Abanya Roma 11

1Neryo ngabũlaya nyiti, Nyamuhanga abirigana abandu buwe kwehĩ? Iyihi nʼahake! Kusangwa nage indi Mũĩsraelĩ, ogʼolubuto lwa Abrahamũ, owʼekihanda kya Benyamĩna. 2Nyamuhanga sialitagana abandu buwe, abo abiriyisoga kera. Ũnasĩ ngoko Amasako akabũga busana na Elĩa kwehĩ? Elĩa ahandĩkĩrĩraya Abaĩsraelĩ bʼuku Nyamuhanga ati, 3Mukama, babĩrĩta abamĩnyererĩ bawe, babĩrĩhĩmbũla ebiherero byawe. Ĩngye nyĩkĩnasĩya, kandi bakasonda erĩnylĩta. 4Nĩkwa Nyamuhanga mwasũbĩrya atĩkĩ kwehĩ? Ati, Nabiriyibikira abandu elfu irinda (7,000), abatetakũkamira Baala. 5Ko liri ritya lino, hali abasĩgalira, abo Nyamuhanga abiriyisoga omo lukogo luwe. 6Neryo eriyisoga liwe lyamabya busana nʼolukogo luwe, silwimene oko mĩbĩrĩ. Kite kitya olukogo luwe si kwenene.

7Ko byabere biti kwehĩ? Abaĩsraelĩ mobatabana ekyo babya bakasonda. Nĩkwa abake abayisogawa mobabanakyo Nʼabandi emitima yabo moyakala.

8Ngoko kĩsakĩre kiti,

Nyamuhanga mwahabo ekĩrĩmũ kyʼeritendiminya kindu,

Ameso wabo sialilangira, nʼamatwĩ wabo sĩalĩowa,

Bane batya erĩhĩka na mũnabwĩre,

9Kandi Dawĩdĩ akabũga ati,

Emesa yabo yibye mũlyatĩ nʼekitego.

Batwĩkale nʼerisuyirwa.

10Ameso wabo abye mwĩrĩmya ibatatoka erilangira,

Kandi ũnamaye emigongo yabo yʼebiro byosĩ.

11Neryo ngabũlaya nyiti, Batwĩkere nʼeriwa kwehĩ? Iyihi nʼahake! Nĩkwa busana nʼerĩlolo lyabo, erilama lyabĩrĩhĩka oko Bihanda, erireka Abayũda ibabya nʼobũha. 12Neryo erĩlolo lyʼAbayũda lyamaleta omũyĩsa oko kihugo, nʼeritaluka lyabo lyamaleta omũyĩsa gʼoko Bihanda. Omũyĩsa asyabya munene kwʼaho omugulu Abayũda basyabyaho ndeke.

Erilama lyʼEbihanda

13Neryo ngabwira ĩnywe bʼEbihanda, Kusangwa indi mukwenda wʼEbihanda, ngayihalamba omo mũbĩrĩ wage. 14Kumbe nangatoka erireka abʼekihanda kyage ibabya nʼobũha, nʼerĩlamya abandi ba kubo. 15Kusangwa kumbe eriganwa lyabo likabya erĩsanganĩa lyʼabandu bʼekihugo neryo erĩrĩgwa lyabo likabya liti kwehĩ? Lyasyabya nogebe busana nʼabaholĩ.

16Omukanyo amabya abũyĩrĩre, neryo obundu nabo bũbũyĩrĩrĩre. Kandi omũlĩhĩ amabya abũyĩrĩre, neryo emitahi nayo yĩbũyĩrĩre. 17Nĩkwa eyindi mitahi yʼomuti wʼomũzeĩtũnĩ yamatahulwa, nawe Omutahi wʼomũzeĩtũnĩ wʼomolĩ ũkahĩrawa omo muti oyo ukasangira mo muboga wʼamatsitsi awakalũa omo mũlĩhĩ. 18Subye ukayiheka embere wʼemitahi; kusangwa wamayiheka, si iwe Ukaheka omũlĩhĩ nĩkwa omũlĩhĩ akakuheka.

