Matewus 21
21
Yesu a niya aha warɗi Yeruzalem war rɗi n'amai
Mark. 11.1-10; Luk. 19.28-48; Yoh. 12.12-19
1Won hlai n'e ŋi gobi aha siɗi Yeruzalem, e cûsi a Betfage gobi siɗi huwuŋ zi luwuŋ olive ɗa, a ɵiniɗi ɗaini zi hitri sulu 2a miɗiɗi: hili war fuŋ n'aŋ wuzaki na ɗa, aga ki niviti ka ablehoi gaini niggi, ahiɗi gaiɗi lai, ki piliŋsi, ki kiŋŋasi. 3Na ɓa ɗif a midiki seŋ li ɗa, ki wiyini seŋ ɓa: Epiɗ-ɗai a firiyaŋ, aga a hiniŋkisi lai. 4Hanɗa a za kapai wala n'a muɗa mini ɗif na mini Alaw aga a va amai, won hlai n'a muɗa ɓa:
5Miɗiɗi wiiɗi ɗai na Siyon ɓa:
Paiku a na halasi suku, a hangal gara, a sumna miɗiɗi ablehoi,
midini ahini ablehö.
6Ɗai zi hitri e hili, e zi maini na Yesu a miɗiŋɗi nɵa. 7E kitinisi ablehoi gaini ahini ablehö ɗa, e biri sapaɗi duɓani, a sumna miɗini. 8Abaini firiɗi ɗai ɗa e biri sapaɗi azumai warɗi futi, zamai e ɗûkûli ɵimaɗi luwaŋai e biriŋ azumai warɗi futi. 9Firiɗi ɗai zamai e hili edi wuzani, na zamai e hinisi askalni par lai, e ɗûûli e miɗi:
Hozana sini Ahini David,
Kol sini Ni n'a halasi war yikini Epiɗ-ɗai,
Hozana war hlai na haa amai.
10Won hlai n'a niya aha warɗi Yeruzalem ɗa, fuŋ n'abai paŋ a muguza, ɗai e zilbi ɓa: hanɗa asiya ɗa? 11Firiɗi ɗai e miɗi: hanɗa a Yesu, ɗif na mini Alaw na Nazaret na Galileya par.
Yesu a birgiɗi ɗai zi cakala edi war tempel par
Mark. 11.15-16; Luk. 19.45-48; Yoh. 2.13-22
12Yesu a niya amlai warni tempel, a birgiɗisi nagai n'e cikili wazagai edi woni par gaiɗi nagai n'e wûri wazagai ɗa lai. Tabelɗi ɗai zi bindi farai gaini tubla na wiiɗi ɗai n'e cikili edi paŋ a pokoŋ azumai. 13A miɗiɗi: ɗû a ɗosi nɵa: Dalamŋa aga a yika ɓa: Dalam zi siiwi, amma tiki ki bindiŋ aŋ waŋ na wiiɗi gorɓolokai. 14Ɗai na malvanai gaiɗi na daŋlaŋai e hilisi sini war tempel a zûûliɗi lai. 15Amma paakai n'abakai zi ɓaka gaiɗi ɗai zi ɗû wazagai, won hlai n'e tili wazagai n'abakai n'a zaŋ ɗa, gaiɗi aliyagoi n'e ɗûûli amlai warni tempel ɓa: hozana, sini ahini David ɗa lai ɗa, e zi hiy, 16e miɗini: ku ɵina seŋ na nagai e ɗa miɗiŋ ɗa tiɓ ɗi? Yesu a waya seŋ a muɗa: Nkam, ki tili ka seŋ hanɗa war ɗû duk kai ɗi, n'a muɗa ɓa:
War miɗi aliyagoi n'agogoi gaiɗi akoɗokokai par lai, ku zizina yama zi kol buriku.
17A hiniɗi, a hala edi war fuŋ n'abai ɗa par, a hala a Betaniya a faana woni.
Luwuŋ Fige na Yesu a tuusaŋ
Mark. 11.12-14, 20-25
18Dawai par, won hlai n'a na niya aha war fuŋ n'abai ɗa sek ɗa, wiyamai te yimaŋ. 19A tala luwuŋ Fige ɵimaɗi futi, a hala sini amma a nava ali tini kai, sai a sugoini kadai. A muɗa sini maini nɵa: Aga ku wa ali kir kai gamai. Tizaw tar, luwuŋ Fige ɗa a siita. 20Won hlai na ɗai zi hitri e tili hanɗa, e bindi hiyak e miɗi: Luwuŋ Fige hanɗa a siita tizaw nɵa maɵa maɵa ɗa? 21Yesu a miɗiɗi, jre mu miɗiki, ɓa yimiki a na, na ɓa ki giriŋi kaalai ɗa, aga ki zi ɗa a wala n'a za sini luwuŋ Fige hanɗa kiini kai, koo ɓa ki miɗi siɗi huwuŋ hanɗa, rɗa amai, ɵiŋka suku war yem-ra n'abai aga a za nɵa lai. 22Wazagai paŋ na ki siiwiŋ gaini yimi ɗa, aga a sa siki.
