Zabbu̱li̱ 50
50
Zabbu̱li̱ gyʼAsafi̱.
1Yooyo Waamaani, Mukama Ruhanga
abaza niyeeta bantu ba nsi gyensei̱,
kuruga b̯uhulukalyoba kudwa b̯ugwalyoba.
2Ruhanga amuluka mu Sayu̱u̱ni̱,
rub̯uga lukukirayo mu b̯urungi.
3Ruhanga weetu̱ wabba nakwi̱za, ti̱yeti̱keera,
yebemberwa kingeere kya mworo gu̱kwokya,
yeelogoleerwe bbuukuulu.
4Yeeta iguru na nsi kugaba b̯wakei̱so,
muwone alimukucwera bantu baamwe musangu.
5Akukoba yati, “Mwesu̱me hali gi̱ya nywe beesigwa bange,
banyakukora na gya ndagaanu gya kihongwa.”
6Iguru lirangiira mananu gaamwe,
Ruhanga yankei ali mu̱cwi̱ wa musangu!
7Bantu bange ndi Ruhanga!
I̱saleeri̱ ndi Ruhanga waamu, weegwa binkukuweera uwe.
8Ti̱nku̱ku̱zi̱nda hab̯wa bihongwa byamu,
rundi bihongwa byokye byompongera,
9ti̱ki̱kwetagi̱sya gya kutwala nnumi rundi mbu̱li̱ za mu mali̱i̱si̱i̱ryo gaamu.
10Kubba b̯uli kisolo kyensei̱ kya mwihamba kili kyange,
na magana ga nte ha nsahu nku̱mi̱ na nku̱mi̱.
11Nkyegi̱ri̱ bi̱nyoni̱ byensei̱ bya ha nsahu,
na byensei̱ bilibatira mwihamba bili byange,
12kakubba nyali nzala, nyakaku̱weereeri̱ kwahi,
hab̯wakubba nsi na bigilimwo byensei̱ byange.
13Okutekereza ndya nyama gya nnumi zi̱mu̱hongi̱ri̱,
rundi nnywe ibbanga lya mbu̱li̱?
14Gabi̱ranga Ruhanga kihongwa kya ku̱si̱i̱ma,
kandi noodosereerya biragaanu byamu na yogwo Waahakyendi̱ Hoi̱,
15kasi onkunge nooli mu kizib̯u,
nkwi̱za kukujuna kandi olimpariiza.
16Bei̱tu̱ hali nkori̱ za bibii Ruhanga akukoba yati,
“Oli kwahi na b̯ugabe b̯wa ku̱hi̱i̱ma biragiro byange,
rundi kubaza ha ndagaanu gyange!
17Hab̯wakubba onoba kulamba kwange
kandi bigambu byange obikasuka ku̱di̱.
18Woowona mwi̱bi̱ yooyo noonywana nayo.
Kandi oicala weekweti̱ na benzi̱.
19“Kanwa kaamu okakoresya bibiibi,
kandi kalimi kaamu nikatara b̯u̱gobya.
20Weheeri̱yo kunyegeera banyaruganda baamu,
noosensegula mwana wa maawu.
21Bibi bintu byokoori̱, gya nceeri̱ mbyetekereeri̱,
waatekerezengi̱ naagya nyaali nka we.
Bei̱tu̱ hataati̱ gya ndimu kukulamba nsobi̱ zaamu ni̱nzi̱kwolokya.
22“Mwezi̱remwo nywensei̱ bakwebeera Ruhanga,
kitali ki̱kyo nkwi̱za kubahwerekeerya mulemwe na yaabacungura.
23Muntu agaba kihongwa kya ku̱nsi̱i̱ma abba anteri̱mwo ki̱ti̱i̱ni̱sa,
yogwo akora birungi,
nyaamwolokyanga kujuna kwa Ruhanga”
Currently Selected:
Zabbu̱li̱ 50: LUGUNGU
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
