Markus 5
5
Yesu a zuula ɗif na Gerasene na ksalai miɗini
Mat. 8.28-34; Luk. 8.26-39
1E cû anene kata duɓani yem-ra n'abai midini afti na wiiɗi Gerasenekai. 2Pri n'a praɗi agoɗom par war hulum n'abai tar ɗa, ɗif ktai a niyasi warni yeɵ par na ksalai aŋ miɗini a halasi sini sek. 3Simnini a na fu warni yeɵ, ɗif a sɗa aŋ naggaŋ kir kai koo gaini jaɓ tekeɗeɗi a rga kai. 4Buri e rgiŋ ka azi viya, e wiini pokolom ezini, e rgiŋ gaini jaɓ lai, amma a haɗa jaɓ ɗa edi, a haɗa pokolom lai, ɗif n'a kiɗa a cakaŋ azumai aŋ kai. 5Duvuk gaini girvudi paŋ a sumna sai warni yeɵ, amai midini huwuŋ lai, a ɗuula gaini ɗûûli sal, a ɓasa sini gaini ali-fuŋ. 6Won hlai n'a tala Yesu edi gaigai par, a lawa mini, a hurga azumai wuzani, 7a ɗuula a muɗa: N'a tupuku gaya ɗa a ma ɗa, Yesu n'Ahini Alaw n'Amai, mu huku maa gaini Alaw zaŋ, ku turlaŋa kai. 8Buri Yesu a miɗini ɓa: niyasi edi sini ɗif hanɗa par, tuku seze na meefeŋ. 9A zilbaŋ ɓa yikuku maɵa ɗa? A miɗini: Yikiŋa ɓa: Legiyon, buri tiyi mi ɗa viya. 10Ksalai a siika mini buri a birgaŋ edi midini afti par kai. 11Farani hoho a na fu gobi ɵimaɗi huwuŋ aŋ suma. 12Ksalai a siiwa Yesu a muɗa: Hiniyi, mi hilisi sini hoho hanɗa aŋ niyi warni. 13A siɗi futi lai, ksalai a niyasi edi, a niya warni hoho, farani hoho a fakasi amai siɗi huwuŋ par gaini luwi, a yaka agoɗom warni yem-ra n'abai ɗa kafa. 14Nagai n'e giɗimiŋ ɗa, e liwi, e ki labar aha war fuŋ n'abai gaini n'agogoi na ɵimaɗi paŋ lai, ɗai e hilisi edi aŋ tili wala n'a za ɗa. 15E cû sini Yesu, e tili ɗif na ksalai miɗini ɗa azumai dam, sapa sini ca, gaini hangal lai, a ni n'a na ka gaini Legiyon miɗini ɗa, hunai te yimiɗi. 16Nagai na wala a za wuzani arɗi ɗa, e miɗiɗi miɗini wala n'a za sini ɗif na gaini ksalai miɗini gaini hoho ɗa lai. 17Ɗai e tiki piɗi e siiwiŋ buri a yima sini edi miɗini afitiɗi par. 18Won hlai n'a na niya warni hulum, ni n'a na ka gaini ksalai a siiwaŋ buri a hinaŋ a hala gaini. 19A hinaŋ aŋ hala gaini kai, amma a miɗini: Hala aha siɗi tamaiku, ku miɗiɗi gaini wazagai n'EPIƊ-ƊAI a zaŋ suku paŋ gaini hinini-haw n'a hiinaŋ buriku lai. 20A hala a tika pini aŋ sa labar edi warɗi Dekapolis midini wazagai na Yesu a zaŋ sini paŋ, ɗai paŋ e bindi hiyak.
Ahini Yairus gaiɗi muni na te tetema mini sapani Yesu
Mat. 9.18-26; Luk. 8.40-56
21A waya anene kata gaini hulum n'abai, firiɗi ɗai n'abai e tipi sini, a na fu agoɗom wulani yem-ra n'abai. 22Ktai arbaɗi n'abakai na warni sinagogne a halasi, yikini Yairus. Won hlai n'a tala Yesu, a hurga azumai ezini. 23A siika mini aŋ siiwa a muɗa: Ahiya t'aŋsi veglek, te ŋa ta aŋ mri. Mu siiwuku, halasi tika tuku siɗi ta, kapai te zuula, te sumna karɗi lai. 24A hala gaini, ɗai viya e hili pini lai, e hiɵiŋ amai. 25Muni zi veglek na fel a ka gaiɗi, te za gaini buza gobi doogo pi sulu, te na fu woni. 26Te siɗa gir gara tiɗi doktorai zamai zamai viya, faraiɗi paŋ a ba edi li, te nava pɗem gaini agwi kai zaŋ, veglekɗi a riya amai, a riya amai a suwa pra. 27Won hlai na te ɵina labarni Yesu, te halasi arbaɗi ɗai, te tetema sapani Yesu duɓani par. 28Buri te hiina warɗi ɓa: Koo na ɓa mu tetema ɗa a sapani tekeɗeɗi, aga mu zuula. 29Tizaw tar, felɗi n'a ka ɗa a ɗiya, te sɗa war siɗi ɓa te zuula war gir par ya. 30Yesu a sɗa tizaw ɓa gdaŋ a niyasi edi sini par, a bunda arni duɓani arbani firi, a muɗa: N'a tetema sapaŋa asiya ɗa? 31Ɗai zi hitri e miɗini: Firiɗi ɗai n'a na hiɵiku na ɗa, ku zilba ɓa: a tetema sapaŋa asiya ɗi ɗa, maɵa maɵa ɗa? 32A ɵa arni sini, a tiliti na na te za hanɗa. 33Muni te sɗa wala n'a za siɗi, te halasi te hurga azumai ezini, te miɗini jreni seŋ ɗa paŋ edi. 34A miɗiɗi: Ahiya, yimiku a zuuluku li, hala jam, pla edi mini veglekku par. 35A ɵa mini maa edi kai, ɗai zamai e hilisi ahani ɗif n'abai na war Sinagogne e miɗi: Ahiku te mra su ya, ku huwya Api zi hitri katawai pra ɗa buri ma ɗa? 36Yesu a ɵina seŋɗi ba, a miɗini wiini ɗif n'abai na war Sinagogne ɗa: Ku huna kai, yima bas. 37A hina ɗif zamai a hala gaini kai, a hala gaini ɗa a Peter gaini Yakob gaini Yohana na tawalni. 38E cû aha war dalamni ɗif n'abai na war Sinagogne ɗa, a tala firiɗi ɗai n'e ɗa sûûri, e tûwi, e ɗûûli gaini gdaŋɗi lai. 39A niya aha, a miɗiɗi wiiɗi ɗai: Ki sûûri lai, ki tûwi lai nɵa buri ma ɗa? Ahiyagwi te mra kai koo! te kala na ɗa a weseŋ. 40Nagai e riyi pini. A ɵimiɗi anene paŋ kafa, a yika epiɗi ahiyagwi gaiɗi emiɗi gaiɗi nagai n'e hilisi gaini lai e niyi amlai warni hlai na ahiyagwi te na woni ɗa. 41A yima tiɗi ahiyagwi a miɗiɗi: Talita, kum! A waya edi ɓa: Ɓulmi, mu na muɗuku, faka amai! 42Tizaw tar, ɓulmi te fakasi amai, te tika piɗi te hala, buri buzaɗi a za doogo pi sulu, e bindi hiyak gara. 43A gidiɗi gdaŋ gara buri e miɗi edi wiini ɗif gaini wala n'a za ɗa kai. Asakal par a miɗiɗi buri e siɗi wala zi simi.
Currently Selected:
Markus 5: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
