Abanya Roma 2

Eritswera lya Nyamuhanga

1Neryo uwe mundu ukatswera omwatsi, suwite ekyʼerĩyĩhambũlyamo. Omugulu ukatswera ogundi, ũkayĩsĩnga. Kusangwa uwe ukatswera, nawe ukakola emyatsi eyo. 2Tũnasĩ ko Nyamuhanga akatswera omo kwenene omugulu akatswera abandu abakakola emyatsi eyĩ. 3Nawe ũtĩkĩ? Uwe ukatswera abakakola emyatsi eyĩ, nawe unemukolayo! Uti wasyabala eritswera lya Nyamuhanga kwehĩ? 4Kutse ukapona obubuya buwe bunene, nʼerisasira liwe, nʼeririndirira liwe kwehĩ? Sĩwasĩ ngoko bubuya bwa Nyamuhanga bũkakũkolaya okwʼibindula omutima nʼerireka ebibi kwehĩ? 5Nĩkwa busana nʼobutsibu bʼomutima wawe owatebinduka, ukayibikira erihitana oko kiro ekyo kyʼerihitana lya Nyamuhanga nʼeritswera litunganene riwe lyasyabĩsũlwa. 6Nyamuhanga asyaliha obuli mundu ngʼemĩbĩrĩ yiwe ko yiri. 7Nyamuhanga asyaha engebe yʼerikota oko bakayitsingirira omo mikolere yowene, ibakasonda olukengerwa, nʼerĩsĩkya nʼebitehola. 8Nĩkwa erihitana nʼerikarama lya Nyamuhanga lyasyabya oko bakayanza, nʼerigana erĩowa ebyʼekwenene, nĩkwa bakakwama ebitatunganene. 9Hasyabya eriagalwa nʼobũlĩge oko buli mundu oyukakola ebibi, erĩtsũka oko Bayũda, nʼakandi oko mundu wʼebindi Bihanda. 10Nĩkwa hasyabya olukengerwa, nʼerĩsĩkĩbwa, nʼobuholo oko buli mundu oyukakola ebibuya, erĩtsũka oko Bayũda, nʼakandi oko bandu bʼebindi Bihanda. 11Kusangwa Nyamuhanga sialisombola ebitaga.

12Nĩkwa abosĩ abakakola nabi, isibawite Emigambo, basyahera butsira Migambo. Kandi abosĩ abakakola nabi, ibanawite Emigambo, basyatswerwa omo Migambo. 13Kusangwa Nyamuhanga Sĩalĩtũngananaya abakowa Emigambo omo matwĩ masa. Nĩkwa abakakola ebyo Migambo ikahana, bo basyatũngananĩbwa. 14Kusangwa Ebihanda sibiwite Migambo nĩkwa omugulu bakakola ebyo Migambo ikategeka nʼomutima owene, bakahĩra emigambo yabo, nomo batanawite Emigambo. 15Kusangwa bakakangaya emikolere yʼEmigambo ngʼĩsakĩre omo mitima yabo. Obunya-mutima bwabo bũkakangaya ko biri bitya. Amalengekanĩa wabo akahandikirirabo kutse erihanganirabo. 16Engulu Yowene eyo ngatũlaganaya iti, Ko kyasyabya kitya oko kiro Nyamuhanga asyatswera, omwisi wa Kristo Yesu, emyatsi nʼamalengekanĩa wʼabandu ebĩbĩsamĩre.

Abayũda nʼEmigambo

17Nawe, wamayahula mo Mũyũda, ukayiketera Emigambo, kandi ukayihalamba umu Nyamuhanga. 18Kandi uti ũnasĩ erisonda lya Nyamuhanga, kandi uti ũnasĩ eriyisoga emyatsi itolere, kusangwa wabiriyga Emigambo. 19Kandi uti wabiriminya kʼuli mũsondolĩ wʼesyondĩmatĩme, ekyakakala busana nʼabandu abali omo mwĩrĩmya, 20kandi uli mũkangĩrĩrya wʼabakĩrũ, nʼomwĩgĩsya wʼabana. Uti uwite omo Migambo amenge gosĩ nʼekwenene. 21Neryo uwe ũkakangĩrĩraya abandi, sũlĩyĩkangĩrĩraya kwehĩ? Uwe ũkatũlago uti, omundu syĩbe, nawe ũkĩba kwehĩ? 22Ũkabũga uti omundu ĩsyasĩngĩra, nawe ũkasĩngĩra kwehĩ? Uwe ukagana esyosanamu syo kutsibu, ũkahũnga ebindu omo syohekalũ kwehĩ? 23Ukayihalamba omo Migambo, sulihemula Nyamuhanga omugulu ũkahalaya oko Migambo kwehĩ? 24Kusangwa kĩsakĩre kiti, Erĩna lya Nyamuhanga likatsumawa omo katĩkatĩ kʼEbihanda, busana nenyũ Abayũda.

25Kusangwa eribana liwite endũndĩ ndeke, wamabya ukakola Emigambo. Nĩkwa wamahalya oko Migambo, eribana lyawe likabya ngʼeritendibana. 26Neryo omundu oyutabwene amakwama ebikahamulawa nʼEmigambo, Nyamuhanga siendisyamuganza ngʼoyubwene kwehĩ? 27Neryo omundu oyutabwene, kusangwa akakwama ndeke emyatsi yʼEmigambo, siendisyabatswera kwehĩ? nĩkwa, nomo munawite ebĩnywa byʼEmigambo nʼakandi mũkabanĩbawa, nĩkwa mũkahalaya oko Migambo. 28Kusangwa omundu sĩ Mũyũda busana nʼomubiri, kutse erĩbanĩbwa si ryʼomubiri. 29Nĩkwa omundu nĩ Mũyũda oyuli Mũyũda omo mutima wuwe, ĩnĩabĩrĩbanĩbwa omo mutima busana nʼomũbĩrĩ wʼOmũlĩmũ Abũyĩrĩre, butsira nʼebĩnywa byʼEmigambo. Omundu oyo akapipawa na Nyamuhanga, butsira bandu.

Currently Selected:

Abanya Roma 2: KB80

Highlight

Copy