Markus 13
13
Ɓilkini tempel gaini wazagai zi siŋki
Mat. 24.1-3; Luk. 21.5-7
1Won hlai n'a na niyasi amlai warni tempel par, ktai arbaɗi ɗaini zi hitri a miɗini: Api zi hitri, tala ali-fuŋ hanɗa haw, tala rgi n'e rgiŋ gaini haw. 2Yesu a waya seŋ a miɗiɗi: Dalamai na ki tiliŋ na paŋ ɗa, ahi-fuŋ ktai n'aga a hina gaini tiki amai midini maini ta n'aga a kɵa azumai kai aŋ kai.
Wazagai zi siŋki n'a siŋka miɗini dibiɗi yai
Mat. 24.4-8; Luk. 21.8-11
3Won hlai n'a sumna amai midiɗi huwuŋ zi luwuŋ olive dam, wuzani tempel ɗa par ɗa, Peter gaini Yakob gaini Yohana gaini Andreya e tiki piɗi e zilbiŋ edi kiiɗi, e miɗi: 4Miɗiyi haw, wazagai hanɗa aga a za ɗa kaswata ɗa? Wala n'aga a siŋkiyi ɓa hanɗa paŋ aga a vada ɗa a maɗa?
5Yesu a tika pini a miɗiɗi: Ki zi hangal kapai ɗif a wiliki edi kai. 6Viya aga e hilisi war yikiŋa aŋ miɗi: Ta mu Ni, aga e wûliɗi ɗai viya edi. 7Won hlai n'aga ki ɵini labarni gaw na gaigai gaini na gop ɗa, ki hûni kai, hanɗa aga a za, amma a dibini hlai kai hai. 8Afti ktai aga a faka amai sini afti na zamai, aftini pai ktai aga a faka amai sini aftini pai na zamai, afti aga a ziriya war hlai zamai zamai, wiyamai aga te za midiɗi yai lai, hanɗa a na maini pi zi tiki na wiini gir na wiini pûkû nɵa.
Mat. 10.17-22; Luk. 21.12-17
9Ki zi hangal buri ɗai aga e siki edi miɗi sariya, aga e ɵiɓiki war sinagogne lai, aga e ɗiyiki wuzaɗi lawaŋai gaiɗi paakai lai buriya, hanɗa aga a za aŋ zaida na siɗi lai. 10Labar na pɗem aga a ɓaka edi sini pinzibaɗi ɗai paŋ haw. 11Won hlai n'aga e kiki aŋ siki edi ɗa, ki giriŋi burini wala n'aga ki miɗiŋ ɗa wuzani hlai kai, amma aga ki miɗi seŋ n'aga a sa siki war hlai ni dama, buri ɓa aga ki miɗi ɗa ki ɗi tiki kai, a seze.
12Tawal aga a sa tawalni edi mini mri, api aga a sa ahini edi lai, aliyagoi aga e fiki amai siɗi tamaiɗi, aga e fiɗiɗi edi lai. 13Ɗai paŋ aga e bili gaw siki burini yikiŋa, amma ni n'a siika ɗa, haa sini dibini, aga a kora.
Gir n'abai
Mat. 24.15-22; Luk. 21.20-24
14Won hlai n'aga ki tili ni n'e yikiŋ ɓa ɓilki n'edi na hihir gaini ɗiyi war hlai n'a sɗa aŋ ɗiya warni kai ɗa, a juva ɓa ɗif n'a ŋa wala ɗa a ɵinaŋ, nɵa nagai n'e ɗa war Yudiya ɗa, a pɗem ɓa e pri amai midini huwuŋ. 15Ni n'a na amai midini daba zi mili ɗa, a pɗem ɓa a niyasi azumai kai, a wayasi aha aŋ tika wala aha war dalamni par kai. 16Ni n'a na edi war vowai ɗa, aga a wayasi aha aŋ mula sapani kaalai. 17Gir gara buriɗi falakai n'e ziyi gaiɗi nagai n'e si fiyaw wiiɗi aliɗi warni mefeŋ hanɗa. 18Ki siiwi buri wala hanɗa aga a za ɗa amsai kai. 19Buri mefeŋ ni ɗa a mefeŋ zi gir, gir na maini hanɗa ɵa ɗa, a za ka duk kai, haa war pi zi tiki n'Alaw a rgiti yai ɗa par haa girna, aga a za pra kir kaalai. 20Na ɓa Epiɗ-ɗai a ɗiya fu mefeŋ gulai kai ɗa, ɗif a sɗa aŋ kora kai. Amma buriɗi zi viri n'edi na wiini ɗa, a ɗiya mefeŋ hanɗa gulai ta.