Zilbi miɗini spakni Yesu
Mark. 11.27-33; Luk. 20.1-8
23A hala amlai warni tempel, won hlai n'a na hitra, paakai n'abakai zi ɓaka gaiɗi n'abakai n'arbaɗi ɗai, e hili sini e zilbiŋ e miɗi: ku za na ɗa gaini spak na maɵa maɵa ɗa? N'a suku spak hanɗa asiya ɗa? 24Yesu a waya seŋ a miɗiɗi: Ta lai mu zilbiki zilbi ktai bas, na ɓa ki wiyiŋa seŋ li ɗa, aga mu siŋkiki spak na mu za gaini ɗa. 25Baptisme na wiini Yohana ɗa, a na sini asiya par ɗa? A na amai par zaw, a na siɗi ɗai par ɗi? E hiini warɗi dama e miɗi: Mu muɗumu li ɓa: Amai par ɗa, aga a muɗumu: tiki ki yimi pini kai ɗa buri maɗa? 26Na ɓa mu muɗumu li ɓa, a na siɗi ɗai par ɗa, mu zumu hangal gaiɗi ɗai lai, buri ɗai paŋ e yimi Yohana aŋ ɗif na mini Alaw jre jre. 27Nagai e wiyi seŋ sini Yesu e miɗi: tiyi mi siɗi hanɗa kai. Ni lai a waya seŋ a miɗiɗi: Ta lai, spak na mu za gaini ɗa, mu sɗa futini kai, aga mu miɗiŋki kaalai.
Seŋ zi siŋka maini midiɗi ali na maɵagai na sulu
28Ki hiini maɵa ɗa? Ɗif ktai alini na maɵagai sulu, a miɗini wiini na ktai ɓa: Ahiya, girna ku hala ku za sda war vowai zi luwuŋ zi vin ɗa. 29Amma ahini a wiyini seŋ a muɗa: Mu dara kai. Asakal par agwi a hiina haa a faka a hala. 30A hala sin na ktai ɗa, a miɗini ɵa lai, ahini ni ɗa a waya seŋ a muɗa: A na ɵa epin-geza, amma a hala woni kai. 31Arbaɗi na sulu ɗa, n'a za dirini epini a na wata ɗa? E miɗi: a na avut ɗa. Yesu a miɗiɗi: Jre mu miɗiki Zi tiri kosko gaiɗi falakai zi zawar aga e niyi warɗi paini fuŋ-n'Alaw wuzaki. 32Buri Yohana a halasi siki gaiɗi futi na jre-ɗikat, amma ki yimi pini kai, ɗai zi tiri kosko gaiɗi falakai zi zawar e yimi pini, amma tiki won hlai na ki tili hanɗa ki bindi hiiniki kaalai, ki yimi pini kaalai.
Seŋ zi siŋka maini midiɗi ɗai zi sɗa na maafanai na war zardeŋ zi luwuŋ zi vin
Mark. 12.1-12; Luk. 20.9-19
33Ɵini seŋ zi siŋka maini na zamai hanɗa pra. Epin-dalam ktai a za zardeŋ zi luwuŋ zi vin, a tika ɵaɓ sini, a zizina hlai n'e cipiɗi alini luwuŋ zi vin warni ta, a rga poriyo na mogo warni lai. Asakal par a hina vowaini tiɗi ɗai zi sda, a hala a morkoi midini afti zamai. 34War sarti na rûwini ali luwuŋ zi vin ɗa a ŋasi gobi ɗa, a ɵiniɗi bagakaini siɗi ɗaini zi sɗa aŋ piyisi alini luwuŋ zi vin. 35Amma ɗai zi sɗa e yimiɗi bagakaini, na ktai e ɵiɓiŋ, na ktai e fiɗiŋ, na ktai e ɵiŋkiŋ gaini kiryit lai. 36A ɵina vok zamai na wiiɗi bagakaini, viya e sûwi n'avut ɗa, ɗai zi sɗa e ziɗi ɵa pra. 37Asakal par a ɵina ahini siɗi gaini hiini na ɓa: Aga e sini hormo wiini ahiya ɗa. 38Amma won hlai na ɗai zi sɗa na war zardeŋ zi luwuŋ zi vin e tili ahini ɗa, e miɗi arbaɗi marɗi: Hanɗa a ni n'aga a mula bulum ɗa, hulumu, fuɗuŋmu edi, kapai bulumni a hina tumu. 39E yimiŋ e ɵiŋkiŋ anene warni zardeŋ zi luwuŋ zi vin ɗa par, e fiɗiŋ edi. 40Won hlai na epini zardeŋ zi luwuŋ zi vin a halasi li ɗa, aga a ziɗi ɗai zi sɗa hanɗa maɵa maɵa ɗa? 41E miɗini: Ɗai na maafanai hanɗa, aga a vidiɗi edi war gir n'abai, aga a sa zardeŋ zi luwuŋ zi vin ɗa tiɗi ɗai zi sɗa na zamai, n'aga e sini ali luwuŋ zi vin war sartini sartini. 42Yesu a miɗiɗi: Ki tili war ɗû duk kai ɗi? Ɗû a muɗa:
Ahi-fuŋ na ɗai zi rgi dalam e biliŋ edi ɗa,
a bunda aŋ ahi-fuŋ n'a tika war koŋni dalam.
Hanɗa a na sini Epiɗ-ɗai par.
A wala n'a bundumu hiyak.
43Buri nɵa mu miɗiki, paini fuŋ Alaw aga te tika edi tiki par, te sa sini pinziba na zamai na aga a wa ali. 44Asiya asiya paŋ n'a kɵa li miɗini ahi-fuŋ hanɗa, a haɗa, amma ni n'ahi-fuŋ a kɵa li miɗini ɗa, aga saraŋ edi. 45Asakal n'e ɵini seŋ zi siŋka maini ya ɗa, paakai n'abakai zi ɓaka gaiɗi Farisekai e siɗi ɓa a muɗa na ɗa gaiɗi. 46E piyi aŋ yimiŋ, amma e hûni wuzaɗi firiɗi ɗai ɗa, buri nagai e yimiŋ ɗa ɓa a ɗif na mini Alaw.
Currently Selected:
Matewus 21: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
