Matewus 15
15
1Won hlai ni Farisekai gaiɗi ɗai zi ɗû wazagai na war Yeruzalem par e hilisi sin Yesu e miɗi, 2ɗaiku zi hitri e hini deɗi tamaiɗi edi buri ma ɗa? E mi tiɗi kai won hlai n'e simi ɗa. 3Amma a waya seŋ a miɗiɗi, tiki ki hini seŋ zi gadai na wiini Alaw edi burini seŋni deki buri ma ɗa? 4Buri Alaw a muɗa: Apuku gaiɗi amuku ku kûlûɗi amai, ɗif n'a muɗa meefeŋ sini epini zaw siɗi emini, a nava fiɗi n'edi. 5Amma tiki ki miɗi ɓa, ni n'a muɗa sin epini zaw siɗi emini ɓa, wala na ma hiina ɓa mu zina puku gaini ɗa, mu saŋ wiini tempel ta ɗa, ɗif ni tumuŋ miɗini sini epini gaiɗi emini kai. 6Nɵa ki bindi, seŋ zi gadai na wiini Alaw aŋ wala kadai burini deki. 7Tiki zi rhai, Esaya a muɗa seŋ na woɗi futini buriki, won hlai n'a muɗa ɓa:
8Ɗai hanɗa e kûlûŋa gaini miɗi,
9amma agulɗi a na gaigai gaya.
E hûrgû azumai wuza aŋ siiwiŋa gaini miɗi n'amai kadai,
e hitri edi a seŋ zi gadai na wiiɗi ɗai.
Wazagai n'a bunda ɗif hihir
Mark. 7.14-23
10A yika firiɗi ɗai sini a miɗiɗi, ki ɵini hanɗa, ki ɵini ezini edi lai. 11Wala n'a niya warni miy a bunda ɗif hihir kai, amma wala n'a niyasi edi war miy par, hanɗa a bunda ɗif hihir. 12Won hlai ni ɗaini zi hitri e hilisi sini e miɗini, ku siɗa ɓa seŋ na ku muɗaŋ hanɗa a bunda aŋ wala zi dibi azi buriɗi Farisekai ku sɗa ɵa ya ɗi? 13Amma a waiya a muɗa, wala zi pi na ma ɗi paŋ n'Apa na war fuŋ-n'Alaw a paŋ kai ɗa, aga a rɗa amai gaini sirdaini. 14Hiniɗi mak, e ɗi ɗai na malvanai n'e ɵi wuzaɗi na malvanai, amma na ɓa ɗif na melveŋ a ɵa wuzani maini na melveŋ lai ɗa, gai suliɗi paŋ aga e kɵi warni waŋ. 15Peter a waya seŋ a miɗini, miɗiyi seŋ zi siŋka maini hanɗa edi gaglai haw ɗa. 16A wiyiɗi seŋ: tiki lai ki ɗa gaini yel kai ɗi? 17Ki ɵini kai ɗi, buri wala paŋ n'a niya warni miy, a hala warni aru, asakal par a niyasi edi war si par a na ɵa kai ɗi? 18Amma wala n'a niya edi warni miy par, a halasi warɗi agul par, hanɗa a ni n'a bunda ɗif hihir. 19Buri warɗi agul par a halasi a hiini na meefeŋ fiɗini humok, maɵara, wala na hihir, hill, zaida z'eles 20Hanɗa a wala n'a bunda ɗif hihir ɗa, amma simi na gaini tiy na gai mi kai ɗa, a bunda ɗif hihir kai.
Yimi na wiiɗi muni na Kanane
Mark. 7.24-30
21Yesu a halaɗi edi woni par, a hala edi midini afti ɵimaɗi Tirus gaiɗi Sidon. 22Tili, muni na Kanane ktai te halasi war afti ni par, te ɗuula, Epiɗ-ɗai, Ahini David, ku hiina haw buriya, buri ahiya te sɗa ŋiba gara tin ksalai. 23Amma a waya seŋ ktai siɗi kai. Ɗaini zi hitri e hilisi sini e siiwiŋ e miɗi, ku ɵimiti edi, buri te na ɗuula pumu. 24Amma a waya seŋ a muɗa, e ɵiniŋasi ɗa siɗi na zamai kai, sai burini adumai na war pinzibaɗi Izrayel n'a wula edi. 25Amma te halasi te hurga azumai wuzani aŋ firiyaŋ, te muɗa, Epiɗ-ɗai, zina pa ta. 26Amma a waya seŋ a muɗa, ɓukɗi aliyagoi e pûkûŋ edi wiini hirgakai ɗa, a siɗa aŋ za kai. 27Amma te muɗa, hanɗa a jre, Epiɗ-ɗai, amma hirgakai a suma ɗa kolkoɗai n'a yakasi sin tabelni epin-gezani par kai ɗi. 28Yesu a waya seŋ a miɗiɗi, muni, yimiku abai, aga a za suku maini na ku daraŋ ɵa. Ahiɗi te bunda pɗemi war ler ni dama.
Yesu a zûûliɗi ɗai viya
29Yesu a halaɗi edi woni par, a halasi gobi sin yem-ra n'abai na Galileya, a niya amai midiɗi huwuŋ, a sumna woni. 30Firiɗi ɗai n'abai e hilisi sini, e kiɗisi na daŋelaŋai piɗi, na malvanai, na ɓurtum, na höyökai, gaiɗi na zamai viya, e miliɗi azumai wuzani, a zûûliɗi lai. 31Firiɗi ɗai e bindi hiyak won hlai n'e siɗi na ɓurtum a muɗa, na höyökai e bindi pɗem, na daŋelaŋai e hili, na malvanai e tili lai, e kûli Alaw na wiiɗi Izrayel.
Yesu a viɗi ɗai na dubu puɗu
Mark. 8.1-10
32Amma Yesu a yikiɗi ɗaini zi hitri sini a muɗa, hiinini haw a yimaŋa gara burini firiɗi ɗai, buri nagai e ɗa gaya girna mefeŋ hu, walaɗi zi simi aŋ kai, mu dara mu tikiɗi piɗi gaini wiyamai kai, kapai gdaŋɗi a vada warɗi futi kai. 33Ɗaini zi hitri e miɗini: tiyi mi nivi ɓuk war baŋa hanɗa n'a kiɗa aŋ viɗi ɗai viya nɵa wata ɗa? 34Yesu a miɗiɗi, peŋ aŋ tiki gama ɗa? E miɗi, muguzak, gaini hilif n'agogoi agwi lai. 35A muɗa sin firiɗi ɗai buri e simni azumai midini afti. 36A mula peŋ na muguzak gaini hilif, a sa tese sin Alaw, a ɓurwaŋ a siŋɗi wiiɗi ɗai zi hitri, ɗai zi hitri e siŋɗi wiiɗi ɗai. 37E simi paŋ, e vi lai, e mili pini n'a hina amai, a va dologo muguzak. 38Nagai n'e simi e ɗa maɵagai dubu puɗu, falakai gaiɗi aliyagoi e piɵiɗi kai. 39Won hlai n'a tikiɗi piɗi ɗai li, a niya warni hulum n'abai a halasi midini afti na Magadan.
Currently Selected:
Matewus 15: MUSGUM
Highlight
Copy
Compare
Share
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
