Abanya Roma 1

Erĩkerya abali eRoma

1Ĩngye Paũlo, omugombe wa Kristo Yesu nʼomukwenda oyo Nyamuhanga abirikira nʼerimusombola busana nʼEngulu Yowene yiwe. 2Engulu Yowene eyĩ Nyamuhanga alagayo erĩmbere omo muno wʼabamĩnyererĩ buwe, kandi ĩsakĩre omo Masako abũyĩrĩre. 3Engulu Yowene eyĩ ni yʼomugala wuwe, Omukama wetu Yesu Kristo. Naye abutawa ngʼomundu omo lubuto lwa Dawĩdĩ. 4Nĩkwa omo Bunyamuhanga buwe bũbũyĩrĩre, erĩlũbũka liwe oko baholĩ lĩkakangaya omo bũtokĩ bunene, Yesu kwʼali Mugala wa Nyamuhanga. 5Busana na Kristo twabirihabwa olukogo, kandi twabĩrĩhĩrwa mo bakwenda buwe, erisondola abandu bʼebihanda byosĩ erĩmwĩkĩrĩrya nʼerimukenga. 6Nenyũ nibya ĩnywe muli eRoma, Nyamuhanga abiribabirikira eribya bandu ba Yesu Kristo.

7Neryo ngabasakira ĩnywe, abʼeRoma, abo Nyamuhanga abirianza nʼeribabirikira eribya bana buwe. Nyamuhanga Tata wetu, nʼomukama Yesu Kristo, abahe olukogo nʼobuholo.

Paũlo akasonda eriya eRoma

8Ngatsũka eriha Nyamuhanga wage yʼewasĩngya busana na Yesu Kristo, busana nenyũ ĩnywe bosĩ. Kusangwa erĩkĩrĩrya lyenyũ lĩkatũlawa omo kihugo kyosĩ. 9Kusangwa Nyamuhanga nĩ mũlangĩrĩ wage, oyo ngakolera nʼomutima wage gosĩ omo mũbĩrĩ wʼEngulu Yowene yʼomugala wuwe, anasĩ ngoko ngabahula emigulu yosĩ omwʼisaba, lyage, butsira erĩũmbya. 10Ngabũlaya omwʼisaba lyage nyiti omwʼisonda lya Nyamuhanga, kumbe Ĩnahĩka eyo eribabana. 11Kusangwa nyĩbakwĩre olukando lwʼeribalolako, inatoka eribaha emyatsi yʼOmũlĩmũ, imwatoka erihangana ndeke. 12Nyiti itwatoka erĩsĩkanĩa emitima omwʼĩkĩrĩrya lyenyũ nʼeryage ĩtwe bosĩ.

13Nyanzĩre imwaminya ndeke, balĩkyetu, ko nalenga esyongendo nyingi eriyabalolako. Nĩkwa nabĩrĩkakĩrĩbwa kandi nʼakandi. Nabya nyanzĩre eribana abandu busana na Nyamuhanga omo katĩkatĩ kenyũ, ngoko twabanabo, omo katĩkatĩ kʼebindi bihanda. 14Indi mʼomwĩnda wʼabandu bosĩ, abasĩ ebarua nʼabayĩra, owʼamenge, nʼoyũtasĩkĩ. 15Neryo ĩngye indi nʼomũhwa wʼerĩbatũlĩra Engulu Yowene, ĩnywe muli eRoma.

Obũtokĩ bwʼEngulu Yowene

16Kandi sĩnyĩkwĩre esĩsonĩ busana nʼEngulu Yowene, kusangwa nĩ bũtokĩ bwa Nyamuhanga, obũkalamaya obuli mundu Oyũkĩkĩrĩraya, erĩtsũka oko Bayũda, nʼakandi oko bandu bʼebindi bihanda nibya. 17Kusangwa Engulu Yowene ĩkatũbĩsũlĩra ngoko Nyamuhanga akatũngananaya omundu embere siwe, omwʼĩkĩrĩrya lisa, ngoko kĩsakĩre kiti, Nĩkwa oyukatunganana embere sya Nyamuhanga busana nʼerĩkĩrĩrya asyakota.

