Markus 14
14
Ɗai n'e ɵi wuze e piyi yel n'e yimi Yesu gaini
Mat. 26.1-5; Luk. 22.1-2; Yoh. 11.45-53
1Mefeŋ aŋ kai sulu kapai fet na wiiɗi Paska gaini peŋ na is arni kai a za ɗa, paakai n'abakai zi ɓaka e piyi yel n'e yimi Yesu gaini aŋ fiɗiŋ edi. 2Amma e miɗi: Warɗi fet ɗa kai, kapai dûrgûzi a faka amai arbaɗi ɗai kai.
Muni ktai te mini emel miɗini Yesu war Betaniya
Mat. 26.6-13; Luk. 7.36-50; Yoh. 12.1-8
3Won hlai n'a na a Betaniya ahani Simun na dugum ɗa, won hlai n'a na suma ɗa, muni ktai te niyasi amlai siɗi gaiɗi gagazai albastre gaini yitir na gai futini na wûrini caŋ gara lai, te rɗa mini edi, te miŋni miɗini Yesu. 4Zamai arbaɗi e zi hiy, e miɗi: Yitir zi tûûri hanɗa! 5Yitir hanɗa, e wûriŋ fu edi ɗa, a suwa sulai zi arzaŋ miya hu. Farai hanɗa e zini fu na piɗi murgakai gaini a suwa kai ɗi? E zi hiy siɗi gara. 6Amma Yesu a muɗa: Hiniti mak, ki hûwyiti buri maɗa? Te za na ɗa a sɗa na pɗem buriya. 7Buri na murgakai e ɗa arbaki kûreɗ-kûreɗ, hlai na ki diri paŋ ki kiɗi ki zi pɗem siɗi, amma Ta ɗa mu hina fu arbaki ɵa kureɗ kai. 8Wala na te kiɗa aŋ zaŋ ta ɗa, te zaŋ ya. Te halasi aŋ zaŋa yitir na wuzani piŋa sa. 9Jre, mu miɗiki, woɗi paŋ na labar na pɗem aga a ɓaka midiɗi yai paŋ, wala na te kiɗa te zaŋ hanɗa aga a muɗa edi lai, kapai midiki a kɵa gaiɗi.
Yudas a zizina sini aŋ sa Yesu edi
Mat. 26.14-16; Luk. 22.3-6
10Yudas Iskariyot, ktai arbarɗi na doogo pi sulu, a hala siɗi paakai n'abakai zi ɓaka buri a saŋ war tiɗi. 11Won hlai n'e ɵini hanɗa e firiyi, e miɗi ɓa aga e sini farai. A paya futi buri a saŋ war tiɗi.
Yesu a suma simi na wiiɗi fet na wiiɗi Paska gaiɗi ɗaini zi hitri
Mat. 26.17-26; Luk. 22.7-23; Yoh. 13.21-31; 1 Kor. 11.23-26
12War mefeŋ n'avut na wiini fet na wiini peŋ na is arni kai, war mefeŋ na ɗai e fiɗi alini adumai na miɗi fet na wiiɗi Paska, ɗaini zi hitiri e miɗi: Ku firiya ɓa mi hili mi zizini hlai n'aga ku suma simi na miɗi fet na wiiɗi Paska ɗa woni, wata ɗa? 13A ɵina ɗai sulu arbaɗi ɗaini zi hitri par, a miɗiɗi: Hili warni fuŋ n'abai ɗa, woni aga ki nivi gaini ɗif na gaiɗi argini zi yem wulani ta a halasi arki sek, ki hili pini. 14Hlai n'aga a niya aha warni ɗa, ki miɗini wiini epini dalam ɗa ɓa, Api zi hitri ɓa: Dilimi n'aga mu suma ahiɗi adumi na wiiɗi Paska ɗa warɗi gaiɗi ɗaiŋa zi hitri ɗa, t'aŋ wata ɗa? 15Aga a siŋkitiki dilimi n'amai n'amai gaini zizini ta, wazagai na jaaki aŋ sini paŋ aŋ warɗi, aga ki zizini simi na wiiɗi fet hanɗa woni. 16Ɗai zi hitri e hili, e cû warni fuŋ n'abai ɗa, e nivi wazagai paŋ maini na Yesu a miɗiŋɗi nɵa. E zizini simi na wiini Ahiɗi adumi na wiiɗi Paska ɗa lai.
