Zabbu̱li̱ 51
51
Hali mu̱handu̱ wa bahi̱i̱mi̱. Zabbu̱li̱ gya Dau̱di̱. Nasani̱ mu̱ragu̱ri̱ b̯u̱yeezi̱ri̱ hali Dau̱di̱ amaari̱ kukora b̯wenzi̱ na Bbasebba.
1Ai̱ Ruhanga, ngiira kisa,
hab̯wa ngonzi zaamu zinene,
na hab̯wa kuganyira kwamu kwa maani
ntoolaho b̯ubiibi b̯wange.
2Onaabi̱i̱rye ki̱mwei̱ nduge mu b̯ubiibi b̯wange,
kandi onsyani̱e kuruga mu kibii kyange!
3Kubba nyeetegeri̱i̱ze b̯ubiibi b̯wange,
kandi kibii kyange kiicala nikimpondeera.
4Hali we, weewe musa gi̱nsobereerye,
kandi nyakora bibii mu mei̱so gaamu,
aleke oicale nooli wa mananu wakabazanga,
bigambu byamu byolokye nka kwoli wa mananu, aleke osi̱nge bab̯wo bokucwera musangu.
5Wona nyaabyali̱i̱rwe mu kuhenera,
kandi nda ginyakumbyala, mmaama yaagyemeti̱ri̱ mu kibii.
6Wona, weegondezera mu mananu gabba mu mutima gwa muntu,
kandi onzegesya magezi̱ ga nsita za mutima gwange.
7Ntoolaho kibii kyange aleke nsemere,
onaabye nsyane kukiraho pamba.
8Leka nyegwe kusemererwa na masanyu,
aleke maku̱ha gobi̱nyi̱ri̱ gasemererwe.
9Bi̱sa mei̱so gaamu galeke kuwona bibii byange,
kandi ontooleho ki̱mwei̱ b̯ubiibi b̯wange.
10Ai̱ Ruhanga ompangemwo mutima gukwegwa,
kandi onteekemwo mwozo guhyaka.
11Otambinga kuruga mu mei̱so gaamu,
otantoolaho mwozo gwamu gu̱syanu̱.
12Nzi̱ri̱i̱rya kusemererwa kwa kujunwa kwamu,
kandi ompe mutima gu̱ku̱kwegwa.
13Mwomwo ndyegesya babiibi mihanda myamu,
aleke batandike kukuhondera.
14Ai̱ Ruhanga, oncungure kuruga mu kibii kya b̯wi̱ti̱,
ai̱ Ruhanga wa kujunwa kwange,
kandi kalimi kange kali̱hi̱i̱ma na maani ha mananu gaamu.
15Ai̱ Mukama mbuula mu̱nwa,
gusobore kukuhaariiza.
16Kubba tosemererwa mu kihongwa, rundi nyaku̱bbeeri̱ nki̱ku̱heeri̱.
Bihongwa byokye tibilikusemeera.
17Bihongwa bya Ruhanga gwogwo mutima gu̱kwezi̱ramwo
ai̱ Ruhanga mutima gu̱kwezi̱ramwo kandi gweb̯u̱ndaazi̱ toligugaya.
18Ai̱ Ruhanga bba na kisa na rub̯uga Sayu̱u̱ni̱,
bimba b̯uhyaka bi̱si̱i̱ka bya Yeru̱salemu̱.
19Mwomwo olisemererwa mu bihongwa bya mananu,
kihongwa kyensei̱ kyokye kikusemeze,
kasi nnumi bazihonge ha kyoto kyamu.
Currently Selected:
Zabbu̱li̱ 51: LUGUNGU
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
