Abanya Roma 13

Erikenga abatabalĩ

1Obuli mundu akenge abatabalĩ bʼekihugo. Kusangwa sihali ehamũlĩ eyĩtalũa uku Nyamuhanga, nʼabʼehamũlĩ baliho, bahĩrĩrweho na Nyamuhanga. 2Neryo oyukalwa nʼabenye ehamũlĩ akalwa nʼekilayiro kya Nyamuhanga, nʼabakalwa nʼabatabalĩ basyayiretera erĩsĩngwa. 3Kusangwa abatabalĩ sibaliho busana nʼerĩũbahya oyukakola ndeke, nĩkwa busana nʼerĩũbahya oyukakola nabi. Ũnanzĩre eritindiubaha omundu wʼehamũlĩ kwehĩ? Ego, Ukole ndeke neryo basyakupipa. 4Kusangwa abatabalĩ ni bagombe ba Nyamuhanga busana nʼerikukola ndeke. Nĩkwa Wamakola ekibi, wubahe; kusangwa sialiheka omũyalĩ go busa; kandi ni mugombe wa Nyamuhanga oyũkakĩsaya busana nʼerireta erihitana oko yukakola ekibi. 5Neryo litolere iwakengabo, butsira busana nʼerihitana lya Nyamuhanga lisa, nĩkwa busana nʼobunya-mutima bwawe.

6Kandi busana nʼekĩ mukasola nibya, kusangwa abatabalĩ ni bagombe ba Nyamuhanga omugulu bakakola omũbĩrĩ wabo. 7Mulihe abosĩ bʼemĩnda yabo, omusolo oko yutolere omusolo, engemu oko mwenye ngemu, erikenga ukwʼoyo wangakengwa, erĩsĩkya ukwʼoyo wangasĩkĩbwa.

Mwanzane

8Subye nʼomwĩnda wʼomundu nʼomuguma, lye nʼerianzana lisa; kusangwa Oyukanza mũlĩkyabo abĩrĩberererya Emigambo. 9Kusangwa ebihano biti, Isiwasĩngĩra, Ĩsĩwĩta, Ĩsĩwĩba, isiwarumawa. Kandi hamabya ekindi kihano, ebyosĩ bĩkahĩkana omo kihano kiguma kiti, Wanze mũlĩkyenyũ ngoko ukayanza. 10Olwanzo silulikola mũlĩkyabo yo kibi. Neryo olwanzo lũkaberereraya Emigambo yosĩ.

11Neryo ĩmũnasĩ omugulu oyũ, nĩ ndambĩ yenyũ yʼeribuka omo tũgotserĩ; kusangwa erilama liri hakũhĩ netu, kwilaba ekiro twĩkĩrĩraya. 12Obũtũkũ bũkĩsĩya ibwakya, eritungi iryasa. Neryo tuleke emĩbĩrĩ yʼomwĩrĩmya, twambale ebindu byʼamalwa byʼekyakakala. 13Tulendere ngoko litolere omugulu bukere, situtamire nʼerĩkũnda, situbye nʼoburagane nʼesyongumbu nyibi, situlwe, situbye nʼobũha. 14Nĩkwa muleke Yesu Kristo abye oyukabalwira nʼebindu biwe byʼamalwa; Simubye nʼobũlengekanĩa bwʼomubiri erikwama esyongumbu syago.

Currently Selected:

Abanya Roma 13: KB80

Highlight

Copy