Mat. 26.20-25; Luk. 22.21-23; Yoh. 13.21-26
17Won hlai na futi te za li koskoi, a halasi gaiɗi na doogo pi sulu pini. 18Won hlai n'e simni azumai ca aŋ simi ɗa, Yesu a muɗa: Jre mu miɗiki, ktai arbaki n'a na suma gaya, aga a saŋa edi. 19E tiki piɗi e kwimi, e zilbi ktai ktai paŋ e miɗi: Mu ta ɗi? 20A miɗiɗi: A ktai arbaɗi na doogo pi sulu, Ni n'a na wa tini gaya warni tasa ɗa. 21Ahini ɗif aga a hala maini n'a ɗosi miɗini ɗa nɵa, amma haw burini ɗif n'aga a sa Ahini ɗif edi ɗa, ɗif hanɗa a wa fu edi kai ɗa, pɗem a suwa.
Pi zi tiki na wiini ɓirwini ɓuk
Mat. 26.26-29; Luk. 22.15-20; 1 Kor. 11.23-26
22Won hlai n'e simni aŋ simi, a tika peŋ ktai, a sa tese, a ɓurwaŋ, a siŋɗi a muɗa: Miliŋ, hanɗa a sa. 23Asakal par a tika kup ktai na gaini vin warɗi, a sa tese, a sitiɗi, nagai paŋ e ci warɗi kup hanɗa. 24A miɗiɗi: Hanɗa a felŋa, a fel zi bonu na hehe n'a ma edi buriɗi ɗai viya, 25Aga mu ca siyemni alini luwuŋ zi vin ɗa kir kai, haa sini mefeŋ n'aga mu caŋ zamai warɗi pai n'Alaw.
Yesu a muɗa ɓa, Peter aga a ɓuɓura mini burini
Mat. 26.30-33; Luk. 22.31-34; Yoh. 13.36-38
26Asakal n'e vidi gaini yama zi tese ya, e hili edi siɗi huwuŋ zi luwuŋ olive sek. 27Yesu a miɗiɗi: Aga mu za aŋ wala zi dibi azi buriki paŋ, buri a ɗosi nɵa:
Aga mu fuɗa ɗif zi giɗimi ɗa edi;
adumai aga a hina bar.
28Amma won hlai na mu ɵiya li amai ɗa, aga mu halaɗi wuzaki a Galeliya. 29Peter a miɗini: Na ɓa ku za aŋ wala zi dibini azi buriɗi na paŋ tekeɗeɗi ɗa, aga ku za aŋ wala zi dibini azi buriya ta kai zaŋ. 30Yesu a miɗini: Jre mu muɗuku: Girna haa, war duvuk hanɗa dama, wuzani hlai na yugur a yika azi sulu, aga ku ɓuɓura muku buriya azi hu. 31Amma Peter a siika wuzani sek a muɗa: Koo ɓa mu mra gaiku ɗi, aga mu ɓuɓura ma buriku kai zaŋ. Nagai paŋ e miɗi nɵa lai.
