Abanya Roma 9

Nyamuhanga nʼabandu buwe abayisogawa

1Ekyo ngabũga ni kwenene; indi wa Kristo, sindibiha. Obunya-mutima bwage, obukasondolawa nʼOmũlĩmũ Abũyĩrĩre bũkatũlago nibya ko ndebiha. 2Ngwite obũlĩge bunene nʼeriagalwa omo mutima wage busana nʼabagala betu oko mubiri. 3Kwenene nanganza eritakirwa, nʼerigabulwa uku Kristo busana nʼabagala betu oko mubiri! 4Ibo nĩ Baĩsraelĩ, abo Nyamuhanga ayira mo bagala buwe nʼerisangira nabo olukengerwa luwe. Kandi mwalagana nabo, nʼerihabo Emigambo. Kandi bawite erĩramya lyʼeHekalũ, bawite nibya esyondagane sya Nyamuhanga. 5Ni bana bʼabotata-kulu betu Abrahamũ, Ĩsaka, na Yakobo. Na Kristo oko mubiri ni wʼekihanda kyabo. Iye ni Nyamuhanga ali endata oko bosĩ, apipawe kera na kera. Amina.

6Sĩkyangabũgwa kiti, ekĩnywa kya Nyamuhanga kyamatalukana. Kusangwa abosĩ abakabutawa omo kihanda kya Ĩsraelĩ sĩ Baĩsraelĩ kwenene. 7Kandi abʼolubuto lwa Abrahamũ abosĩ sibehulawa mo bana buwe. Nĩkwa Nyamuhanga mwabwira Abrahamũ ati, Abana ba Ĩsaka bo basyahulwa mo lubuto lwawe. 8Ekĩ kĩkakangaya ngoko abana bakabulawa omo mubiri si bana ba Nyamuhanga, nĩkwa abana bʼendagane, bo bakaganzawa mo lubuto lwʼekwenene. 9Kusangwa ekĩnywa kyʼendagane ya Nyamuhanga kiti, oko mugulu owatolere nasyasa, neryo Sara asyabana omugala.

10Butsira ekĩ kisa, nĩkwa Rebeka mwaheka obukule bwʼabahasa, uku Ĩsaka ye tata-kulu wetu. 11Nĩkwa abahasa bate babutwa, isibebakola kibuya kutse kibi, 12Nyamuhanga mwabwira Rebeka ati, Omukulu asyakolera Omulere; Nyamuhanga mwahanganĩa erisonda liwe ngoko ayisoga, mwatabirikira Omulere busana nʼemĩbĩrĩ yiwe, nĩkwa kusangwa mwayi soga erimubirikira. 13Ngoko kĩsakĩre kiti: Nabirianza Yakobo, nĩkwa nabĩrĩkwa Esaũ yʼobusu.

14Neryo tũbũgekĩ kwehĩ? Tuti Nyamuhanga siali kwʼerĩbanza kwehĩ? Iyihi nʼahake! 15Kusangwa mwabwira Musa ati, Kandi, nasyamũkwĩra obũlĩge oyo nasyakwĩra obũlĩge. 16Neryo si busana nʼerisonda lyʼomundu kutse erikola liwe, nĩkwa ni busana nʼeriganyira lya Nyamuhanga. 17Kusangwa Amasako akabwira Farao ati, Nabĩrĩkũhĩra oko ngoma busana nʼomwatsi oyũ, inatoka erĩkangya obũtokĩ bwage ewawe, kandi erĩna lyage lĩtũlaganĩbawe omo kihugo kyosĩ. 18Neryo Nyamuhanga akaganyira oyo anzĩre eriganyira, Kandi akakalaya oyo anzĩre erĩkalya.

Erikarama lya Nyamuhanga nʼeriganyira liwe

19Neryo wasyambwira uti, Busana nakĩ Nyamuhanga akinabana erĩlolo kwehi? Kusangwa nindi yo wangalwa nʼerisonda liwe kwehĩ? 20Nĩkwa uwendi kwehĩ, uti ũkakũbĩsanaya Nyamuhanga yʼobuhaka kwehĩ? Kwʼekikabumbawa kĩkanabũga nʼomũbũmbĩ kiti, Busana nakĩ ukanyibumba utya kwehĩ? 21Omũbũmbĩ siawite ehamũlĩ oko libumba erikola ngoko anzĩre kwehĩ? Kutse eribumba enyungu busana nʼomũbĩrĩ mubuya, kutse omũbĩrĩ mutya-mutya kwehĩ?

22Nyamuhanga abya anzĩre erĩkangya erihitana liwe, nʼerĩmĩnyĩsya obũtokĩ buwe. Neryo mwayibombeka kutsibu mwayitsingirira busana nʼabo angahitanako, ababya bakandĩsyaherĩbwa. 23Nʼakandi abya anzĩre erĩmĩnyĩsya olukengerwa lunene luwe busana nʼabo angaganyira, abo ahĩra kera erisangira olukengerwa luwe. 24Kusangwa nĩ ĩtwe abirikira, butsira omo katĩkatĩ kʼAbayũda basa, nĩkwa omo katĩkatĩ kʼEbihanda nibya.

25Ngoko abũga omo kitabu kya Hosea ati,

Abatabya bandu bage, nasyahulabo mo bandu bage.

Nʼoyo wabya aponĩrwe, nasyamwahula mo mwanze wage.

26Nʼabo babwirawa ambu, Simuli bandu bage,

Abo basyahulwa mo bagala ba Nyamuhanga oyuliho.

27Kandi Ĩsaya akabirikira busana na Ĩsraelĩ ati, Nomo eriganza lyʼabandu ba Ĩsmaelĩ lyangabya ngʼemisege yʼomo ngetsi, abake bo basyalamĩbwa.

28Kusangwa Omukama asyabũga lũba omwatsi wuwe busana nʼekihugo.

29Kandi ngoko Ĩsaya abũga erĩmbere ati,

Kumbe Omukama wʼAmaka Gosĩ atatũsĩgĩra olubuto,

Kumbe twabiribya ngʼeSodomo, itwabirisosa ngʼeGomora.

Ĩsraelĩ nʼEngulu Yowene

30Neryo tũbũgekĩ kwehĩ? Abʼebihanda abatekwama eritunganene, mobatũngananĩbwa na Nyamuhanga omo kitunganene ekikabanika busana nʼerĩkĩrĩrya. 31Nĩkwa Ĩsraelĩ ibakakwama omugambo wʼerĩtũngananĩabo, mobabula omugambo oyo. 32Busana nakĩ kwehĩ? Kusangwa mobatakwamakyo omo nzira yʼerĩkĩrĩrya, nĩkwa omwʼikola emĩbĩrĩ. Mobatwĩkala okwʼĩbwe erĩkatwĩkalaya abandu. 33Ngoko kĩsakĩre kiti,

Lebaya, ngahĩra eSĩonĩ yʼerĩbwe erĩkatwĩkalaya abandu,

Nʼerĩbwe erikaleterabo erĩtwĩkala.

Nʼoyũkamwĩkĩrĩraya sĩendĩsyakwa esĩsonĩ.

Currently Selected:

Abanya Roma 9: KB80

Highlight

Copy