Markus 12
12
Seŋ zi siŋka maini miɗiɗi ɗai zi sɗa na maafanai na war zardeŋ zi vin
Mat. 21.33-46; Luk. 20.9-19
1Yesu a tika pini aŋ muɗa siɗi gaini seŋ zi siŋka maini, a muɗa: Ɗif ktai a za zardeŋ zi luwuŋ zi vin, a gunaŋ azumai gaini ɵaɓ, a zizina hlai n'e cipiɗi ali luwuŋ zi vin warni ta, a rga poriyo warni ɓak lai. Asakal par a sa vowaini tiɗi ɗai zi sɗa ta, a hala wiini a morkoi midini afti zamai. 2Sarti na rûwini alini luwuŋ zi vin a cosi li ɗa, a ɵina bege ktai siɗi ɗai zi sɗa aŋ piyisi ali luwuŋ zi vin tiɗi par. 3E yimiŋ, e ɵiɓiŋ, e ɵiŋsi kadai blaŋ. 4A ɵina bege zamai siɗi pra, e ɵiɓiŋ miɗini, e tikini siyer lai. 5A ɵina ktai pra, e fiɗiŋ, asakal par a ɵina na zamai viya, zamai arbaɗi ɗai ɗa e ɵiɓiɗi, na zamai ɗa e fiɗiɗi edi lai. 6A hina tini ɗa a Ahini n'a daraŋ gara ɗa pal, a ɵinaŋ siɗi asakal war hiini na ɓa, aga e sini hormo wiini Ahiya ɗa. 7Amma ɗai zi sɗa e miɗi arbaɗi marɗi: Hanɗa a ni n'aga a mula bulum ɗa, hulumu fuɗuŋmu edi, kapai bulum ɗa a hina aŋ wiimu. 8E yimiŋ e fiɗiŋ edi, e ɵiŋkiŋ anene duɓani zardeŋ zi luwuŋ zi vin. 9Epini zardeŋ zi luwuŋ zi vin ɗa, aga a za ɗa a ma ɗa? Aga a halasi a fiɗiɗi ɗai zi sɗa ɗa edi, a sa zardeŋ zi luwuŋ zi vin ɗa tiɗi na zamai. 10Ki tili ka ɗû hanɗa duk kai ɗi? N'a muɗa ɓa:
Ahi-fuŋ na ɗai zi rgi dalam e biliŋ edi ɗa,
a bunda aŋ ahi-fuŋ n'a tika war koŋni dalam.
11Hanɗa a na sini Epiɗ-ɗai par,
a wala n'a bundumu hiyak lai.
12E piyi futi aŋ yimiŋ, amma e hûni wuzani firiɗi ɗai buri e siɗi ɓa, a muɗa seŋ zi siŋka maini na ɗa midiɗi. E hiniŋ, e hili wiiɗi.
Tar n'a sa sini Sezar
Mat. 22.15-22; Luk. 20.20-26
13E ɵiniɗi zamai arbaɗi Farisekai gaiɗi ɗai na wiini Herode par lai sini, kapai e yimiŋ war seŋ. 14Nagai e hili sini e miɗini: Api zi hitri, tiyi mi siɗi ɓa, tuku ku ɗif na jre, ku za ɓraw arɗi ɗai kai, ku hitriti futini Alaw ɗa war jre lai. Pini seŋ zi gadai ɗa, sini tar na wiini Sezar ɗa a za, zaw a za kai ɗi?
15A sɗa rhaiɗi ba, a miɗiɗi: Ki tiniŋa buri ma ɗa? Kiŋasi sulai zi arzaŋ ktai mu talaŋ haw. 16E kinisi ktai, a zilbiɗi a muɗa: N'aŋ warni na ɗa a fotoni asiya ɗa? Ɗû n'aŋ miɗini na ɗa a wiini asiya ɗa? E miɗini: A wiini Sezar. 17Nɵa Yesu a miɗiɗi: Ki sini wazagaini Sezar wiini Sezar, wazagaini Alaw, wiini Alaw lai. E bindi hiyak gara burini.
Zilbi na miɗini ɵiyi n'amai
Mat. 22.23-33; Luk. 20.27-38
18Zamai arbaɗi Sadusekai n'e miɗi ɓa: Ɵiyi n'amai aŋ kai ɗa, e hilisi sini Yesu e zilbiŋ e miɗi: 19Api zi hitri, Musus a ɗo siyi maini nɵa: Na ɓa ɗif a mra li, a hiniti ka li munini gaini ahi kai ɗa, tawalni aga a yimiti sini, kapai a zini seyem wiini tawalni n'a mra ɗa. 20Nɵa tawalakaiɗi marɗi e ɗi fu muguzak, n'abai a tikiti muni ɗaw, a mra, a hina seyem kai. 21Na wulani ɗa, a yimiti sini kaai, a mra a hina seyem kai, n'ag'aŋ hu nɵa lai. 22Ktai n'arbaɗi na muguzak n'a hina seyem nɵa aŋ kai, asakalɗi nagai par, muni te mra su lai. 23Won hlai n'e ɵiyisi li amai ɗa, aga te za ɗa aŋ munini asiya ɗa? Buri nagai muguzak paŋ e tikiti aŋ muni paŋ? 24Yesu a waya seŋ siɗi: Ki wili edi na ɗa buri hanɗa, buri ki siɗi ɗû kaalai, ki siɗi spakni Alaw kaalai; 25Buri won hlai n'aga e ɵiyisi amai war mri par ɗa, aga e mili falakai kaalai, falakai e mili maɵagai kaalai. Aga e bindi maiɗi ɗai zi ɵeŋ na war fuŋ-n'Alaw nɵa. 26Amma burini ɵiyi n'amai na wiiɗi ɗai zi mri ɗa, ki tili warni maktuɓ na wiini Musus ɗa kai ɗi? Wala n'Alaw a miɗiŋni won hlai n'a na ɵimaɗi kukuɓ n'a na ya ɗa, a miɗini ɓa: Ta m'Alaw na wiini Abraham, m'Alaw na wiini Isaak, m'Alaw na wiini Yakob nɵa kai ɗi? 27Ni a Alaw na wiiɗi zi mri kai, amma a Alaw na wiiɗi na karɗi, ki wili wili n'abai gara.
