Zabbu̱li̱ 9
9
Hali Mu̱handu̱ wa Bahi̱i̱mi̱. Zabbu̱li̱ gya Dau̱di̱.
1Ai̱ Mukama, nyaaku̱si̱i̱manga na mutima gwange gwensei̱,
nyaatebyanga byamahanu byamu byensei̱ bi̱waakoori̱.
2Nyaasemererwanga ni̱nku̱ramya,
nyaaku̱hi̱i̱mi̱ranga ninkuhaariiza we Ruhanga, Waahakyendi̱ Hoi̱.
3Banyanzigwa bange b̯ubaakuwona bakubayo i̱nyu̱ma,
nibagwa ni̱bakwa.
4Hab̯wakubba weewe ondwaniira kandi ontonganiira,
oi̱cali̱i̱ri̱ kitebe kyamu kya b̯ukama kucwa gwab̯ulyo.
5Waamira mahanga, noozi̱kya bantu babiibi,
obasusura ni̱basyera biro na biro.
6Ki̱kazi̱kya banyanzigwa beetu̱ cekeceke tikili na ki̱ki̱ti̱gi̱ri̱,
oku̱pwi̱ri̱ mbuga zaab̯u,
titucakabateekerezaho.
7Bei̱tu̱ Mukama alema biro byensei̱,
ha kitebe kya b̯ukama b̯wamwe akora byab̯winganiza,
8acwera nsi gyensei̱ ku̱si̱gi̱ki̱ra ha mananu,
naacwera bantu mu b̯winganiza.
9 Mukama abba mpagi̱ gya banaku,
yooyo b̯wi̱ru̱ki̱ro b̯wab̯u mu b̯wi̱re b̯wa b̯ujune.
10Bab̯wo bakutamwo ki̱ti̱i̱ni̱sa baakwesiganga,
hab̯wakubba we, ai̱ Mukama, bab̯wo baakwesengereerya tobaleeka.
11Mu̱hi̱i̱me muhaariiza Mukama, yogwo alema Sayu̱u̱ni̱!
Mu̱tebye bikorwa byamwe hali bantu.
12Kubba yogwo muhoora nzi̱go abeegi̱ri̱ bakuwonawona,
ti̱yeebeera kizabiro kya bakuwonawona.
13Ai̱ Mukama, nngiira mbabazi̱!
Lingiira bab̯wo banyakunnoba nka ku̱baku̱mbonawonesya,
ai̱ Mukama, njuna hali maani ga lu̱ku̱u̱,
14aleke nsobore kukuhaariiza,
hahwo mwirembu lya bantu ba Sayu̱u̱ni̱
nsobore kusemererwa hab̯wa kujunwa kwamu.
15Mahanga kagagwi̱ri̱ mu b̯u̱hya b̯u̱baali̱mi̱ri̱,
mu kitimba ki̱baategi̱ri̱ kabakwatu̱rwemwo.
16 Mukama yeegebeerwe hab̯wa misangu myamwe mya b̯ulyo myasala,
babiibi bakwatwa bikorwa bya ngalu zaab̯u.
17Babiibi basi̱ri̱mu̱ka kuzumu,
na bab̯wo bensei̱ beeb̯wa Ruhanga.
18Bei̱tu̱ baseege, Ruhanga talibebeera,
kandi ku̱ni̱hi̱ra kwa banaku tikulimalikaho.
19Weemeera, ai̱ Mukama! Hatabbaho muntu aku̱si̱ngu̱ra,
ocwere mahanga musangu.
20Ai̱ Mukama, baru̱mbe baku̱ti̱i̱nenge
aleke beege bali bantu b̯untu.
Currently Selected:
Zabbu̱li̱ 9: LUGUNGU
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
