Abanya Roma 12

Engebe nyihya omwisi wa Kristo

1Balĩkyetu, ngabalemba-lemba busana nʼeriganyira ĩnene lya Nyamuhanga, nyiti, muyihe uku Nyamuhanga ngʼobuhere obuliho, kandi obũbũyĩrĩre, obũkamũtsemesaya. Erĩ nĩ ʼramya erikutolere. 2Sĩmũsosekanĩbawe nʼemyatsi yʼekihugo kino, nĩkwa muleke Nyamuhanga eribahindula nʼeribaha obũlengekanĩa buhya-buhya. Mutya mwasyatoka eriminya erisonda lya Nyamuhanga. Erisonda erĩ ni ribuya, kandi lĩkatsemesaya, kandi lĩhĩkene.

3Kusangwa Nyamuhanga abirimba olukogo olũ, ngabwira obuli mundu omo katĩkatĩ kenyũ nyiti, siayiganze eribya mukulu kwilaba aho atolere, nĩkwa aganĩraye ndeke nʼeriyitswera omo lulengo lwʼerĩkĩrirya olo Nyamuhanga abiriha oko buli mundu. 4Tuwite ebĩtsũko bingi oko mubiri muguma, nʼobuli kĩtsũko kiwite omũbĩrĩ wakyo. 5Netu tutya tuli bangi, tuli mubiri muguma itumatikene na Kristo, kandi tuwatene haguma ngʼebĩtsũko mĩsĩndo-mĩsĩndo byʼomubiri muguma.

6Kandi kusangwa tuwite olũsũnzo mĩsĩndo-mĩsĩndo olũkalũa uku Nyamuhanga busana nʼolukogo olo abirituha tukole mulo. Twamabya tuwite olũsũnzo lwʼerĩtũla Engulu Yowene, tũtũleyo omo lulengo lwʼerĩkĩrĩrya lyetu. 7Kumbe nĩ lũsũnzo lwʼomũbĩrĩ, tukole. Kumbe amatuha erĩkangĩrĩrya, tũkangĩrĩraye abandu. 8Amatuha erĩsĩkya emitima yʼabandu, tukole tutya. Amatuha erĩhĩtya, tũhĩtaye ndeke. Oyukasondola asondole nʼomũhwa. Oyukaganyira abandi akole atya nʼobutseme.

Eritondeka lyʼOmukristo

9Olwanzo lubye butsira eriteba. Ũkwe ekibi kyo nye. Ukwamirire ekibuya. 10Mwanzane kutsibu ngʼabasubeneko. Mukengane nʼeribya nʼomutima wʼerĩsĩkya abandi. 11Mukole nʼomũhwa butsira bugata. Mubye nʼomũhwa munene omo kĩrĩmũ, nʼerikolera Omukama. 12Mutseme omo maha, mũyĩyĩnaye omo malĩge, eriyitsingirira omwʼisaba, 13musangire omo bwaga bwʼabandu ba Nyamuhanga, mũkokaye abagenĩ.

14Mutsumule abakabendereraya; mutsumulebo, simutakirebo. 15Mutseme haguma nʼabakatsema, mulire haguma nʼabakalira. 16Mubye nʼobũlengekanĩa buguma omo katĩkatĩ kenyũ; Simubye nʼobũlengekanĩa bwʼeriyiheka, nĩkwa musibe nʼabahehere. Simuyiganze ngʼabʼamenge.

17Omundu amakukolera ekibi, sumulihe ekibi. Mũganĩraye ekitunganene omo meso wʼabandu bosĩ. 18Kyamatokekana, oko luhande lwenyũ, mubye nʼobuholo oko bandu bosĩ. 19Abanze, sĩmũyĩkĩsaye, nĩkwa muleke erihitana lya Nyamuhanga likole, kusangwa kĩsakĩre kiti, Omukama ati, Erĩkĩsya ni ryage. Nasyaliha. 20Kandi kĩsakĩre kiti, Enzĩgũ yawe yamawira, iwamwaganula, amakwa enyota, iwamuha awʼerĩpũlya; kusangwa mwamakola mutya imwamalunda amakala wʼomuliro oko mutwe wuwe. 21Suleke ekibi kĩkakũkĩnda, nĩkwa ũkĩnde ekibi omo kibuya.

Currently Selected:

Abanya Roma 12: KB80

Highlight

Copy