Erĩbĩsũlĩrwa 18

Eriwa lyʼeBabelĩ

1Enyũma wʼemyatsi eyĩ, monalangira ogundi mũlaĩka akandagala akalũa elubula. Abya awite ehamũlĩ nene, kandi obubuya buwe mobwakangabasanĩrya ekihugo kyosĩ. 2Neryo mwabirikira nʼomulenge munene ati, Babelĩ Mukulu abiritera! Amatera! Kandi abiribya obwĩkalo bwʼesyombĩnga, nʼahʼeritamba lyʼobuli kĩrĩmũ kĩtũnda-tũndĩre, nʼahʼerisiba lyʼobuli nyonyũ yĩtũnda-tũndĩre nʼeyikaponawa. 3Kusangwa ebihanda byosĩ byabĩrĩpũlya ebĩnyũ byʼengumbu yʼerĩsĩngĩra lyago. Abami bʼekihugo babĩrĩsĩngĩrago, nʼabatũndĩ bʼekihugo babiribya bateke busana nʼesyongumbu syago.

4Neryo monowa ogundi mulenge akalũa elubula ati,

Abandu bage, mũlũe mugo!

Simusangane omo bibi byago.

Mukasyabana erisuyira lyago!

5Kusangwa ebibi byago byabiritomengekana erĩhĩka elubula,

Kandi Nyamuhanga abiryibuka amalolo wago.

6Mulihego ngoko abiririha abandi,

Kandi mulihego ngendo ĩbĩrĩ busana nʼemĩbĩrĩ yago.

Mũsũlaye olũtehĩ lwago mwʼebyʼerĩpũlya ebĩkalĩre kabiri,

Omo lũtehĩ olo abĩrĩtũlũnganĩa busana nenyũ.

7Uhego eriagalwa, nʼeririra,

Omo lulengo olo ayipipamo nʼeriyisanza.

Kusangwa akabũga omo mutima wago, ati,

Nyĩkere ngʼomugole wʼOmwami,

Sindi mũkwakalĩ,

Sindiendisyalira na kera!

8Kikaleka amalĩge wago asyahĩka omo kiro kiguma:

Akasũsũ, nʼobũlĩge, nʼenzala;

Asyatogotĩbwa omo muliro.

Kusangwa Omukama Nyamuhanga, oyukamutswera akalĩre.

9Kandi abami bʼekihugo abasangĩre erĩsĩngĩra lyago nʼesyongumbu syago, basyalirirago, nʼerĩsũsũmanirago, omugulu bakalangira omũkĩ wʼerihya lyago. 10Bakahangana hali, busana nʼeriubaha eriagalwa lyago, bati, Obũlĩge! obũlĩge! Babelĩ, omũyĩ mukulu, omũyĩ wʼamaka! Omo saa nguma eritswera lyawe lyamahĩka!

11Nʼabatũndĩ bʼekihugo bakalirirago nʼerĩsũsũmanirago, kusangwa sihali mundu oyukaswagula ebindu byabo. 12Sihali mundu oyukagula esyamagetsi syabo, nʼebĩtsĩpa byabo, nʼamabwe wʼobũgũlĩ bunene wabo, nʼesyolulu syabo, nʼekĩtanĩ ekĩbũyahĩre, nