Abanya Roma 16

Emyatsi yʼerĩkerya lya Paũlo

1Ngasĩma eribatumira Foĩbe, Omũlĩkyetu wʼobũkalĩ, oyukakolera ekanĩsa yʼeKenkũrea. 2Mũmũkokaye omo lĩna lyʼomukama ngoko litolere busana nʼabandu ba Nyamuhanga, Kandi mũmũwatĩkaye omo buli mwatsi ali nago bwaga bwʼerĩwatĩkĩbwa nenyũ. Kusangwa abĩrĩwatĩkya abandu bangi, nage nibya.

3Mũkeraye Pĩrĩsĩla na Akwĩla abakakola nage omo mũbĩrĩ wa Kristo Yesu, 4kandi mobatalanda oko ngebe yabo busana nʼerĩnyĩlamya. Ngahabo ewasĩngya nʼesyokanĩsa syosĩ syʼEbihanda nasyo sikahabo ewasĩngya. 5Kandi mũkeraye ekanĩsa eyiri omo nyũmba yabo. Mũkeraye omwanze wage ye Epenetũ, oyo watsũka erĩkĩrĩrya Kristo eAsĩa. 6Mũkeraye Marĩa oyo wakola kutsibu busana nenyũ. 7Mũkeraye Andronĩka na Yũnĩa abʼekihanda kyetu, ababya omo mũlĩkĩ haguma nage. Kandi ni bakulu omo katĩkatĩ kʼabakwenda, kandi mobĩkĩrĩrya Kristo embere kwĩngye. 8Mũkeraye Ampũlĩato omwanzewage omwisi wʼOmukama. 9Mũkeraye Ũrbano, oyukakola haguma netu omo mũbĩrĩ wa Kristo. Kandi mũkeraye omwanze wage ye Stakĩ. 10Mũkeraye Apele Oyũkasĩmawa omo mũbĩrĩ wa Kristo. Mũkeraye abʼomwa Arĩstabũlo. 11Mũkeraye Herodĩo wʼekĩtũnga kyetu. Mũkeraye abʼomwa Narkĩso, abamatikene na Kristo. 12Mũkeraye Tĩrĩfena na Tĩrĩfosa, abakakola omũbĩrĩ wʼOmukama. Mũkeraye omwanze wetu ye Persĩ, oyo wabirikola kutsibu omo mũbĩrĩ wʼOmukama. 13Mũkeraye Rũfo, Omukristo mukulu omo mũbĩrĩ wʼOmukama. Mũkeraye nyĩnya wuwe, ni koyo wage nibya. 14Mũkeraye Asĩnkrĩto na Fũlego, na Herme, na Patroba, na Herma, nʼabalĩkyetu abali haguma nabo. 15Mũkeraye Fĩiologo, na Yũlĩa, na Nereo, na mwali wabo na Olĩmpa, nʼabandu bosĩ ba Nyamuhanga abali haguma nabo.

16Mũkeranaye omwʼiwanako erĩbũyĩrĩre. Esyokanĩsa syosĩ sya Kristo sĩkabakeraya.

Ebihano byʼeribugirira ebarua

17Balĩkyetu, ngabalemba-lemba, mũtegaye busana nʼabo bakaleta erigabana, nʼemyatsi yʼerĩtwĩkalya, abatekwama erĩkangĩrĩrya eryo mwakangĩrĩrĩbawa. Musagebo. 18Kusangwa abandu ngʼabo sibekolera Omukama wetu Kristo, nĩkwa bakakolera esyonda syabo. Kusangwa bakateba emitima yʼabandu bate nʼamenge, omo bĩnywa bitendere nʼebyʼekĩsehya. 19Kusangwa engulu yenyũ ambu mũkowa Kristo, yabĩrĩhĩka oko bandu bosĩ; neryo ngatsema kutsibu busana nenyũ. Nĩkwa nyanzĩre mubye bʼamenge omo bibuya, kandi mubye ngʼabalere omo myatsi yʼebibi. 20Kandi Nyamuhanga oyukatuha Obuholo, asyahĩnolera Satanĩ yo lũba omwisi wʼebisando byenyũ. Olukogo lwʼOmukama wetu Yesu lubye nenyũ.

21Tĩmoteo oyukakola haguma nage akabakeraya; kandi Lũkĩo na Yasona, na Sosĩpatere abʼekihanda kyetu, bakabakeraya.

22Ĩngye Teretĩo, oyukasaka ebarua eno, ngabakeraya omwisi wʼOmukama.

23Gayo akabakeraya. Ĩngye indi mũgenĩ wuwe, kandi ekanĩsa ĩkahĩndana omo nyũmba yiwe. Erasto omũbĩkĩ wʼesyofranka (esyoshĩllĩng) syʼomũyĩ akabakeraya. Kandi mũlĩkyetu Kwarto akabakeraya.

[ 24Olukogo lwʼOmukama wetu Yesu Kristo lubye nenyũ ĩnywe bosĩ. Amina.]

Tupipe Nyamuhanga

25Tupipe Nyamuhanga! Iye akatoka erĩbahanganĩa ndeke omo Ngulu Yowene eyo ngatũla, omwatsi wa Yesu Kristo, erĩkũmbo eryabĩsawa omo syondengo sya kera. Nĩkwa lino lyabĩrĩbĩsũlwa, 26kandi lyabĩrĩmĩnyĩkalĩbwa omo Masako wʼabamĩnyererĩ. Neryo busana nʼekihano kya Nyamuhanga Wʼerikota, omwatsi oyũ abĩrĩmĩnyĩsĩbwa oko bihanda byosĩ, ibatoka erĩkĩrĩrya Kristo nʼerĩmowa.

27Neryo uku Nyamuhanga oyuwite amenge ĩyowene, ukwʼiye habye olukengerwa busana na Yesu Kristo, kera na kera! Amina.

Currently Selected:

Abanya Roma 16: KB80

Highlight

Copy