Zabbu̱li̱ 49
49
Hali mu̱handu̱ wa bahi̱i̱mi̱. Zabbu̱li̱ gya baana ba Koora.
1Bantu nywensei̱ mwetegeerye,
mwegwe kinkukoba nywensei̱ bali hansi,
2wa ki̱ti̱i̱ni̱sa na wa hansi,
mu̱gu̱u̱da rundi museege.
3Bimbaza bibba bya magezi̱,
kandi biteekerezu byange bibba na makuru.
4Mapokopo gange nyaagei̱calyanga ku ngeera,
bi̱koi̱kyo byange ni̱mbi̱ti̱ra mu kukuuta ndi̱ngi̱di̱.
5B̯u̱ti̱i̱ni̱ b̯unkwatira ki mu b̯wi̱re b̯wa b̯ujune,
banyanzigwa b̯ubabba banyeelogoleerye.
6Bab̯wo beesiga b̯u̱gu̱u̱da b̯wab̯u,
nibehaariizisya b̯unene b̯weitungu lyab̯u.
7Mu mananu tihaloho muntu akusobora kujuna wondi,
rundi kusasulira muhendu gwa b̯womi b̯wamu hali Ruhanga.
8Kili kya muhendu gunene, kwi̱ryaho b̯womi b̯wamu,
tooli na kyokusobora kusasula Ruhanga akadweb̯wa,
9we kwicala nooli mwomi biro byensei̱,
kandi okakena lu̱ku̱u̱.
10Kubba tuwona bagezi̱ ni̱bakwa,
mpwi̱se na batakukenga de ni̱bakwa,
kasi nsimbi zaab̯u nizisigala kudi̱b̯wa bandi.
11Nyanga zoozo zi̱i̱ra kubba maka gaab̯u ga biro na biro,
nab̯ubabba nibali na matehe gaab̯u hab̯wab̯u.
12Ki̱ti̱i̱ni̱sa kya muntu tikiicalaho biro byensei̱,
nka bisolo, akwa naahwerekeera.
13Bibi byobyo bikora mpwi̱se,
na beesiga bigambu bya badoma,
14nka ntaama zi̱li̱ndi̱ri̱i̱ri̱ ku̱kwa,
lu̱ku̱u̱ lu̱kwi̱za ku̱bali̱i̱sya, lubagoromore mu nyanga.
Kasu̱mi̱ b̯ukalidwa, bantu ba Ruhanga balibafuga,
babahwerekereerye balemwe kwicala mu makaa gaab̯u garungi.
15Bei̱tu̱ Ruhanga alincungura, anjune maani ga lu̱ku̱u̱.
16Mutima gwamu gulekenge kutuntuzib̯wa itungu lya wondi
rundi ki̱ti̱i̱ni̱sa kya makaa gaamwe kweteerya.
17Kubba akwi̱za ku̱kwa, itungu lyamwe lyensei̱
ali̱ti̱ge i̱nyu̱ma lilemwe kumuhondera.
18Muntu ahaariizib̯wa b̯wakora birungi,
bei̱tu̱ yeegwa kusemererwa b̯wabba mwomi.
19Bei̱tu̱ akwi̱za ku̱kwa agyende kuzumu,
hali bahaahaawe
tali̱i̱ra kuwonaho
kyererezi̱ biro na biro.
20Ki̱ti̱i̱ni̱sa tikikagaananga muntu atakwetegereza ku̱kwa,
nka bisolo, nayo akwa naahwerekeera.
Currently Selected:
Zabbu̱li̱ 49: LUGUNGU
Highlight
Copy
Compare
Share
Want to have your highlights saved across all your devices? Sign up or sign in
© 2025, Wycliffe Bible Translators, Inc. All rights reserved.
