Abanya Roma 8

Eribyaho omo Mũlĩmũ

1Neryo sihali eritswerwa oko bawatene na Kristo Yesu. 2Kusangwa omugambo wʼOmũlĩmũ oyukatuha engebe busana nʼerimatikana na Kristo Yesu, abirinyibohola oko mugambo wʼebibi nʼowʼoluholo. 3Kusangwa ekyo Migambo yataluka erikola, busana nʼobolo bwʼobũlengekanĩa bwʼomubiri, Nyamuhanga mwatokakyo. Nyamuhanga mwatuma Omugala wuwe omo kĩsosekanĩo kyʼomubiri wʼebibi, kandi busana nʼeririha ebibi. Neryo mwatswera ebibi byʼobũlengekanĩa bwʼomubiri. 4Nyamuhanga mwakola atya, ebilayiro byʼEmigambo bibererere omwisi wetu, ĩtwe tukalendera omo mibere yʼOmũlĩmũ, butsira omo mibere yʼomubiri. 5Kusangwa abo bakakwama omubiri bakaganĩraya emyatsi yʼomubiri. Nĩkwa abakakwama Omũlĩmũ bakaganĩraya emyatsi yʼOmũlĩmũ. 6Kusangwa obũlengekanĩa obukakwama omubiri bukaleta oluholo; nĩkwa obũlengekanĩa obukakwama Omũlĩmũ bukaleta engebe nʼobuholo. 7Kusangwa omundu oyukakwama obũlangekanĩa bwʼomubiri nĩ nzĩgũ uku Nyamuhanga. Sialĩowa Emigambo ya Nyamuhanga, kandi sialitoka erĩowayo. 8Kandi abandu abakakwama obũlengekanĩa bwʼomubiri sibetoka erĩtsemesya Nyamuhanga.

9Nĩkwa simwekwama obũlengekanĩa bwʼomubiri, nĩkwa obwʼOmũlimũ, Omũlĩmũ wa Nyamuhanga amabya ĩkere omwisi wenyũ. Oyutawite Omũlĩmũ wa Kristo si mundu wuwe. 10Nĩkwa Kristo amabya ali omwisi wenyũ, nomo mubiri wenyũ aholĩre busana nʼebibi, nĩkwa ekĩrĩmũ kiwite engebe kusangwa kyabĩrĩtũngananĩbwa na Nyamuhanga. 11Omũlĩmũ wa Nyamuhanga oyo walũbũkaya Yesu oko baholĩ, amabya ĩkere omwisi wenyũ, neryo oyo walũbũkaya Yesu oko baholĩ asyaha engebe oko mibiri yenyũ eyikahola, busana nʼOmũlĩmũ wuwe oyo wĩkere omwisi wenyũ.

12Neryo busana nʼomwatsi oyũ, balĩkyetu, siritolere ũkwʼĩnywe erikwama obũlengekanĩa bwʼomubiri. 13Kusangwa mwamakwama obũlengekanĩa bwʼomubiri mwasyahola; nĩkwa omo maka wʼOmũlĩmũ mwamĩta emikolere yʼomubiri, mwasyabyaho. 14Kusangwa abosĩ abakasondolawa nʼOmũlĩmũ wa Nyamuhanga bo bagala ba Nyamuhanga. 15Kusangwa Omũlĩmũ ogo Nyamuhanga abaha, sialibayira mo bakobe, Sialireka mukubaha kandi. Nĩkwa Omũlĩmũ akabayira mo bagala ba Nyamuhanga; kandi omo bũtokĩ bwʼOmũlĩmũ tukabirikira tuti, Tata! Tata! 16Omũlĩmũ oyũ wa Nyamuhanga akatũlago haguma nʼekĩrĩmũ kyetu ko tuli bana ba Nyamuhanga. 17Twamabya tuli bana, tuli balĩ bʼomwandu nʼebindu ebyo Nyamuhanga akatubikira omo bwami buwe. Kandi twasyasangira omwandu haguma na Kristo; kusangwa twamagalwa haguma na Kristo, twasyasangira olukengerwa luwe.

