɗai e tipi woni ta ta ɗa. E siiwiŋ buri a hiniɗi e tiki tiɗi koo sini mini sapani tekeɗeɗi; nagai paŋ n'e tiki tiɗi sini ɗa e zûûli paŋ.
Currently Selected:
Markus 6: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