21Na ɓa a miɗiki ɓa: Tili Kristu an na, zaw aŋsi na, ki yimi pini kai. 22Buri kristukai na jrekai kai gaiɗi ɗai na mini Alaw na jrekai kai lai aga e fikisi amai, aga e zi wazagai zi siŋki gaini zi hiila viya, haa zi viri n'edi maa e diri e wili edi piɗi, a na fu ɓa a sɗa aŋ za ɗa. 23Ki zi hangal, buri mu miɗiki ya.
Gizini Ahini ɗif
Mat. 24.29-31; Luk. 21.25-28
24Amma war mefeŋ ni ɗa, asakalni gir hanɗa par,
futi aga te bunda gegeŋ,
tile aga a za gaglai kai.
25Meeɵek aga a yakasi azumai war hlai n'amai par,
spak n'arbani hlai n'amai ɗa aga a ziriya.
26Nɵa aga e tili Ahini ɗif a halasi warni ɗugul gaini spak n'abai gara gaiɗi abai lai. 27Nɵa aga a ɵiniɗisi ɗai zi ɵeŋ edi, aga a tipiɗisi zi viri n'edi na wiini edi mini koŋɗi yai na puɗu paŋ par, mini koŋni afti ktai par haa sini na zamai ta.
Seŋ zi siŋka maini miɗini luwuŋ Fige
Mat. 24.32-36; Luk. 21.29-33
28Ki hitri seŋ zi siŋka maini sini luwuŋ Fige par, won hlai na ɵimaɗi a bunda li kekefuɗ, a tika pini li aŋ goɗa lai ɗa, ki siɗi ɓa piya te ŋasi gobi. 29Tiki nɵa lai, won hlai n'aga ki tili wazagai hanɗa a za ɗa, yimi ɓa Ahini- ɗif a na gobi, a na mini hlai.
30Jre mu miɗiki Pinziba hanɗa aga a vada edi paŋ kai, haa wazagai hanɗa a za. 31hlai n'amai gaiɗi yai lai aga a vada edi, amma seŋ na wiya aga a vada edi kai zaŋ. 32Mefeŋ ni gaini ler ni ɗa ɗif a sɗaŋ kai, ɗai zi ɵeŋ na war fuŋ-n'Alaw maa e sɗiŋ kai, Ahi maa a sɗaŋ kaalai, sai a sɗaŋ ɗa a Api ktai.
Mat. 25.13-15; Luk. 19.12-13
33Ki zi hangal, ki simni karki, buri tiki ki siɗi mefeŋ ni kai. 34Aga a za maini ɗif ktai n'a hala morkoi, a hina ka sdani tiɗi bagakaini, ɗif paŋ gaini sdani, sdani, a muɗa sini ɗif n'a giɗima magala buri a sumna karni. 35Buri nɵa, ki simni karki, buri ki siɗi mefeŋ n'epini dalam a waisi warni kai, a waisi na ɗa koskoi par ɗi? Duvuk n'arba ɗi? Gorof na yogorai a yika ɗi? Zaw hlai gaini siɗi edi ba ɗi? Ki sɗiŋ kai. 36Kapai won hlai n'a luɓasi midiki, a nivikisi weseŋ kai. 37Na mu miɗiŋki na ɗa, mu muɗaŋ na ɗa wiiɗi ɗai paŋ, ki simni karki.
Currently Selected:
Markus 13: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
