Abanya Roma 14

Simutswere mũlĩkyenyũ

1Nĩkwa mũkokaye oyuli molo omwʼĩkĩrĩrya liwe. Nĩkwa sukube buhaka naye busana nʼamalengekanĩa wuwe. 2Omundu muguma akĩkĩrĩraya ati anganalya ebyosĩ, nĩkwa oyuli molo akalya esyomboka nyisa. 3Omundu oyukalya ebyosĩ siapone oyuterya ebyosĩ. Nʼoyuterya ebyosĩ siatswere oyukalya ebyosĩ, kusangwa Nyamuhanga abĩrĩmũlĩga. 4Nawe uwendi uti ukatswera omugombe wʼogundi kwehĩ? Embere syʼOmukama wuwe asyasĩngana kutse asyasĩngwa. Asyasĩngana ndeke kusangwa Omukama awite obũtokĩ bwʼerĩmũhanganĩa ndeke.

5Omundu muguma akaganza ekiro kiguma mo kikulu kwilaba ekindi, nʼogundi akaganza ebiro byosĩ ngʼebindi. Obuli mundu aminye ndeke ebyo amalĩga omo bũlengekanĩa buwe. 6Oyukakenga ekiro kiguma, akakengakyo busana nʼomukama. Nʼoyukalya ebyosĩ akalya nʼerikenga Omukama, kusangwa akaha Nyamuhanga yʼewasĩngya; nʼoyuterya ebyosĩ akakola atya busana nʼerikenga Omukama, kandi akaha Nyamuhanga yʼewasĩngya. 7Kusangwa sihali oyukabyaho busana naye ĩyowene-wene, kandi sihali oyukahola busana naye ĩyowenewene. 8Kusangwa twamabyaho tukabyaho busana nʼomukama, kandi twamahola tukahola busana nʼomukama. Neryo, twamabyaho kutse twamahola, tuli bʼOmukama. 9Kusangwa Kristo mwahola neryo mwaswabyaho, atoke eribya Mukama wʼabaholĩre nʼabaliho. 10Nĩkwa nawe, busana nakĩ ukatswera mũlĩkyenyũ kwehĩ? Kandi nawe busana nakĩ ukapona mũlĩkyenyũ kwehĩ? Kusangwa ĩtwe bosĩ twasyahangana embere wʼekĩtũmbĩ kyʼeritswera kya Nyamuhanga. 11Kusangwa kĩsakĩre kiti,

Omukama ati, Ĩngye nyiriho!

Obuli mundu asyakũkama embere syage,

Nʼobuli mundu asyatũlago ko nyiri Nyamuhanga.

12Neryo obuli mundu asyakanganĩa Nyamuhanga ebyo akola.

Suleke mũlĩkyenyũ akatwĩkala

13Neryo tuleke eritswerana, nĩkwa mũbũge muti, omundu sĩahĩre kindu ekyangatwĩkalya mũlĩkyabo, kutse erireka akawa omo bibi. 14Nyĩnasĩ, kandi nabĩrĩmĩnyĩsĩbwa busana nʼomukama Kristo ko hate kindu kĩtĩsĩrĩre ĩkyokyene; nĩkwa omundu amaganĩrya kwʼekindu kĩtĩsĩrĩre, busana naye, kĩtĩsĩrĩre. 15Wamĩta mũlĩkyenyũ yʼobũlĩge busana nʼebyo ukalya, sulirendera omo lwanzo. Suleke akalyo kawe kakaherya omundu oyo Kristo aholera. 16Neryo simuleke ekiri kibuya ũkwʼĩnywe kikatsumwa ngʼekibi. 17Kusangwa obwami bwa Nyamuhanga si mwatsi wʼerirya kutse wʼerĩpũlya, nĩkwa ni butunganene, nʼobuholo, nʼobutseme obo Mũlĩmũ Abũyĩrĩre akaha. 18Kusangwa oyukakolera Kristo atya akatsemesaya Nyamuhanga, kandi abandu bakamũsĩma.

19Neryo tukwame emyatsi eyikaleta Obuholo nʼebĩkatũhanganaya. 20Busana nʼakalyo Sũtsandaye omũbĩrĩ wa Nyamuhanga. Ebyosĩ bĩsĩrĩre, nĩkwa ni kibi busana nʼoyukalyabyo amaleka ogundi erikola ebibi. 21Sĩryowene erirya esĩswĩ kutse erĩpũlya ebĩnyũ, kutse erikola ekĩndũkĩ ekikaleka mũlĩkyenyũ iniakola ebibi. 22Ekyo ũkĩkĩrĩraya nga kyowene, ubye nakyo ĩwowene embere sya Nyamuhanga. Obutseme buli nʼoyute nʼomusango omo mutima wuwe busana nʼebyo akasĩma. 23Nĩkwa oyukatika-tikira ekyo akalya ali nʼomusango, kusangwa erikola liwe siriwite erĩkĩrĩrya. Nʼekĩndũkĩ akakola atĩkĩrĩrye ni kibi.

Currently Selected:

Abanya Roma 14: KB80

Highlight

Copy