Abanya Roma 3

1Neryo nĩ ndũndĩ eribya Mũyũda kwehĩ? Kutse eribana likakuba lwahi kwehĩ? 2Linawite endũndĩ omo myatsi yosĩ. Erĩtsũka Nyamuhanga mwahĩra erĩkangĩrĩrya liwe omo byala byʼAbayũda. 3Neryo abandu bamabya bakalegula, eriregula lyabo lyasyalũsya eritendiregula lya Nyamuhanga kwehĩ? 4Iyihi nʼahake. Nĩkwa Nyamuhanga aminyikale mo wʼekwenene, nʼobuli mundu abye mũbehĩ. Ngoko kĩsakĩre kiti,

Omo bĩnywa byawe ubanike nʼeritunganene,

Kandi ĩwasĩngana omo lubanza.

5Nĩkwa eritenditunganana lyetu lyamakangya eritunganene lya Nyamuhanga, tũbũgekĩ kwehĩ? Nyamuhanga siatunganene omugulu akatuhitanako kwehĩ? (ngabũga ngʼabandu). 6Iyihi, nʼahake. Nyamuhanga amabya isiatunganene, asyatswera ekihugo kyʼati kwehĩ? 7Nĩkwa eribiha lyage lyamakangya ndeke ekwenene ya Nyamuhanga, nʼerimuha olukengerwa, busana nakĩ nyikinatswerawa ngʼomukola-nabi kwehĩ? 8Tũbũge tuti, Tukole nabi busana nʼerireta ebibuya kwehĩ? Abandi bakatulega bati, tũkabũga tutya. Basyasĩngwa ngoko litolere.

Sihali mundu oyutunganene

9Neryo ĩtwe Abayũda tũlabĩre abandi bosĩ kwehĩ? Iyihi, kusangwa twabĩrĩhandĩkĩrĩrya Abayũda nʼabʼebindi Bihanda, abosĩ tuti bali kwʼebibi. 10Ngoko kĩsakĩre kiti,

Sihali mundu nʼomuguma oyutunganene;

11Sihali oyukaminya,

Sihali oyukasonda-sonda Nyamuhanga;

12Abosĩ babirikitira emũsĩke, babiribya buyira,

Sihali oyukakola ebibuya, sihali nʼomuguma;

13Obuno bwabo buli ngʼeyisinda eyĩtalĩbĩre;

Bakateba omo syondimi syabo.

Obuti bwʼesyonzoka bũkalũa omwisi wʼemĩnywa yabo.

14Erĩbũga lyabo Ĩyoswĩre nʼeritakira nʼerikaliha.

15Ebisando byabo bikanguha erĩũta omusasi.

16Erĩherya nʼobũlĩge biri ehosĩ bakaya.

17Sĩbasĩ enzira yʼobuholo.

18Kandi sibetaminya eriubaha Nyamuhanga.

19Neryo tũnasĩ ebyosĩ Emigambo yĩkabũga, ĩkabũga busana nʼabandu abakakwama Emigambo, abandu bosĩ basĩngawe, nʼekihugo kyosĩ kibye kʼolubanza lwa Nyamuhanga. 20Kusangwa sihali mundu oyo wasyatũngananĩbwa embere sya Nyamuhanga busana nʼerikola Emigambo. Kusangwa Emigambo ĩkamĩnyĩsaya abandu ko bakakola nabi.

Nyamuhanga akatũngananaya abandu omwʼĩkĩrĩrya

21Nĩkwa lino kyabĩrĩmĩnyĩsĩbwa ko Nyamuhanga akatũngananaya abandu butsira busana nʼEmigambo. Kandi Emigambo nʼabamĩnyererĩ bĩkatũla omwatsi wʼeritunganene erĩ. 22Nĩkwa Nyamuhanga akatũngananaya abandu busana nʼerĩkĩrĩrya Yesu Kristo. Eritunganene erĩ ni ryʼabandu bosĩ abakĩkĩrĩraya Kristo, kusangwa sialisombola mundu. 23Nĩkwa abandu bosĩ babirikola ebibi, kandi sĩbehĩka oko lukengerwa lwa Nyamuhanga. 24Nyamuhanga akatũngananaya abandu omo lũsũnzo lwʼolukogo luwe busana nʼerĩtongolĩbwa, erikabanika busana na Kristo Yesu. 25Kusangwa Nyamuhanga mwatuma Yesu Kristo erĩũta omusasi wuwe eribya mbanulo busana nʼabandu abakĩkĩrĩraya. Nyamuhanga mwamutuma busana nʼerĩkangya ngoko akatũngananaya abandu. Kusangwa Nyamuhanga mwalindirira, mwakĩrũkya ameso oko bibi ebyakolawa kera; 26iniatoka erĩkangya eritunganene riwe oko mugulu ono. Atya, Nyamuhanga akakangaya kwʼatunganene, kandi kwʼakatũngananaya omundu Oyũkĩkĩrĩraya Yesu.

27Neryo ekyʼeriyipipira kiri hahi kwehĩ? Sikiri. Busana nakĩ sikiri kwehĩ? Ni busana nʼerikola Emigambo kwehĩ? Iyihi, nĩkwa ni busana nʼerĩkĩrĩrya. 28Kusangwa ĩtwe tuti, omundu akatũngananĩbawa busana nʼerĩkĩrĩrya, butsira erikola Emigambo. 29Ko Nyamuhanga ni wʼAbayũda basa kwehĩ? Si Nyamuhanga wʼEbihanda nibya kwehĩ? Ega, ni wʼEbihanda nibya. 30Nyamuhanga ni muguma, naye asyatũngananĩa Abayũda omwʼĩkĩrĩrya lyabo, kandi asyatũngananĩa Ebihanda busana nʼerĩkĩrĩrya lyabo. 31Neryo tũkaganaya Emigambo busana nʼerĩkĩrĩrya kwehĩ? Iyihi, nʼahake. Nĩkwa tũkahanganaya Emigambo.

Currently Selected:

Abanya Roma 3: KB80

Highlight

Copy