Markus 16
16
Ɵiyi n'amai na wiini Yesu
Mat. 28.1-8; Luk. 24.1-11; Yoh. 20.1-2
1Won hlai na Sabbat a vuga vug, Mariya Magdalene gaiɗi Mariya emini Yakob gaiɗi Salome lai e wûri wazagai zi ɗûgûdi zi lûgûzi tiɗi kapai e hili e ziŋ sini. 2War mefeŋ n'avut na wiini kosko ɗa, e hilisi mini waŋ gorof par, war sarti na futi te diyasi ɗa. 3E miɗi arbaɗi marɗi: N'aga a likititumu funi ɗa edi mini waŋ par ɗa, asiya ɗa? 4Won hlai n'e yimi arɗi amai ɗa, e tiliti, funi n'amai ɗa gaini likiti edi likat.
5Won hlai n'e niyi amlai warni waŋ, e tili gawla ktai gaini simni warni gal na wus ɗa dam, gaini sapa na muɗukwi sini ca, hunai n'abai a yimiɗi. 6A miɗiɗi: Ki hûni kai, ki piyi na ɗa a Yesu na Nazaret, n'e tûkûŋ amai sini dagra kai ɗi? 7Amma ki hili ki miɗiɗi wiiɗi ɗaini zi hitri gaini Peter lai ɓa, a halaɗi a na wuzaki a Galileya, aga ki tiliŋ ɗa woni, maini n'a miɗiŋki ɗa nɵa. 8E niyisi edi warni waŋ par, e liwi haa siɗi paŋ a yima ɵig ɵig ɵig, e hi amai marwai. E miɗi seŋ ktai wiini ɗif kai, buri hunai piɗi ta.
Yesu a siŋka sini arɗi Mariya Magdalene
Yoh. 20.11-18
9Asakal n'a ɵiyasi amai ya, gorof na wiini mefeŋ n'avut na wiini kosko ɗa, a siŋka sini avut arɗi Mariya Magdalene n'a birga ksalai edi midiɗi par muguzak ɗa. 10Te ka labar hanɗa wiiɗi nagai n'e ɗi ka gaini won hlai n'e ɗa war kwimi, war tuwi lai ɗa. 11Won hlai n'e ɵini ɓa, a na karni, ɓa te talaŋsi ya lai ɗa, e diri e yimi seŋ hanɗa kai.
Yesu a siŋka sini arɗi ɗai zi hitri sulu
Luk. 24.13-35
12Asakal hanɗa a siŋka sini arɗi war si zamai, arɗi marɗi zamai sulu, n'e hiliɗi a Yeruzalem par edi sek. 13Nagai lai e wiyisi e si labar wiiɗi marɗi ɗa, amma e diri e yimi kai ɗaai.
Yesu a siŋka sini arɗi na doogo pi ktai
Mat. 28.16-20; Luk. 24.36-49; Yoh. 20.19-23
14Asakal tar, a siŋka sini arɗi na doogo pi ktai war hlai n'e ɗa e simi. A ɓiriɗi gara burini yimi kai na wiiɗi gaini hriŋ na wiiɗi lai. Buri ɓa e yimi piɗi nagai n'e tiliŋ asakalni ɵiyini n'amai ɗa kai. 15Asakal par a miɗiɗi: Hili edi midiɗi yai paŋ, ki ɓiki labar na pɗem sini wazagai zi rgi paŋ, 16ɗif n'a yima, a nava baptisme lai aga a kora; amma ni n'a yima kai, sariya aga te ko miɗini. 17Wazagai zi siŋki na ɗai n'e yimi aga e ziŋ ɗa, a na maini nɵa: War yikiŋa aga e birgi ksalai edi, aga e miɗi gaini meme na hehe, 18aga e yimi wala meefeŋ gaini tiɗi lai, na ɓa e ci wala zi fiɗi ɗai tekeɗeɗi, koo a na wata ɗi, aga a za wala ktai na meefeŋ siɗi kai, aga e tiki tiɗi midiɗi zi veglek, zi veglek aga e zûûli.
Yimi-n'amai na wiini Yesu
Luk. 24.50-53
19Epiɗ-ɗai Yesu, asakal n'a miɗiɗi seŋ hanɗa paŋ, a yima amai war fuŋ-n'Alaw. A sumna warni hlai zi hormo na wiini Alaw. 20E hili edi e ɓiki seŋ warni hlai paŋ, Epiɗ-ɗai a za sda gaiɗi, a siŋka spakni seŋɗi edi gaini wazagai zi siŋki n'a za pini ɗa.
Currently Selected:
Markus 16: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