Yesu a siiwa war Getsemane
Mat. 26.36-46; Luk. 22.39-46
32E cû war hlai na yikini ɓa Getsemane, a miɗiɗi wiiɗi ɗaini zi hitri: Simni ka na ca, mu hala mu siiwasi ta. 33A yima Peter gaini Yakob gaini Yohana lai pini, a tika pini a huna, a kwima gara lai. 34A miɗiɗi: suŋfaɗi-agula a kwima haa sini mri ta, ki simni ka na ca, ki simni karki. 35A toro wuzani sek agwi, a hurga azumai midini afti, a siiwa burini hlai hanɗa, a siiwa ɓa: Na ɓa a sɗa aŋ za ɗa, hlai zi gir hanɗa a vuga edi miɗini par. 36A muɗa: Abba, Apa, wala n'a sɗa aŋ za gaiku kai aŋ kai, kup na wiini gir hanɗa ku vugaŋ edi mada par. Amma hinaŋ a za maini na ta mu firiyaŋ ɵa kai, amma maini na tuku ku firiyaŋ ɵa. 37A halasi a niviɗisi weseŋ, nɵa a miɗini wiini Peter: Simun, ku na weseŋ? Ku kiɗa aŋ sumna karku burini ler ɗaw kaw kai! 38Simni karki, siiwi, kapai ki niyi war tanai kai. Seze a kurfuk, amma neŋ-si a muhuruf. 39A yima sini edi aŋ siiwa pra, a muɗa a seŋ n'avut ɗa dama. 40A wayasi katawai, a niviɗisi weseŋ pra, arɗi a yima amai kai, e siɗi seŋ n'e wiyiŋni kai. 41A wayasi azi n'ag'aŋ hu, a miɗiɗi: Sai ki kili ɗa a weseŋ bas, siki amla lai ka; siiwi, ler a cosi li, Ahini ɗif a sa li tiɗi na tuwarai. 42Fiki amai hulumu, ni n'a saŋa edi a cosi ya.
Yimini Yesu
Mat. 26.47-56; Luk. 22.47-53; Yoh. 18.2-12
43Tizaw tar, a ɵa mini maa edi kai, Yudas, ktai n'arbaɗi na doogo pi sulu a halasi gaiɗi ɗai pini viya, gaini kaɵkar gaini amaraŋa lai tiɗi, e ɵiniɗisi e ɗi paakai n'abakai zi ɓaka gaiɗi ɗai zi ɗû wazagai gaiɗi n'abakai n'arbaɗi ɗai lai. 44Ni n'aga a saŋ edi a siɗi wala zi siŋki ktai ɓa: Ni n'aga mu kɵa amai wulani aŋ ɵiɓini wuti ɗa, hanɗa a ni, ki yimiŋ, ki hili gaini, ki giɗimiŋ pɗem. 45Hlai n'e cûsi sini ɗa, a muɗa: Rabbi, a kɵa amai wulani lai. 46Nagai e yimiŋ. 47Ktai arbaɗi n'e ɗa gaini, a rɗa kaɵkarni edi, a bla ɵeŋ na wiini pai n'abai zi ɓaka ɗa, a pirta ɵimani edi.
48Yesu a miɗiɗi: Ki hilisi aŋ yimiŋa gaini kaɵkar gaini amaraŋa maini na ɓa mu gorɓolo ɵa buri maɗa? 49Mefeŋ paŋ mu na fu arbaki kureɗ, aŋ hitra warni tempel, ki yimiŋa kai koo. Amma a za nɵa kapai ɗû a va amai. 50Nagai paŋ e hiniŋ, e pri edi. 51Gawla ktai a hala pini, gaini sapa sini ɵew, ɗai e yimiŋ. 52Amma ni a hina sapani, a pra edi ganala.
Yesu wuzaɗi ɗai zi ɗûklûti sariya
Mat. 26.57-58; Luk. 22.54-55, 63-71; Yoh. 18.13-15
53E ki Yesu wuzani pai n'abai zi ɓaka, paakai n'abakai zi ɓaka paŋ, gaiɗi n'abakai n'e ɵi wuze gaiɗi zi ɗû wazagai ɗa paŋ e diŋgisi. 54Peter a hala pini, amma edi gaigai par blaŋ, haa e cû aha warni dalam na wiini pai n'abai zi ɓaka, aha warɗi pakataini ɗa. A sumna azumai arbaɗi ɗai zi giɗimi na wiini aŋ kopa sini mini afu.
