Markus 3
3
Ɗif na tini gaini mri
Mat. 12.9-14; Luk. 6.6-11
1A niya warni sinagogne pra, ɗif na tini gaini mri aŋ woni, 2E tiki hangalɗi sini Yesu aŋ tili wala n'aga a zaŋ ɗa, na ɓa a zuulaŋ li warni Sabbat ɗa, e siɗi e pi seŋ midini. 3A miɗini wiini ɗif na tini gaini mri: Faka amai, ɗiyaɗi tuku na zaw wuzani arɗi ɗai paŋ. 4Asakal par, a zilbiɗi a muɗa: Seŋ zi gadai a sa futi wiini ɗif aŋ za war Sabbat ɗa a ma ɗa? Aŋ za wala na pɗem, zaw na meefeŋ ɗi? Aŋ kurɗa ɗif, zaw aŋ fuɗa ɗif ɗi? E simni hiyak e diri e miɗi kai. 5A tika pini aŋ gûliɗi gaini sûwi kaŋ buri e diri e ɵini kai, a miɗini wiini ɗif na tini gaini mri su ɗa: miɗitisi tuku edi. A miɗitisi edi, tini te bunda pɗemi. 6Won hlai n'e niyi anene tar, Farisekai e kiti miɗi gaiɗi ɗai na wiini Herode aŋ piyi yel na kapai e fiɗiŋ edi gaini.
Firiɗi ɗai e hilisi siini Yesu ɵimaɗi yem-ra n'abai
Mat. 12.15-16; Luk. 6.17-19
7Yesu a yima sini edi gaiɗi ɗaini zi hitri agoɗom wulani yem-ra n'abai, firi n'abai a tapa pini; ɗai na Galileya par, na Yudiya par, 8na Yeruzalem par, na Idumeya par, na war gal n'anene duɓani Yurdan par, na gobi ɵimaɗi Tirus gaiɗi Sidon par lai, won hlai n'e ɵini sɗa n'a na zaŋ ɗa, e hilisi sini. 9A miɗiɗi wiiɗi ɗaini zi hitri buri e piyitini hulumi ta kapai ɗai e pirɵiŋ kai. 10Won hlai n'e tili ɓa a na zuula ɗai viya ɗa, ɗai na veglek siɗi paŋ e rimi aŋ tiki tiɗi sini. 11Ksalai lai, won hlai n'a tala li Yesu ɗa, a kɵa azumai wuzani, a ɗuula nɵa: tuku k'Ahini Alaw. 12Amma a ɓiriɗi gaini gadaŋ buri e miɗi edi wiini ɗif kai.
Yesu a viriɗi na doogo pi sulu
Mat. 10.1-4; Luk. 6.12-16
13A niya amai midiɗi huwuŋ, a yikiɗi nagai n'a dara a yikiɗi ɗa, e hilisi sini. 14A vara arbaɗi par ɗai doogo pi sulu, a siɗi yiki ɓa: Apostelai kapai e zi aŋ ɗai na wiini kapai a ɵiniɗi edi aŋ ɓiki seŋ, 15gaini spak n'e birgi ksalai edi gaini lai. 16A viriɗi na doogo pi sulu, yikiɗi a na maini nɵa: Simun na zinani ɓa: Peter. 17Yakob n'ahini Sebedewus gaini Yohana na tawalni, a ɵiɗi zina ɓa: Bowanerges; a dara a muɗa ɓa pinzibani Alaw zi ɓarai gaini, 18Andreya, Filip, Bartimewus, Matewus, Tomas, Yakob n'ahini Alfewus, Tadewus, Simun na Kanan, 19gaini Yudas Iskariyot n'a saŋ edi mini mri lai.
Yesu a za sda aŋ bonu gaini ksalai ɗi?
Mat. 12.22-32; Luk. 11.14-23
20Asakal par e wiyisi aha, Firiɗi ɗai a tapasi pra, haa Yesu gaiɗi ɗaini e kiɗi aŋ simi ɓuk kai. 21Zagalakaini e ɵini labar hanɗa e hili aŋ yimiŋsi, buri e hiini ɓa a na pɗem kai. 22Ɗai zi ɗû wazagai e hilisi, amai a Yeruzalem par, e miɗi: Beelzebul aŋ miɗini, a birga ksalai na ɗa gaini paiɗi ksalai. 23Yesu a yikiɗisi sini a midiɗi war seŋ zi siŋka maini: Satan a sɗa a birga ksalai edi maɵa maɵa ɗa? 24Na ɓa pai te za gaw sini siɗi dama ɗa, pai na te siɗa aŋ ɗiya kai. 25Na ɓa dalam a za gaw sini dama, dalam hanɗa a sɗa aŋ ɗiya kaalai. 26Nɵa ɓa Satan a faka amai sin sini dama, aŋ za gaw sini dama lai ɗa, spakni a sɗa aŋ ɗiya kai, aga a vada edi kadai. 27Na ɓa ɗif a nagga ɗif na gdaŋ avut kai ɗa, a sɗa aŋ niya war dalamni aŋ vurma wazagaini kai, na ɓa a nagaŋ ɓak li ɗa, a sɗa aŋ vurma dalamni.
Tirki na sini Seze sɗik
Mat. 12.31-33; Luk. 12.30
28Jre jre, mu miɗiki ɗai aga e nivi ni burini tuwurɗi paŋ gaini tirkiɗi n'e tirki paŋ lai, 29amma ni n'a tirka Seze sɗik, aga a nava ni kai, tuwur aŋ miɗini haa hlai n'a vada kai n'a vada kai. 30Buri e miɗi gaini ɓa seze na meefeŋ aŋ miɗini.
Emini Yesu gaiɗi tawalakaini
Mat. 12.46-50; Luk. 8.19-21
31Emini gaiɗi tawalakaini e cûsi, e simni anene par, e ɵini pini aŋ yikiŋsi. 32Firiɗi ɗai e gûniŋ amlai gun, ɗai e hilisi e miɗini: Amuku gaiɗi tawalakaiku na maagai gaiɗi na falakai lai e ɗa anene, e ɗa piyuku. 33A waya seŋ a miɗiɗi: Ama te siya ɗa? Gaiɗi tawalakaya ɗa? E ɗi miɗi asiya ɗa? 34A ɵa arni, a tiliɗi nagai n'e simni, n'e gûniŋ azumai a muɗa: Ama gaiɗi tawalakaya e ɗi ɗai hanɗa. 35Buri asiya ɗi paŋ n'a za diri na wiini Alaw, ni a tawala na wus gaiɗi na muni, a ama lai.
Currently Selected:
Markus 3: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
