Zabbu̱li̱ 10
10
1Ai̱ Mukama, hab̯waki ondahi̱i̱ri̱ho?
Hab̯waki onyeebi̱si̱ri̱ho mu b̯wi̱re b̯wa b̯ujune?
2Mu kwetembatembya babiibi bawonawonesya banaku,
nikileetera banaku ku̱gwa mu mitegu mya babiibi.
3Kwegomba kubiibi kubaha kwehaariiza,
batu̱mbya byab̯u̱nyagi̱ naaku̱lu̱ma Mukama.
4Myehembu myab̯u mibaha kugaya Ruhanga,
bateekereza yati, “Ruhanga takabbangaho.”
5B̯uli kibakakora kitunga mu̱gi̱sa,
beetegereza kwahi micwere mya Ruhanga,
bagaya b̯u̱gayi̱ banyanzigwa baab̯u.
6Mu mitima myab̯u bateekereza nibakoba yati,
“Tihaloho kikusobora kungwaho!
Biro byensei̱ ndibbanga mu kusemererwa,
nntali na b̯ujune.”
7Babiibi beicala mu kukyena, kubaza b̯u̱gobya na ku̱zi̱ndi̱ri̱za bandi,
mi̱nwa myab̯u mibaza bigambu bi̱ku̱habya na kunyaga.
8Balindiira nibatega bantu mu byaru,
nibalaliira kwi̱ta batali na musangu,
naakutata batali na maani babakwate.
9Nka mutali alaali̱ri̱i̱ri̱, batega nibalindiira mu bisaka,
beebi̱sa aleke bagwere batali na maani,
babakwatire mu mitegu myab̯u.
10Bacwacwana batali na maani ni̱badi̱ki̱ra hansi,
nibagundamira baceke hansi na maani gaab̯u gensei̱.
11Babiibi baateekereza nibakoba yati, “Ruhanga tabafaaho,
abaru̱gi̱ri̱ho, takwi̱za kutuwona.”
12Ai̱ Mukama, ai̱ Ruhanga, weemeera na banaku,
otabeebeera mu b̯ujune b̯wab̯u.
13Hab̯waki mubiibi agayanga Ruhanga naakoba na mu mitima gwamwe yati, “Ruhanga takwi̱za kunjunaana!”
14Bei̱tu̱ we, Ruhanga, b̯ujune na kuwonawona ku̱koleerwe, okwegi̱ri̱,
bikwate, obajune,
bakwesi̱gi̱ri̱, bajune,
weewe ojuna nfu̱u̱zi̱.
15Ocwacwana mikono mya babiibi,
obajunaane bibiibi bibakora,
hatasigalaho noomwei̱.
16 Mukama yooyo mu̱lemi̱ wa biro byensei̱,
mahanga ga mu nsi gyamwe gali̱zi̱ka.
17Ai̱ Mukama, weegwanga kulira kwa banaku,
obatati̱i̱ryenge mitima myab̯u,
18olwaniirenge nfu̱u̱zi̱ na baceke,
aleke hatalibbaho mubiibi ku nsi aku̱bati̱i̱ni̱si̱ri̱i̱rya.
Currently Selected:
Zabbu̱li̱ 10: LUGUNGU
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