Mat. 26.59-68; Luk. 22.63-71; Yoh. 18.19-24
55Paakai n'abakai zi ɓaka gaiɗi ɗai zi ɗûklûti sariya paŋ, e piyi miɗi ktai n'e piŋ miɗini Yesu kapai e fiɗiŋ edi pini, amma e nivi wala kai. 56Buri viya e miɗi seŋ sini, amma a ɵa pini marni kai. 57Zamai e fikisi amai aŋ miɗi zaida z'eles miɗini maini nɵa: 58Tiyi, mi ɵini mini par ɓa: Aga mu tuura hlai na sɗik n'a zizina gaini tiɗi ɗai hanɗa edi, war mefeŋ hu aga mu rga na zamai, n'a rga gaini tiɗi ɗai kai. 59War hanɗa kaw seŋɗi a ɵa piɗi marɗi kai ɗaai. 60Nɵa pai n'abai zi ɓaka a ɗiya amai arbaɗi zaw a zilba Yesu, a muɗa: Ku muɗa seŋ kai ɗi? Seŋ n'e ɗa e miɗiŋ suku na ɗa, tuku ku muɗa maɵa ɗa? 61A ba mini liyik a waya seŋ kai, pai n'abai zi ɓaka a zilbaŋ pra: Tuku ku Kristu, Ahini Alaw zi ɓiki ɗi? 62Yesu a waya seŋ: Mu ta, mal; tiki aga ki tili Ahini ɗif gaini simni war hlai zi hormo na wiini Alaw zi spak paŋ dam. Aga a halasi warni ɗugul na war hlai n'amai par. 63Nɵa pai n'abai zi ɓaka a ɓasa sapa na sini edi a muɗa: Mu zumu gaiɗi zaidakai zamai ɗa a ma ɗa? 64Ki ɵini tirki n'a tirka Alaw li, ki miɗi maɵa ɗa? Nagai paŋ e kûtini sariya miɗini, e miɗi: A sɗa aŋ nava fiɗi n'edi.
65Zamai e tiki piɗi aŋ pûrfini teenek sini, e biri sapa arni, e ɵiɓiŋ gaini kutupa lai, e miɗini: Za sdaku zi ɗif na mini Alaw haw ɗa? Ɗai zi giɗimi e ɵiɓiŋ gaini pupur lai.
Peter a ɓuɓura mini burini Yesu
Mat. 26.69-75; Luk. 22.56-62; Yoh. 18.17-18, 25-27
66Won hlai na Peter a na fu azumai warɗi pakatai, ktai arbaɗi bagakai na falakai na wiini pai n'abai zi ɓaka te halasi, 67Won hlai na te tala Peter a na kopa sini, te talaŋ te muɗa: Tuku lai ku na fu gaini Yesu na Nazaret. 68Peter a ɓuɓura mini a muɗa: Mu sɗa kai, na ku firiya ku muɗaŋ na ɗa mu sɗa futini kai. 69Bagai te talaŋ, te tika piɗi aŋ muɗa wiiɗi nagai n'e ɗi fu ca ɗa ɓa: A ktai n'arbaɗi par. 70A ɓuɓura mini katawai pra, asakal par agwi, nagai n'e ɗi fu ca ɗa e miɗini pra: A jre, ku ɗif na gaiɗi ɗai hanɗa par, buri tuku lai ku ɗif na Galileya. 71A tika pini a ha wala mini aŋ tusa sini dama a muɗa: Alaw a tikaŋa gir maɗa, na ɓa mu za ɗa a eles ɗa? Mu sɗa ɗif na ki miɗi gaini na ɗa kai. 72War hlai ni dama, yugur a yika azi n'ag'aŋ sulu. Peter miɗini a kɵa gaini seŋ na Yesu a miɗiŋni ɓa: Wuzani hlai na yugur a yika azi sulu ɗa, aga ku ɓuɓura muku buriya azi hu. Nɵa a tika pini a tuwa.
Currently Selected:
Markus 14: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
