Markus 15
15
Yesu wuzani Pilatus
Mat. 27.1-2, 11-14; Luk. 23.1-5; Yoh. 18.28-38
1Gorof par cup, paakai n'abakai zi ɓaka gaiɗi n'abakai n'arbaɗi ɗai, gaiɗi ɗai zi ɗû wazagai, gaiɗi ɗai zi ɗûklûti sariya lai, e diŋgi buri e kiti miɗi. Asakal na e niggi Yesu ya, e kiŋ, e siŋ tini Pilatus.
2Pilatus a zilbaŋ, a muɗa: Tuku ku paiɗi Yudiyakai ɗi? A waya seŋ a miɗini: Ku muɗaŋ li. 3Paakai n'abakai zi ɓaka e kisi seŋ viya miɗini. 4Pilatus a zilbaŋ katawai pra: Ku waya seŋ agwi kai zaŋ ɗi? Tala seŋ n'e ɗa e piŋ muduku na ɗa haw! 5Amma Yesu a waya seŋ kir kai; wala hanɗa a bunda Pilatus hiyak.
Sariya zi mri te ko miɗini Yesu
Mat. 26.15-26; Luk. 23.13-25; Yoh. 18.39; 19.16
6Miɗi fet paŋ ɗa, e ɵiɗisi ɗif zi daŋgai ktai suuwa suuwa, ni na ɗai e piyiŋ ɗa. 7Ɗif ktai yikini Barabbas, a na fu warɗi daŋgai gaiɗi ɗai n'e fiki dûrgûzi amai, buri e fiɗi ɗif war dûrgûziɗi su. 8Firiɗi ɗai e hilisi sini Pilatus aŋ zilbiŋ buri a za siɗi maini n'a na zaŋ siɗi kûreɗ-kûreɗ ɵa. 9Pilatus a wiyiɗi seŋ: Ki diri ɓa mu ɵikisi paiɗi Yudiyakai edi ɗi? 10Buri a siɗa ya ɓa, paakai n'abakai zi ɓaka e siŋ war tini aŋ sile 11Amma paakai n'abakai zi ɓaka, e ziɗi piɗi firiɗi ɗai, buri e zilbi ɓa a ɵiɗisi ɗa a Barabbas. 12Pilatus a zilbiɗi: Ni na ki yikiŋ ɓa paiɗi Yudiyakai ɗa, mu zaŋ ɗa maɵa ɗa? 13-14E tiki piɗi e ɗûûli e miɗi: Tûkûŋ amai sini luwuŋ zi dagra. Pilatus a miɗiɗi: Meefeŋ n'a zaŋ ɗa a na wata ɗa? Amma e ɗûûli a suwa pra: Tokoŋ amai sini luwuŋ zi dagra. 15Pilatus a rga warni aŋ va firiyiɗi ɗai amai, a ɵiɗisi Barabbas su, amma a siɗi Yesu aŋ ɵiɓi gaini daɓala, asakal par a siŋɗi buri e tûkûŋ amai sini dagra lai.
Askarai e zi yewere wiini Yesu
Mat. 27.27-31; Yoh. 19.2-3
16Askarai e kiŋ aha warɗi pakatai na wiini Lawaŋ n'e yikiti ɓa: Pretoriyom. A yikiɗisi vokɗi askarai paŋ sini. 17E wiini sapa na mekele n'e ɵiŋɗi siɗi paakai sini, e pitini bogorai n'e hiti gaini hedek miɗini. 18Asakal par, e tiki piɗi e ɵiɓini wuti e miɗi: Mi ɗa ɵuɓuku wuti, paiɗi Yudiyakai. 19E ɵiɓi miɗini gaini vayai, e pi kurnaiɗi azumai aŋ hûrgû azumai wuzani. 20Asakal na e zini yewere ya, e wuti sapai na makalai na sini ɗa edi, e wiini sapani sini.
E tûkû Yesu sini luwuŋ zi dagra
Mat. 27.32-44; Luk. 23.26-43; Yoh. 19.16-24
Asakal par e hili gaini aŋ tûkûŋ amai sini luwuŋ zi dagra 21E yimi ɗif ktai gaini gdaŋ n'a na vuga, a halasi edi a basga par aŋ luba dagrani, yikini Simun na Kirene, n'apini Alekzandre gaini Rufus.