Olukengerwa olukandisyasa

18Ngaganza amalĩge wa sesene nga si kindu busana nʼolukengerwa olo tũkandĩsyabĩsũlĩrwa. 19Kusangwa ebihangikwa byosĩ bikalindirira nʼolukando lunene erĩbĩsũlĩrwa lyʼabagala ba Nyamuhanga. 20Kusangwa ebihangikwa mobyatswerwa eribya buyira, butsira omwʼisonda lyabo, nĩkwa kusangwa Nyamuhanga mwatswerabyo atya. Nĩkwa habya amaha, 21kusangwa ebihangikwa ebĩ byasyaboholwa omo bukobe bwʼemyatsi yʼerihonda, eriingira omo bwĩranda nʼolukengerwa lwʼabana ba Nyamuhanga. 22Kusangwa tũnasĩ erĩhĩka lino ebihangikwa byosĩ bĩkasĩmba nʼerikunda haguma. 23Kandi butsira ebihangikwa bisa, netu nibya, tuwite Omũlĩmũ mo bĩgũma byʼerĩmbere byolũsũnzo lwa Nyamuhanga, tũkasĩmba omo mitima yetu, tukalindirira Nyamuhanga erituyira mo bagala, nʼerĩtongolya emibiri yetu. 24Kusangwa twalamĩbawa omo maha, nĩkwa omundu siali nʼamaha busana nʼekyo abirilangira, kusangwa amalangira kindu, siangaswakwa amaha wakyo. 25Nĩkwa twamahĩra amaha oko ekyo tutelolako, tukayitsingirira nʼeririndirirakyo.

26Kandi nibya Omũlĩmũ akatũwatĩkaya omo bolo bwetu. Kusangwa Sĩtwasĩ erisaba ngoko litutolere, nĩkwa Omũlĩmũ ĩyowene akatusabira, akatwimira omwʼĩsĩmba erite ryangabũwa. 27Neryo Nyamuhanga oyukalangira emitima yʼabandu anasĩ obũlengekanĩa bwʼOmũlĩmũ, kusangwa Omũlĩmũ akasabira abandu ba Nyamuhanga ngʼerisonda lya Nyamuhanga ngoko liri.

28Tũnasĩ ngoko Nyamuhanga akaleka emyatsi yosĩ ĩyowana busana nʼabakamwanza, kandi busana nʼabo abirikira ngʼerĩyĩsũnza liwe. 29Kusangwa abo ayisoga erĩmbere, mwasombolabo kera basose Mugala wuwe, neryo Omugala iniatoka eribya akambere omo bagala babo bangi. 30Nʼabo ayisoga kera mwabirikirabo. Nʼabo abirikira mwayirabo mo batunganene, nʼabo ayira mo batunganene, ba nʼabo ahabo erisangira omo lukengerwa luwe.

Olwanzo lwa Nyamuhanga

31Neryo tũbũgekĩ busana nʼemyatsi eyĩ kwehĩ? Nyamuhanga amabya ali oko luhande lwetu, nindi yo wangaswalwa netu kwehĩ? 32Nyamuhanga mwatabalya Omugala wuwe-wuwe, nĩkwa mwamusiga busana nʼĩtwe bosĩ! Oyo watuha Omugala wuwe, siendisyatuha ebindu byosĩ busana naye kwehĩ? 33Nindi wasyahandĩkĩrĩrya abayisogawa na Nyamuhanga kwehĩ? Nyamuhanga yukahulabo mo batunganene. 34Nindi yo Wasyahĩra kubo kwʼomusango kwehĩ? Kristo Yesu yoyo wahola, kandi mwalũbũka, na lino ĩkere oko luhande lwʼamali lwa Nyamuhanga, kandi yo yukatwimira embere sya Nyamuhanga. 35Nindi wasyatugabula oko lwanzo lwa Kristo kwehĩ? Nĩ bũlĩge, kutse amagaliĩ, kutse erĩendererya, kutse enzala, kutse eribula ekyʼeriambala, kutse obwĩko, kutse omũyalĩ kwehĩ? 36Ngoko kĩsakĩre kiti,

Busana nawe tũkĩtawa omo musibo gosĩ.

Tukaganzawa ngʼesyombũlĩ syʼerikerwa.

37Nĩkwa omo myatsi yosĩ eyĩ tũkakĩnda ndeke busana nʼoyo watwanza! 38-39Kusangwa nyĩnasĩ ndeke ngoko hate kindu ekyangatoka eritugabula oko lwanzo lwa Nyamuhanga oluli omwisi wa Kristo Omukama wetu. Sihali kindu, sihali oluholo, kutse engebe, sihali abamalaĩka, kutse abatabalĩ bʼomo kyanya, sihali emyatsi ya sesene, kutse emyatsi eyikandisyasa, sihali ebyʼamaka, kutse ekyʼendata, kutse ekyʼeyĩkwa, sihali nʼekindi ekyahangikawa, ekyangatoka eritugabula oko lwanzo olo lwa Nyamuhanga, oluli omwisi wa Kristo Yesu Omukama wetu.

Currently Selected:

Abanya Roma 8: KB80

Highlight

Copy