19Ũkandĩbũga uti, Emitahi yatahulawa inatoka erĩhĩrwamo. 20Kwenene, nĩkwa moyatahulwa busana nʼerĩtendĩkĩrĩrya lyabo, nawe ukabyamo busana nʼerĩkĩrĩrya lyawe. Subye ukayiheka, nĩkwa ubahe. 21Kusangwa Nyamuhanga amabya ĩsĩalĩtabalya emitahi yʼomuti gowene, ĩsĩendĩsyakũbalya nawe. 22Lebaya obubuya nʼobukali bya Nyamuhanga. Akalĩre busana nʼabandu abawa, nĩkwa ni mubuya ukʼuwe, wamakwamirira omo bubuya buwe. Bite bitya, nawe, wasyatũbwa nibya. 23Nabo Abayũda, bamaleka erikwamirira erĩtendĩkĩrĩrya lyabo, basyahĩrwa aho babya. Kusangwa Nyamuhanga akatoka erĩswahĩrabomo. 24Nawe owʼEbihanda watũbawa oko muti wʼomũzeĩtũnĩ wʼomũsĩndo wʼomolĩ, mowahĩrwa omo muti wʼomũzeĩtũnĩ wʼomũsĩndo wʼeka. Kwilaba aho emitahi eyo yʼomũsĩndo wʼeka yasyahĩrwa omo muti wʼomũzeĩtũnĩ wabo wʼeka.

Eriganyira lya Nyamuhanga oko bosĩ

25Balĩkyetu, nyanzĩre imwaminya ndeke erĩkũmbo erĩ, mukasyabya nʼamenge omo malengekanĩa wenyũ. Erĩkũmbo lyerĩ liti, erikala hake lyʼomutima lyabirihamba Ĩsraelĩ erĩhĩka aho eriganza NʼEbihanda lyamahĩka uku Nyamuhanga. 26Neryo Abaĩsraelĩ bosĩ basyalamĩbwa, ngoko kĩsakĩre kiti,

Omũlamya asyalũa eSĩonĩ,

Asyalũsya amalolo oko bana ba Yakobo.

27Kandi eyĩ ni ndagane yage haguma nabo,

Omugulu ngalũsaya ebibi byabo.

28Kusangwa omo mwatsi wʼEngulu Yowene Abayũda, nĩ nzĩgũ busana nenyũ, nĩkwa omwʼiyisoga lya Nyamuhanga, ni banze busana nʼabotata-kulu wabo. 29Kusangwa olũsũnzo lubuya nʼeribirikira lya Nyamuhanga sibyebinduka. 30Nenyũ abʼEbihanda mwabya ĩsĩmũlĩowa Nyamuhanga, nĩkwa lino mwabiribana eriganyira kusangwa Abayũda mobatowa. 31Neryo kusangwa ĩnywe bʼEbihanda mwabiribana eriganyira, litya Abayũda lino ni bandu batyowa, ibatoka nabo eribana eriganyira lya Nyamuhanga. 32Kusangwa Nyamuhanga abĩrĩhĩra abosĩ okwʼĩtendĩowa, iniatoka eriganyira abosĩ.

Eripipa Nyamuhanga

33Kwenene obukulu bwa Nyamuhanga ni bunene! Kwenene Nyamuhanga awite amenge gosĩ nʼeriminya lyosĩ! Sihali mundu wangaminya erisoha liwe! Sihali mundu wangaminyerera esyonzira siwe! 34Ngoko kĩsakĩre kiti,

Nindi wabiriminya obũlengekanĩa bwʼomukama kwehĩ?

Nindi wangabya mũhanĩ wuwe kwehĩ?

35Nindi wabirimuha kindu, atũhawe kandi kwehĩ?

36Kusangwa iye mwahangika emyatsi yosĩ, kandi emyatsi yosĩ iye yo wabumbayo, kandi emyatsi yosĩ iri busana naye. Olukengerwa lubye uku Nyamuhanga kera na kera. Amina.

Currently Selected:

Abanya Roma 11: KB80

Highlight

Copy