Markus 4
4
Seŋ zi siŋka maini midini ɗif zi sûûɗi seyem
Mat. 13.1-23; Luk. 8.4-15
1A niya warni hulum a sumna warni edi arni yem par dam. Ɗai e simni amai gdaŋ par wulani daŋ ca ca. 2A hitriɗi wazagai viya war seŋ zi siŋka maini, a miɗiɗi war hitri ni ɓa: 3ɵini pɗem, ɗif zi sûûɗi a hala edi aŋ suuɗa. 4Won hlai n'a na suuɗaŋ, zamai a yaka ɵimaɗi futi, wala zi ɗufli a halasi a sumaŋ. 5Na zamai a yaka midini hlai zi kriyit, afti woni gara kai, a diya amai witaw tar buri aftini a na hulum kai. 6Amma won hlai na futi te yimasi li amai te yaŋ edi, a ya edi buri sirdaini a ruva azumai kai. 7Na zamai ɗa a yaka arbani hedek, hedek a wula amai, a rozoŋ, a wa ali kai. 8Na zamai ɗa a yaka midini afti na pɗem, a wula, a za abakai, a wa ali, ktai a wa doogo doogo hu, ktai a wa doogo doogo ɵaara, zamai ɗa miya lai. 9A miɗiɗi: Ni na ɵimani zi ɵeŋ a na ɗa, pɗem ɓa a ɵina.
Yesu a muɗa war seŋ zi siŋka maini buri ma ɗa?
Mat. 3.10-15; Luk. 8.9-10
10Won hlai n'e cû edi warni baŋa ɗa, nagai n'e ɗi pini gaiɗi na doogo pi sulu lai ɗa, e zilbiŋ midini seŋ zi siŋka maini hanɗa. 11A miɗiɗi: A sa siki tiki aŋ siɗi wala zi ŋoyai na wiiɗi pai n'Alaw, amma buriɗi nagai n'edi par ɗa, wazagai paŋ a sa siɗi war seŋ zi siŋka maini. 12Kapai won hlai n'e tili ɗa, e siɗi wala ktai kai, won hlai n'e ziɓiri ɗa, e ɵini wala ktai kaalai, ɵa kai ɗa aga e wiyisi hiiniɗi sini Alaw, aga e nivi ni burini tuwurɗi lai.
Yesu a za gaglai midini seŋ zi siŋka maini na wiini ɗif zi sûûɗi seyem
Mat. 13.10-15; Luk. 8.9-10
13A miɗiɗi: Seŋ zi siŋka maini hanɗa, ki ɵini ezini edi kai ɗi? Seŋ zi siŋka maini na gaini abaini paŋ aga ki ɵini ezini edi maɵa maɵa ɗa? 14Ɗif si sûûɗi seyem a suuɗa ɗa a seŋ. 15Seyem n'a suuɗa ɵimaɗi futi ɗa e ɗi nagai na seŋ a suuɗa warɗi, won hlai n'e ɵini seŋ li tar ɗa, Satan a halasi a tika seŋ n'aŋ warɗi ɗa edi. 16N'a suuɗa midini hlai zi kriyit ɗa, e ɗi nagai n'e ɵini seŋ li e yimiŋ gaini firiyi tar, 17amma sirdaini warɗi kai, e cifi viya kaalai, won hlai na gir, zaw zini gir burini seŋni Alaw a fakasi li ɗa, e wi siɗi edi tar lai. 18Zamai n'a suuɗa arni hedek ɗa, e ɗi nagai n'e ɵini seŋ, 19amma hiini na wiiɗi duniya gaini tanai na wiini farai, gaini melew na pini wazagai zamai zamai ɗa lai, a niya warɗi, a rozoŋ, a kiɗa a wa ali kir kai. 20Na zamai n'a suuɗa midini afti na pɗem ɗa, e ɗi nagai n'e ɵini seŋ li ɗa, e yimiŋ a wa ali lai, zamai a wa doogo doogo hu, zamai doogo doogo ɵaara, na zamai miya lai.
