Matewus 17
17
Sini Yesu a bunda amai miɗiɗi huwuŋ
1Mefeŋ ɵaara asakal hanɗa Yesu a yima Peter gaini Yakob gaini Yohana na tawalni pini, a kiɗi gaini amai midiɗi huwuŋ na mugwi edi war baŋa. 2Sini a bunda wuzaɗi, arni a ŋala maiɗi futi nɵa, sapani a bunda muɗukwi tal maini gaglai nɵa. 3Tili, Musus gaini Eliyas e siŋki siɗi arɗi e ɗa hiɗi kalaŋ gaini. 4Peter a tika seŋ a muɗa sin Yesu, Epin-geza simni na won na a pɗem burimu, ɓa ku dara aga mu zizina dugo hu, na ktai buriku, ktai burini Musus, ktai burini Eliyas. 5Won hlai n'a na muɗa hai, tili, ɗugul na gaglai a halasi a dûgûɗi, wule a halasi edi warni ɗugul par a muɗa: Hanɗa a Ahiya zi diri gara, ni a n'ara pɗem, ɵini pini. 6Won hlai na ɗai zi hitri e ɵini hanɗa, e yiki azumai e pi midiɗi azumai e hûni gara. 7Yesu a halasi a tetemiɗi a muɗa, fiki amai, ki hûni kai. 8Won hlai n'e yimi arɗi amai e tili ɗif zamai kai, sai a Yesu kiini. 9Won hlai n'e niyisi azumai midiɗi huwuŋ par, Yesu a gidiɗi a muɗa, ki miɗini wiini ɗif miɗini wala zi siŋki hanɗa kai, haa Ahini ɗif a ɵiyasi amai war mri par. 10Ɗai zi hitri e zilbiŋ e miɗi, buri ma ɗa ɗai zi ɗû wazagai e miɗi ɓa Eliyas aga a halasi avut? 11A waya seŋ a muɗa, jre, Eliyas aga a zizina wazagai paŋ woɗi futini. 12Amma mu miɗiki buri a halasi ya, e siɗiŋ kai, amma e zi sini paŋ maini e diri nɵa. Ahini ɗif aga a siɗa gir tiɗi maini nɵa lai. 13Won hlai ni, ɗai zi hitri e siɗi ya, buri a miɗiɗi miɗini Yohana zi Baptisme.
Yesu a zuula ahiyogwi na gaini ksalai na hihir
Mark. 6.14-26; Luk. 6.37-43
14Won hlai n'e gizi sin firiɗi ɗai, ɗif ktai a halasi sini, a hurga azumai wuzani a muɗa, 15Epiɗ-ɗai, hiina haw burini ahiya, na dûûli n'a bunda pin tile a zaŋ, a sɗa gir gara, buri azi viya, a kɵa arni afu, azi viya arni yem lai. 16Mu kaŋsi siɗi ɗaiku zi hitri, amma e kiɗi aŋ bindiŋ pɗem kai. 17Yesu a waya seŋ a muɗa, tiki pinziba na gaini yimi kai na hraŋai, aga mu sumna gaiki ɵa haa kaswata ɗa? Aga mu libiki ɵa haa kaswata ɗa? Kiŋsi sa na. 18Yesu a ɓaraŋ, ksalai a niyasi edi sini par, ahiyogwi a bunda pɗem war ler ni dama. 19Won hlai ni ɗai zi hitri e hilisi sin Yesu war ŋoyai e miɗi, tiyi mi kiɗi aŋ birgiŋ edi kai buri ma ɗa? 20Yesu a miɗiɗi, buri yimi kai na wiiki, buri jre mu miɗiki, ɓa yimiki a na fu maini alini seneve nɵa, aga ki miɗi siɗi huwuŋ hanɗa, buri te zogoɗi won na par edi na, aga te zogo lai. Wala n'aga ki kiɗi aŋ ziŋ kai aŋ kai. 21Amma ksalai na maini hanɗa nɵa a niyasi edi ɗa, sai gaini siiwi, gaiɗi sai lai.
Yesu a muɗa edi pra miɗini mrini na wuzani
Mark. 6.30-32; Luk. 6.43-45
22Won hlai n'e ɗa piyi war Galileya Yesu a miɗiɗi, Ahini ɗif aga a sa edi tiɗi ɗai, 23aga e fiɗiŋ edi, war mefeŋ n'ag'aŋ hu aga a ɵiya amai. Nagai e kwimi gara.
Virgini tarni tempel
24Won hlai n'e gisi a Kapernahum, nagai n'e yimi tar na wiini tempel e hilisi sin Peter e miɗi, Api-zi-hitri na wiiki a sa tar na wiini tempel kai ɗi? 25A muɗa, a sa. Won hlai n'a niya aha warni dalam, Yesu a rafaŋ a miɗini, ku hiina maɵa ɗa, Simun? Paakai na midiɗi yai e yimi tar tin asiya ɗa? Tiɗi aliɗi dama zaw tiɗi ɗai n'edi par ɗi? 26A muɗa, tiɗi n'edi par ɗa. Yesu a miɗini, nɵa aliɗi e si tar kai kai ɗi. 27Amma kapai mu bundumu arɗi aŋ wala zi dibi azi kai ɗa, hala war yem-ra-n'abai, ku ɵa zuwti agoɗom, ku yimasi hilif na ku yimaŋ avut ɗa amai. Ku mala mini amai, a aga ku nava stater ktai mini, ku tikaŋsi ku siŋɗi buriya ta, gaiku tuku lai.
Currently Selected:
Matewus 17: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
