Markus 11
11
Niyini Yesu aha war Yeruzalem
Mat. 21.12-17; Luk. 19.45-46; Yoh. 2.13-17
1Won hlai n'e ɗisi gobi gaiɗi Yeruzalem, siɗi Betfage gaiɗi Betaniya gobi siɗi huwuŋ zi luwuŋ olive ɗa, Yesu, a ɵiniɗi ɗaini zi hitri sulu, 2a miɗiɗi: Hili warni fuŋ n'aŋ wuzaki na ɗa, ki niyi aha tar ɗa aga ki nivi ahini ablehö gaini niggi ɓak, na ɗif a sumna ka miɗini kai pliŋsi, kiŋŋasi. 3Na ɓa ɗif a midiki li ɓa: Ki zi nɵa buri maɗi ɗa? Ki wiyini seŋ ɓa: Epiɗ-ɗai a firiyaŋ, aga a wayaŋɗi tiyana.
4E hili e nivi ahini ablehö gaini niggi anene ɓak ɵimaɗi mini hlai, warɗi futi, e piliŋsi amai. 5Ɗai zamai n'e ɗi fu woni ɗa, e zilbiɗi e miɗiɗi: Ki zi na ɗa a ma ɗa? Ki pli ahini ablehö buri ma ɗa? 6E wiyiɗi seŋ maini na Yesu a miɗiŋɗisi ɗa nɵa, ɗai e hiniɗi e hili gaini lai. 7E kinisi ahini ablehö n'e biri sapaɗi duɓani, Yesu a sumna miɗini. 8Viya e biri sapaɗi azumai warɗi futi wuzani, na zamai e biri ɗa a ɵimaɗi luwuŋ n'e biliŋsi edi basga par. 9Nagai n'e ɗa edi wuzani gaiɗi nagai n'e ɗa asakalni par ɗa, e ɗûûli e miɗi:
Hozana!
Hozana!
Kol sini Ni n'a na halasi war yikini Epiɗ-ɗai.
10Kol siɗi pai na te na halasi,
siɗi pai na wiini David n'apumu,
Hozana war hlai na haa amai.
11Yesu a niya aha warɗi Yeruzalem, amlai warni tempel, won hlai n'a tala wazagai ɗa paŋ li, hlai ɗe a vuga vig lai ɗa, a niyasi edi a Betaniya gaiɗi na doogo pi sulu.
Luwuŋ Fige na, ali tini kai
Mat. 21.18-21
12Dawaini, won hlai n'e niyisi a Betaniya par ɗa, wiyamai te zaŋ. 13Won hlai n'a tala luwuŋ Fige edi gaigai par gaini gûɗi ɗa, a hala sini aŋ talaŋ, ablaŋtaŋkai a nava ali sini ɗi ɗa. Amma won hlai n'a co sini ɗa, a nava ɗa a sugoi kadai, buri ɓa a sarti na wiini luwuŋ Fige zi wi ɗa kai. 14Nɵa a muɗa sini luwuŋ Fige: ɗif aga a suma aliku kir kai gamai; ɗaini zi hitri e ɵini ba.
Yesu a birgiɗi ɗai zi cakala amlai warni tempel par
Mat. 21.12-17; Luk. 19.45-48; Yoh. 2.13-22
15E cû a Yeruzalem, won hlai n'a niya amlai warni tempel ɗa, a tika pini aŋ birgiɗi nagai n'e cikili wazagai edi gaiɗi nagai n'e wûri wazagai amlai warni tempel ɗa lai edi, a hogo tabel na wiiɗi ɗai zi bindi farai ɗa azumai, gaini tubla na wiiɗi ɗai zi cikili dere ɗa lai. 16A hina ɗif aŋ tika wala tini ɗaw, aŋ vuga gaini amlai warni tempel kai. 17A hitriɗi a muɗa: Aŋ gaini ɗû ɓa:
Dalamŋa aga a yika ɓa: Dalam zi siiwa buriɗi ɗai paŋ,
amma tiki ki bindiŋ aŋ waŋ na wiiɗi gorɓolokai.
18Paakai n'abakai zi ɓaka gaiɗi ɗai zi ɗû wazagai e ɵini hanɗa e piyi futi buri e fiɗiŋ edi. Amma hunai piɗi wuzani ta, buri ɓa firiɗi ɗai paŋ e bindi hiyak burini hitrini. 19Futi koskoi, Yesu a niya edi war fuŋ n'abai ɗa par.
Luwuŋ Fige na gaini siiti: yimi gaini siiwa
Mat. 21.16-22
20Dawai-par won hlai n'e ɗa vigi ɗa, ɗai zi hitri e tili luwuŋ Fige ɗa gaini siiti siyat, haa azumai sini sirdaini ta. 21Peter miɗini a kɵa gaini wala n'a za ɗa, a miɗini: Rabbi tala haw, luwuŋ Fige na ku tuusaŋ ɗa a siita li. 22-23Yesu a miɗiɗi: Yimi war Alaw. Jre mu miɗiki, ni n'aga a muɗa siɗi huwuŋ hanɗa ɓa: Hurɗasi woni par, hala ɵiŋka suku agoɗom war yem-ra n'abai, gaini giriŋi warɗi agulni kai, amma a yima ɓa wala n'a muɗaŋ ɗa aga a za ɗa, hanɗa aga a za lai. 24Buri nɵa, mu miɗiki Wala paŋ na ki zilbiŋ war siiwa ɗa, yimi ɓa ki niviŋ ya, hanɗa aga a za lai.
25Won hlai na ki hili li amai aŋ siiwi, na ɓa seŋ a na arbaki gaini ɗif ɗa, ki hiniŋni, kapai epiki na war fuŋ-n'Alaw a hiniki meefeŋki lai. 26Amma na ɓa, ki hiniŋni kai ɗa, Epiki na war fuŋ-n'Alaw aga a hiniki meefeŋki kaalai.
Ɗai e zilbi siɗi miɗini spakni Yesu
Mat. 21.23-27; Luk. 20.1-8
27E wiyisi a Yeruzalem, won hlai n'a na guna warni tempel ɗa, paakai n'abakai zi ɓaka, ɗai zi ɗû wazagai gaiɗi ɗai n'abakai n'arbaɗi ɗai lai, e hilisi sini. 28E zilbiŋ ɓa: Ku za na ɗa gaini spak na maɵa ɗa? Na a suku spak aŋ za hanɗa asiya ɗa? 29Yesu a miɗiɗi: Aga mu siki zilbi ktai pal, ki wiyiŋa seŋ pini, kapai mu siŋkiki spak na mu za gaini ɗa. 30Baptisme na wiini Yohana ɗa, a halasi amai par zaw, a na siɗi ɗai par ɗi? Wiyiŋa seŋ. 31E kitiŋ arbaɗi marɗi haa e miɗi: Na ɓa mu muɗumu li ɓa: A na amai par ɗa, aga a muɗumu ɓa: Tiki ki yimi pini kai buri ma ɗa? 32Na ɓa, mu muɗumu li ɓa: A na siɗi ɗai par, firiɗi ɗai aga e hunumu kaalai, buri paŋ e yimi ɓa Yohana ɗa a ɗif na mini Alaw jre. 33Nɵa, e wiyi seŋ wiini Yesu, e miɗi: Mi siɗi kai. Yesu a miɗiɗi: Ta ɗe, mu siŋkiki spak na mu za gaini ɗa kaalai.
Currently Selected:
Markus 11: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