Seŋ zi siŋka maini midiɗi lampa gaiɗi daram
Luk. 8.16-18
21A miɗiɗi pra: Lampa ɗa, e piti azumai piɗi wulai, zaw e tikiti azumai pini li ɗi? E tikiti ɗa amai midini wala n'e higi lampa sini kai ɗi? 22Wala zi ŋoyai n'aga a siŋka edi kai aŋ kai, wala n'a za war kuɗuhai n'aga a siŋka edi gaglai kai ɗa aŋ kaalai. 23Na ɵimani zi ɵini a na ɗa a pɗem ɓa a ɵina. 24A miɗiɗi pra: ki zi hangal gaini seŋ na ki ɗa ɵiniŋ ɗa, daram na ki ɗa ŋi gaiɗi ɗa, aga e ŋi siki gaiɗi lai, aga a sa siki ɗa a suwa pra. 25Buri ni na wiini a na, aga a sa sini pra, amma ni na wiini aŋ kai ɗa, n'aŋ tini par maa aga a yimasi edi.
Seŋ zi siŋka maini midini seyem n'a diya kiini
26A muɗa pra: Paini fuŋ-n'Alaw te na maini ɗif n'a suuɗa seyem arni afti nɵa. 27Koo ɓa a kala weseŋ, koo ɓa a kala kai, seyem ɗa a diya, a wula amai lai, a za maɵa ɗi a sɗaŋ kai. 28Afti gaini midini dama a sa seyem, dai ɗa a ɵamatak, asakal par ɗa a miɗini wai na gaini niiyi kai, sini vidini ɗa a seyem na gaini niiyi ta lai. 29Won hlai na seyem a naha li, a hina a maharam buri hlai zi hiɗi a za li.
Seŋ zi siŋka maini midini seneve
Mat. 13.31-32; Luk. 13.18-19
30Paini Alaw aga mu kututumu gaini a ma ɗa? Seŋ zi siŋka maini na mu muɗutumu edi gaini a na wata ɗa? 31Te na maini seyemni seneve na won hlai n'a suuɗa azumai arni afti sek ɗa a n'agwi n'arbani seyem na midini afti paŋ, 32amma won hlai n'a suuɗa li, a wula amai li lai, a bunda abai a suwa sugoi paŋ, a wa graŋni edi abai, haa wala ɗufli n'arbani hlai n'amai a zizina gutni amai sini sezeni.
Yesu a hitra ɗai war seŋ zi siŋka maini
Mat. 13.34-35
33A miɗiɗi seŋ war seŋ zi siŋka maini viya maini nɵa, na nagai e kiɗi aŋ ɵini ezini edi ta ta ɗa. 34A miɗiɗi seŋ paŋ sai war seŋ zi siŋka maini, won hlai n'e hini li kiiɗi ɗa, a siŋka ezini wiiɗi ɗai zi hitri ɗa.
Berber a tika azumai pini seŋ na Yesu a miɗiŋni
Mat. 8.18, 23-27; Luk. 8.22-25
35Mefeŋ ni dama, futi te za li koskoi ɗa, Yesu a miɗiɗi: Bundumu anene kata. 36Asakal n'a tikiɗi pini firiɗi ɗai li ɗa, e kiŋ gaini hulum n'a na fu warni dam ɗa; hulamai n'abakai zamai a tapa gaini lai. 37Ber-ber n'abai a fakasi, mayaw a tika pini a ɵiɓa amai warni hulum n'abai ɗa, haa hulum n'abai a dara a va. 38Ni a na fu aŋ kala weseŋ edi giɗerni hulum n'abai ɗa, tubla miɗini ta. E ɵiyiŋsi amai e miɗini: Api zi hitri, mu buɗuhumu na ɗa a biɗihi, a fuɗuku suku kai ɗi? 39Won hlai n'a ɵiyasi amai ɗa a ɓara smer, a muɗa sini yem-ra n'abai ɗa maini nɵa: ba, ɗiya suuraku ɗa. Smer a tika azumai, hlai a ɗiya ɗiŋ lai. 40Asakal par a miɗiɗi: Ki ɗi na muhunakai na maɵa ɗa? Ki simni gaini yimi kai nɵa maɵa ɗa? 41Hunai n'amai te yimiɗi, e miɗi arbaɗi marɗi: Ni hanɗa asiya ɵa ɗa, na smer gaini yem-ra n'abai e ɵini pini ɗa?
Currently Selected:
Markus 4: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