Seŋ zi gadai n'abai n'a suwa paŋ
Mat. 22.34-40; Luk. 10.25-28
28Ktai arbaɗi ɗai zi ɗû wazagai a tala sispai n'a na fu arbaɗi gaini wiyini seŋ na gaini futini na Yesu a wiyiŋɗi lai ɗa, a halasi sini a zilbaŋ, a muɗa: Seŋ zi gadai n'abai a suwa paŋ ɗa a na wata ɗa? 29Yesu a waya seŋ a muɗa: N'abai a suwa paŋ ɗa a na ɓa: Izrayel, ki ɵini pɗem, Epiɗ-ɗai Alaw na wimu, Epiɗ-ɗai a ktai. 30Aga ku dara Epiɗ-ɗai Alaw na wiiku gaiɗi agulku paŋ, gaini sunfaɗi-agulku paŋ, gaini siɗiku paŋ gaini gdaŋku paŋ lai. 31Na wulani a na ɓa: Aga ku dara maiku maini suku dama nɵa, gadai zamai n'abai n'a suwa hanɗa aŋ kir kai. 32Ɗif zi ɗû wazagai a miɗini: Api zi hitri, ku muɗa ɓa a na ɗa ktai, na zamai aŋ kai ɗa a jre. 33Na ɓa ɗif a daraŋ gaiɗi agulni paŋ, gaini siɗini paŋ, gaini gdaŋni paŋ lai, a dara maini maini sini dama nɵa lai ɗa, a suwa ɓaka zi yi gaini ɓaka paŋ. 34Won hlai na Yesu a tala ɓa a waya seŋ warɗi futini ɗa, a miɗini: Ku na gaigai gaiɗi pai n'Alaw kai.
Ɗif zamai n'a ɵa de aŋ zilbaŋ ɵa aŋ kir kai.
Zilbi miɗini Kristu ahini David
Mat. 22.41-46; Luk. 20.41-44
35Won hlai na Yesu a na hitra warni tempel ɗa, a tika seŋ a muɗa: Ɗai zi ɗû wazagai ɗa e miɗi ɓa Kristu ɗa, a ahini David ɗa maɵa maɵa ɗa? 36David gaini midini dama a muɗa pini hûgûni seze sɗik ɓa:
Epiɗ-ɗai a muɗa sini EPIƊ-ƊAIŊA,
sumna war galŋa na wus,
haa mu miliɗi gawku azumai pini boburni azuku.
37Na ɓa David gaini midini dama a yikaŋ ɓa Epiɗ-ɗai ɗa, a kiɗa aŋ za aŋ ahini maɵa maɵa ɗa? Firiɗi ɗai e ziɓiri seŋ na wiini gaini futini.
Yesu a muɗa siɗi ɗai zi ɗû wazagai
Mat. 23.1-33; Luk. 20.45-47
38Won hlai n'a na hitriɗi ɗai, a miɗiɗi: Ki giɗimi siki pɗem buriɗi ɗai n'e ɗa ɗû wazagai ɗa, e firiyi e piyi gaini sapa na mogo kai, e firiyi ɓa e ɵiɓiɗi wuti war hlai na ɗai e tipi woni ta ta ɗa lai. 39E firiyi ɗa a hlai n'amai avut amlai warni Sinagogne gaini hlai na wiiɗi ɗai n'abakai, wuzani simi na mini fet ɗa lai. 40Nagai e simi wazagaiɗi falakai na war greŋ ɗa, e siiwi siiwa na mogo kapai ɗai e tiliɗi. Nagai aga e niviti sariya na guma na te suwa paŋ.
Like na wiiɗi muni na war greŋ
Luk. 21.1-4
41A sumna azumai wuzani zunduk n'e mili farai warni par dam, a tiliɗi ɗai e ɗa mili farai azumai warni, ɗai zi farai viya e mili farai warni viya viya. 42Muni na war greŋ na murga ktai te halasi, te mula sulai n'agogoi sulu azumai warni lai, n'a nafa wala ktai kai. 43A yikiɗi ɗaini zi hitri sini a miɗiɗi: Jre, mu miɗiki Muni na war greŋ na murga hanɗa, te sa te sûwiɗi nagai n'e mili farai warni zunduk hanɗa paŋ. 44Buri nagai e si na ɗa burini faraiɗi na viya, amma te sa ɗa pini murgaɗi, a walaɗi n'a na ɗa ta, na te giɗima siɗi gaini ɗa lai.
Currently Selected:
Markus 12: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