Obutsweka bwʼabandu

18Kusangwa erikarama lya Nyamuhanga lyabĩrĩbĩsũlwa, lĩkalũa elubula busana nʼebyosĩ ebitatunganene byʼabandu, nʼebitekenga Nyamuhanga. Kusangwa omo nzira nyibi yabo bakakakĩraya ekyʼekwenene eriminyikala. 19Kusangwa ebyasĩbwe bya Nyamuhanga byabĩrĩmĩnyĩkalĩbwa kubo, kusangwa Nyamuhanga abĩrĩmĩnyĩsyabo. 20Erĩtsũka omugulu Nyamuhanga ahangika ekihugo, emyatsi ya Nyamuhanga eyitalolawako, yʼobũtokĩ buwe bwʼerikota, nʼObunyamuhanga buwe, byabiriminyikala ndeke-ndeke omo bindu ebyo ahangika. Neryo abandu sibawite ekyʼerĩyĩhambũlyamo. 21Kusangwa nomo banabya basĩ Nyamuhanga, mobatamũsĩkya nga Nyamuhanga, kutse erimuha ewasĩngya. Amalengekanĩa wabo abiribya buyira, kandi omwĩrĩmya abiringira omo mitima mĩkĩrũ yabo. 22Bakayihalamba ngʼabʼamenge, kwesĩ ibabiribya bakĩrũ. 23Mobahĩnganĩa olukengerwa lwa Nyamuhanga olutetsanda, omo bĩsosekanĩo byʼabandu abakatsanda, nʼebyʼesyonyonyũ, nʼebyʼesyonyama, nʼesikakululuka.

24Busana nʼemyatsi eyĩ, Nyamuhanga mwalekabo ati bakwame esyongumbu syʼemitima yabo, nʼerikola ebĩtĩsĩrĩre. Kandi bakakola emyatsi yʼesĩsonĩ omo mibiri yabo. 25Bakahĩnganaya ekwenene ya Nyamuhanga omo mabehĩ, ĩbaramya nʼerikolera ekyahangikawa butsira Omũhangĩkĩ oyutolere eripipwa kera na kera! Amina.

26Busana nʼebĩ, Nyamuhanga mwalekabo erikwama esyongumbu syabo syʼesĩsonĩ, Nʼabakalĩ ĩbakahĩnganaya emyatsi yʼobũkalĩ omo myatsi eyite yʼobũkalĩ. 27Nʼabalume nabo ibakaleka emyatsi eyitolere erikola nʼomũkalĩ, ibakabeberera omo syongumbu syabo, omulume iniakakola nʼogundi mulume ebyʼesĩsonĩ. Aba bakabana omwisi wabo eririha eritolere erĩhalya lyabo.

28Kusangwa bakagana erĩrĩga Nyamuhanga omo bũlengekanĩa bwabo, Nyamuhanga mwalekabo omo bũlengekanĩa bũtsandĩre erikola emyatsi itatolere. 29Boswĩre mwʼebitatunganene, nʼebibi, nʼerirumwa, nʼomwaga, boswĩre nʼeritsura, erĩĩta, nʼamalwa, eriteba, erirega abandi, nʼeritonga nabi, 30bakalega abandu, bakakwa Nyamuhanga yʼobusu, bakapona, bakayanza, bakayihalamba, bakayibanira emĩsĩndo yosĩ yʼebibi. Kandi Sĩbalĩowa ababutabo. 31Sibaliminya, bakatwa erilagana lyabo, sibawite olwanzo, sibeganyira mundu. 32Kandi nomo banabya basĩ Emigambo ya Nyamuhanga eyĩkabũga iti, abakakola emyatsi eyĩ, batolere ibahola; nomo banabya basĩ ebĩ, bakakolabyo, kandi bakasĩma abandu abakakolabyo.

Currently Selected:

Abanya Roma 1: KB80

Highlight

Copy