Abanya Roma 15

Ũtsemesaye balĩkyenyũ, sũyĩtsemesaye

1Nĩkwa ĩtwe tuli nʼamaka, litolere ĩtwawatĩkya obolo bwʼabandu abate nʼamaka, butsira erĩyĩtsemesya. 2Obuli mundu kwĩtwe atsemesaye mũlĩkyabo, busana nʼerĩmũwatĩkya nʼerĩmũhanganĩa ndeke. 3Kusangwa Kristo mwatayĩtsemesya; nĩkwa kĩsakĩre kiti, Ebĩtsũmĩ ebyo bakutsuma mobyambĩkako. 4Kusangwa ebyosĩ ebyasakawa erĩmbere omo Masako byasakawa busana nʼerĩtũkangĩrĩrya. Neryo Amasako akatuha eriyitsingirira nʼerihanda omutima, itwatoka eribya nʼamaha. 5Nĩkwa Nyamuhanga oyukaha erĩyĩyĩnĩa nʼerihanda omutima, abahe obũlengekanĩa bwa Kristo Yesu. 6Neryo ĩnywe bosĩ haguma nʼomulenge muguma, imwapipa Nyamuhanga Tata wʼOmukama wetu Yesu Kristo.

Engulu Yowene nĩ yʼAbayũda nʼEbihanda haguma

7Neryo mũkokanaye ngoko Kristo atũkokaya, Nyamuhanga abane olukengerwa. 8Kusangwa ngabũga nyiti, Kristo abiribya omugombe oko Bayũda busana nʼerĩhanganĩa ekwenene ya Nyamuhanga, nʼerĩberererya esyondagane siwe oko boso-kulu. 9Kandi Kristo atokesaye ebihanda ibyapipa Nyamuhanga busana nʼeriganyira liwe. Ngoko kĩsakĩre kiti,

Neryo busana nʼekyo, nasyakupipa omo katĩkati kʼebihanda,

Nasyimba ebikapipa erĩna lyawe.

10Nʼakandi, kiti,

Mutseme, ĩnywe Bihanda, haguma nʼabandu ba Nyamuhanga.

11Nʼakandi, kiti,

Mupipe Omwami Mukulu, ĩnywe Bihanda byosĩ,

Nʼabandu bʼebihanda byosĩ bamupipe!

12Nʼakandi Ĩsaya akabũga ati,

Omwana wa Yese asyasa,

Iye asyahanganĩbwa eritabala oko Bihanda.

Nʼebihanda basyamũhĩra kwʼamaha wabo.

13Nĩkwa Nyamuhanga, oyukaleta maha, abosũlaye nʼobutseme bosĩ nʼobuholo bosĩ busana nʼerĩmwĩkĩrĩrya, amaha wenyũ akanyirire kutsibu omo bũtokĩ bwʼOmũlĩmũ Abũyĩrĩre.

Ekyaleka Paũlo iniasaka ebarua

14Balĩkyetu, nyĩnasĩ ndeke ko moswĩre nʼobubuya, mwabiribana eriminya ebyo byo kutsibu, kandi mukatoka erihanana. 15Nĩkwa nabiribasakira butsira buba omo myatsi eyo erĩbĩbũkya. Ngabũga butsira buba kusangwa Nyamuhanga mwamba ekibuya omo lukogo luwe, 16eribya mugombe wa Yesu Kristo oko Bihanda. Ngakola ngʼomũhererĩ busana nʼerĩtũla Engulu Yowene eyĩkalũa uku Nyamuhanga, Ebihanda bibye buhere obũkasĩmawa na Nyamuhanga, obo Mũlĩmũ Abũyĩrĩre abirihigula. 17Neryo busana nʼerimatikana na Kristo Yesu nabiribana ekyangaleka inayihalamba omo mũbĩrĩ wa Nyamuhanga. 18Kusangwa sindiendirenga eriahula ogundi mwatsi go nʼogo Kristo abirikola omo byala byage busana nʼerisondola Ebihanda erĩowa Nyamuhanga omo bĩnywa nʼomo mĩbĩrĩ, 19busana nʼobũtokĩ bwʼebitiko-tiko nʼebyʼeriswekera, omo bũtokĩ bwʼOmũlĩmũ. Neryo nabĩrĩtũla ndeke-ndeke Engulu Yowene erĩtsũka eYerũsalema nʼomo bihugo hakũhĩ naho, nʼerĩhĩka oko kihugo kyʼeĨlĩrĩko. 20Litya nyinemusonda erĩtũla Engulu Yowene aho Kristo ate ahulirwa, ĩsĩnangahĩmba oko kibanza kyʼogundi mundu. 21Ngoko kĩsakĩre kiti,

Abatetabwirwa engulu yiwe, basyalangira,

Nʼabandu abate bowa, basyaminya.

Paũlo akasonda erĩhĩka eRoma

22Busana nʼomwatsi oyũ, nabĩrĩkakĩrĩbwa esyongendo nyingi erĩbahĩkako. 23Nĩkwa lino nabiribuga erikola omo bihugo ebĩ. Kandi kusangwa nabiribya nʼolukando lwʼerĩbahĩkako emyaka mingi, 24lino indi nʼamaha wʼeribalolako omugulu ngalabira eSpania. Neryo namabibunga haguma nenyũ oko katambĩ, ĩmwanyĩwatĩkya eriyayo. 25Nĩkwa lino ngaya eYerũsalema busana nʼerĩwatĩkya abandu ba Nyamuhanga abaliyo. 26Kusangwa kyabĩrĩtsemesya amakanĩsa wʼeMakedonĩa nʼeAkaya erĩlabya ekĩbo busana nʼabera abali omo katĩkatĩ kʼabandu ba Nyamuhanga eYerũsalema. 27Ega mokyatsemesya amakanĩsa, kandi bali nʼomwĩnda wʼerikola batya. Kusangwa Abayũda mobawatĩkya abʼEbihanda omo myatsi yʼekĩrĩmũ neryo abʼEbihanda bali nʼomwĩnda wʼerĩwatĩkya Abayũda omo myatsi eyĩkawatĩkaya omubiri. 28Namabibuga omũbĩrĩ mubuya oyũ, nʼerihabo ebyosĩ ebiri omo kĩbo kyabo, nasyaya eSpania, nʼerilaba ewenyũ omo nzira. 29Nyĩnasĩ omugulu nasyahĩka ewenyũ, nasyasa nʼomũyĩsa gosĩ wa Kristo.

30Neryo balĩkyetu, ngabalembalemba, busana nʼomukama wetu Yesu Kristo, nʼakandi busana nʼolwanzo olo Mũlĩmũ akaha, muhatikane Nyamuhanga haguma nage omwʼisaba lyenyũ busana nage, 31nyĩteyĩbawe oko bandu batĩowa eYũdea; kandi omũbĩrĩ wage eYerũsalema asĩmawe nʼabandu ba Nyamuhanga eyo. 32Litya inatoka erĩbahĩkako nʼobutseme omwʼisonda lya Nyamuhanga, nʼerĩyĩsyandira ndeke busana nʼerĩyabalũngũlĩra. 33Neryo Nyamuhanga oyukatuha Obuholo abye haguma nenyũ ĩnywe bosĩ. Amina.

Currently Selected:

Abanya Roma 15: KB80

Highlight

Copy