Matewus 16
16
Farisekai gaiɗi Sadusekai e piyi wala zi siŋki
1Farisekai gaiɗi Sadusekai e hilisi sini buri e tiniŋ e siiwiŋ buri a siŋkiɗi wala zi siŋki na war hlai n'amai par. 2A waya seŋ siɗi a miɗiɗi won hlai na futi-koskoi te za li ki miɗi, hlai aga a za pɗem buri ɗugul a na mekele. 3Dawai par lai, girna hlai aga a za meefeŋ, buri ɗugul a na mekele, hlai guri lai. Tiki ki siɗi aŋ tili wala zi siŋki na wiini hlai n'amai amma wala zi siŋki na wiini hlai ki siɗi pini edi kai maɵa ɗa. 4Pinziba na meefeŋ, na jre kai, a paiya wala zi siŋki. Wala zi siŋki aga a sa siɗi kai, sai wala zi siŋki na wiini Yonas. A hiniɗi a hala wiini.
Is na wiiɗi Farisekai gaiɗi Sadusekai
Mark. 8.14-23
5Won hlai na ɗaini zi hitri e hili anene kata, midiɗi a wula, e mili wala zi simi tiɗi. 6Yesu a miɗiɗi, ki zi hangal, ki giɗimi siki burini is na wiiɗi Farisekai gaiɗi Sadusekai. 7E hiini warɗi dama e miɗi: a muɗa na ɗa buri ɓa mu mulumusi peŋ tumu kai ɗa. 8Won hlai na Yesu a sɗa hanɗa a miɗiɗi tiki gaini yimi n'agwi ki hiini warki dama ɓa mu muɗa na ɗa buri na ɓa ki milisi peŋ kai ɗa buri ma ɗa? 9Ki siɗi kai hai ɗi, a kɵa midiki kai ɗi? Peŋ na ɵim n'a sa siɗi ɗai na dubu ɵim, dologo gama ɗa, na ki miliŋ amai ɗa? 10Zaw peŋ na muguzak n'a sa siɗi ɗai na dubu puɗu, dologo gama ɗa, na ki miliŋ amai ɗa? 11Buri mu miɗiki burini peŋ kai, ki kiɗi aŋ ɵini hanɗa kai ɗi? Amma ki giɗimi siki pɗem burini is na wiiɗi Farisekai gaiɗi Sadusekai. 12Won hlai ni nagai e ɵiniŋ daaba ɓa, a miɗiɗi na ɗa ɓa aga e giɗimi siɗi burini is n'arni peŋ ɗa kai, amma burini hitri na wiiɗi Farisekai gaiɗi Sadusekai.
Peter a muɗa edi miɗini Yesu ɓa ni a Kristu
Mark. 8.27-30; Luk. 6.18-21
13Won hlai na Yesu a halasi midini afti na ɵimaɗi Sezareya Filipi, a zilbiɗi ɗaini zi hitri a muɗa, ɗai e miɗi ɓa Ahini ɗif ni asiya ɗa? 14E miɗini zamai e miɗi ɓa a Yohana zi Baptisme, zamai ɓa a Eliyas, zamai pra ɓa Yeremiyas a ktai arbaɗi ɗai na min Alaw. 15A miɗiɗi, amma tiki ki miɗi ɓa ta mu siya ɗa? 16Simun Peter a waya seŋ a muɗa, tuku ku Kristu, Ahini Alaw na karni. 17Yesu a waya seŋ a miɗini, ɵeɗ muduku, Simun ahini Yonas, buri neŋ-si gaini fel a suŋkuku hanɗa kai, amma Apa na war fuŋ-n'Alaw. 18Mu muɗuku tuku ku Peter, miɗini huwuŋ hanɗa aga mu rga tipi na wiya, min magalani hlai zi mri aga a nava spak miɗini kai. 19Aga mu suku kle na wiiɗi paini fuŋ-n'Alaw, wala na ku naggaŋ midiɗi yai a nagga li war fuŋ-n'Alaw, wala na ku plaŋ edi midiɗi yai, a pela edi li war fuŋ-n'Alaw. 20Won hlai ni a gidiɗi ɗaini zi hitri buri e miɗini wiini ɗif ɓa ni a Kristu kai.
Yesu a muɗa edi miɗini mrini na wuzani
Mark. 8.31—9.1; Luk. 9.22-27
21Won hlai ni par Yesu a tika pini aŋ muɗa edi siɗi ɗaini zi hitri buri ni aga a hala a Yeruzalem, n'abakai gaiɗi paakai n'abakai zi ɓaka gaiɗi ɗai zi ɗû wazagai aga e zini gir gara, aga e fiɗiŋ lai, amma war mefeŋ n'ag'aŋ hu aga a ɵiya amai. 22Amma Peter a yimaŋ edi kiini a tika pini aŋ gadaŋ a muɗa, Alaw a kurɗuku edi Epiɗ-ɗai, hanɗa a za suku kai zaŋ. 23Amma a bunda arni a muɗa sin Peter, ku waya duɓa, Satan, buri tuku ku wala zi dibi buriya, buri tuku ku hiina maini Alaw ɵa kai, amma maiɗi ɗai nɵa. 24Yesu a miɗiɗi wiiɗi ɗaini zi hitri, na ɓa ɗif a dara a hala pa, sai a ɗala sini dama, a tika dagrani amai aŋ hala pa. 25Asiya ɗi paŋ n'a dara a kora suŋfani, aga a baŋ, amma asiya ɗi paŋ n'a ba suŋfani edi buriya, aga a navaŋ. 26Na ɓa ɗif a niviti yai ɗa paŋ, amma a ba suŋfani ɗa, pɗem na burini aŋ wata ɗa? Ɗif a sɗa aŋ bunda suŋfani gaini a ma ɗa? 27Buri Ahini ɗif aga a halasi warɗi abai na wiini Epini gaiɗi ɗaini zi ɵeŋ na war fuŋ-n'Alaw pini, won hlai ni aga a sa sini asiya, asiya paŋ pin sdani, pin sdani. 28Jre midiki, zamai n'arbaɗi n'e ɗi won na aga e titimi mri kai, haa e tili Ahini ɗif a halasi warɗi paini.
Currently Selected:
Matewus 16: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
