Abanya Roma 4

Erĩkĩrĩrya lya Abrahamũ

1Neryo tũbũgekĩ busana na Abrahamũ, so-kulu wʼekihanda kyetu kwehĩ? Mwabanakĩ kwehĩ? 2Kusangwa kumbe Abrahamũ alĩtũngananĩbawa busana nʼemĩbĩrĩ, kumbe awite omwatsi wʼeriyihalambira; nĩkwa siawitego embere sya Nyamuhanga. 3Kusangwa Amasako atĩkĩ kwehĩ? Ati, Abrahamũ mwĩkĩrĩrya Nyamuhanga, neryo Nyamuhanga mwamuganziralyo mo litunganene. 4Oyukakola omũbĩrĩ akalihawa; nĩkwa oluhembo luwe siluliganzawa ngʼolũsũnzo, nĩkwa ngʼobũhĩngĩ.

5Nĩkwa oyutakola omũbĩrĩ, nĩkwa akĩkĩrĩraya oyũkatũngananaya abandu babi, erĩkĩrĩrya liwe likaleka iniaganzwa mo mutunganene. 6Ngoko Dawĩdĩ akahula obutseme bwʼomundu oyo Nyamuhanga abiriganza mo mutunganene butsira busana nʼemĩbĩrĩ yiwe. Dawĩdĩ ati,

7Obutseme buli oko babiribuyirwa kwʼamalolo wabo,

Kandi obutseme buli ukwʼabo ebibi byabo byabĩrĩkũnĩngĩrwa na Nyamuhanga.

8Obutseme buli oko mundu oyo Omukama siendisyamuganzira kwʼebibi biwe.

9Obutseme obũ ni bwʼabandu babwene basa, kutse busana nʼabatabwene nibya kwehĩ? Kusangwa tuti, ngoko kĩsakĩre kiti, Abrahamũ mwaganzwa mo mutunganene busana nʼerĩkĩrĩrya liwe. 10Abrahamũ aganzawa mo mutunganene omugulu abya abwene kutse omugulu abya atabwene kwehĩ? Aganzawa atya omugulu abya atabwene, neryo mwabanĩbwa enyũma. 11Nʼeribambwa liwe lyabya ekiminyikalo, erĩmĩnyĩsya ngoko Nyamuhanga mwamuganza mo mutunganene busana nʼerĩkĩrĩrya, isiabwene. Abrahamũ atoke eribya tata wʼabosĩ abakĩkĩrĩraya Nyamuhanga isibabwene, baganzawe mo batunganene. 12Kandi atoke eribya tata wʼababwene, nĩkwa si busana nʼerĩbambwa lyabo, nĩkwa kusangwa bakakwama emikolere yʼerĩkĩrĩrya lya tata wetu ye Abrahamũ, oyo wĩkĩrĩraya isiabwene.

Erisunga Erilaga lya Nyamuhanga busana nʼerĩkĩrĩrya

13Kusangwa Nyamuhanga mwalaga Abrahamũ nʼolubuto luwe ati, Ekihugo kyasyabya kiwe. Erilaga erĩ siryabya busana nʼerikwama Emigambo, nĩkwa kusangwa mwaganzwa mo mutunganene busana nʼerĩkĩrĩrya liwe. 14Kusangwa omwandu amabanika busana nʼerikwama Emigambo, erĩkĩrĩrya ini buyira nʼerilaga lya Nyamuhanga ini buyira. 15Kusangwa Emigambo yikaleta erihitana lya Nyamuhanga, nĩkwa ahate Migambo sihali erĩhalya. 16Busana nʼomwatsi oyũ, Erĩlaga lyʼomwandu ni busana nʼerĩkĩrĩrya. Kusangwa lĩkahĩka busana nʼolukogo lwa Nyamuhanga, erilaga eryo iryatoka eribya kwenene oko lubuto losĩ lwa Abrahamũ. Kandi si busana nʼabo basa abakakwama Emigambo, nĩkwa nibya busana nʼabakakwama erĩkĩrĩrya nga Abrahamũ, oyuli tata wetu ĩtwe bosĩ. 17Ngoko kĩsakĩre kiti, Nabirikuyira mo tata wʼebihanda bingi. Neryo erilaga likabya kwenene uku Nyamuhanga, oyo Abrahamũ ĩkĩrĩraya. Nyamuhanga akaha engebe oko baholĩ, kandi akabũga nʼemyatsi eyiteho iyabyaho. 18Abrahamũ mwĩkĩrĩrya nʼeribya nʼamaha omugulu hate omwatsi wʼeriha amaha. Busana nʼekĩ mwabya tata wʼebihanda bingi, ngoko kyabũgawa kiti, Olubuto lwawe lwasyabya lutya. 19Kandi erĩkĩrĩrya liwe molitoloba omugulu aganĩraya omwatsi wʼomubiri wuwe ĩnĩakĩsĩya iniahola, kusangwa abya wʼemyaka hakũhĩ nʼerĩgana liguma. Kandi kusangwa Sara abya mugumba. 20Abrahamũ mwatatika-tika erĩkĩrĩrya erilaga lya Nyamuhanga, nĩkwa mwayitsinga omwʼĩkĩrĩrya, mwapipa Nyamuhanga. 21Kusangwa abya ĩnĩabĩrĩrĩga omo mutima wuwe ati, Nyamuhanga angatoka erĩberererya erilaga liwe. 22Neryo ngoko kĩsakĩre, Nyamuhanga mwamuganza mo mutunganene. 23Ebĩnywa ebĩ bĩkabũga biti, Mwaganzwa mo mutunganene, mobitasakwa busana naye musa. 24Nĩkwa mobyasakwa busana netu nibya. Ĩtwe twasyaganzwa mo batunganene ĩtũkĩkĩrĩraya ukwʼoyo walũbũkaya Omukama wetu Yesu oko baholĩ. 25Yesu mwatwalwa oko luholo busana nʼamalolo wetu, neryo mwalũbũkĩbwa erituyira mo batunganene.

Currently Selected:

Abanya Roma 4: KB80

Highlight

Copy