22E ki Yesu war hlai n'e yikiŋ ɓa: Golgota, a dara a muɗa: Hlai zi keɵke na humok. 23E firiyi e sini vin n'e jilniŋ gaini mir, amma Yesu a caŋ kai. 24E tûkûŋ amai sini luwuŋ zi dagra, e ɓûrwi sapani arbaɗi pini wala zi vili kapai e siɗi wala na ɗif paŋ a navaŋ ɗa. 25E tûkûŋ amai sini luwuŋ zi dagra ɗa a za sa ɵeeŋe ta. 26Wala na sariya te ko miɗini burini ɗa, gaini ɗû amai par miɗini maini nɵa:
“Paiɗi Yudiyakai”
27E tuku gorɓolokai sulu amai sini dagra gaini, na ktai war galni na wus par lai, na ktai war galni na muni par lai. 28Kapai ɗû na a muɗa ɓa: E piɵiŋ arbaɗi ɗai na tuwarai ɗa a va amai. 29Nagai n'e vigi ɗa e tirkiŋ, e kikiyi midiɗi e miɗi: Tuku na ku haɗa tempel azumai, ku rgaŋ amai warni mefeŋ hu lai ɗa, 30kora suku tuku dama lai, niyasi azumai sini luwuŋ zi dagra par lai haw kir ka! 31Paakai n'abakai zi ɓaka gaiɗi ɗai zi ɗû wazagai lai, e zini yewere arbaɗi marɗi dama e miɗi: A kurɗa ɗai zamai kir ka, sini ni dama a kurɗa gaini kai ɗe! 32Kristu na paiɗi Izrayel ɗa, a niyasi azumai amai sini dagra par tiyana, kapai tiyi mi tiliŋ, mi yimi lai. Nagai n'e tûkûɗi amai sini luwuŋ zi dagra gaini ɗa e tirkiŋ ɵa lai.
Mrini Yesu
Mat. 27.45-56; Luk. 23.44-49; Yoh. 19.28-30
33Girvudi n'arba par ta ɗa, gegeŋ a za midini afti paŋ, haa sini sa hu ta. 34Sini sa hu ɗa, Yesu a ɗuula gaini wulani amai a muɗa:
Elohi, Elohi Lama sabaktani?
A dara a muɗa: Alaw wiya Alaw wiya, ku hinaŋa edi buri ma ɗa? 35Zamai arbaɗi ɗai n'e ɗi fu woni ɗa, e ɵini hanɗa e miɗi: Tili haw, a na yika Eliyas. 36Ktai arbaɗi a lawa, a tika tipeɵ, a jiibaŋ arni vin na hahayaŋ, a hagaŋ mini vayai a siŋni aŋ ci a muɗa: Hiniŋ mu tuluŋmu haw, na ɓa Eliyas aga a halasi a tikaŋ azumai ɗi ɗa. 37Amma Yesu a ɗuula gaini gdaŋni pra, suŋfani a wa edi.
38Sapa n'a ɓurwa arni hlai na sɗik ɗa a ɓasa amai par haa azumai ta. 39Abaiɗi askarai, na askarai pini miya ɗaw n'aŋsi wuzani par zaw, won hlai n'a tala mrini n'a mra ɗa, a muɗa: Ɗif hanɗa a Ahini Alaw jre jre. 40Falakai zamai e ɗi fu aŋ tilisi edi gaigai par, maiɗi Mariya Magdalene, Mariya n'emini Yakob n'agwi gaiɗi Yoses gaiɗi Salome lai. 41N'e tipisi pini, n'e ɗi ka e zini pini won hlai n'aŋsi a Galileya, gaiɗi na zamai viya n'e hilisi amai a Yeruzalem gaiɗi lai.
Pini Yesu
Mat. 27.57-61; Luk. 23.50-55; Yoh. 19.38-42
42Won hlai na futi te za li koskoi, a mefeŋ na wiini zizinini-si, te yivai na wuzani Sabbat par tar lai ɗa, 43Yosef na Arimateya, ktai n'abai arbaɗi ɗai zi kiti seŋ, n'a na fu aŋ biyiti pai n'Alaw lai, a cosi. A pa arni aŋ hala sini Pilatus aŋ zilba kopoŋni Yesu. 44Pilatus a bunda hiyak, won hlai n'a ɵina ɓa Yesu a mra ya ɗa, a ɵina pini abaiɗi askarai na askarai pini miya ɗaw ɗa, a zilbaŋ ɓa: a mra a yafa bok ɗi? 45Won hlai na abaiɗi askarai a sini labar ya, a sa kopoŋni Yesu wiini Yosef. 46Yosef a wura sapa na muɗukwi, a tikasi Yesu azumai amai sini dagra par, a tikaŋ azumai war waŋ n'e ɓiliŋ sini huwuŋ. Asakal par e likititisi fukuni, e dûgûti mini waŋ ɗa lai. 47Mariya Magdalene gaiɗi Mariya emini Yoses e tili hlai n'e fini Yesu woni.
Currently Selected:
Markus 15: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
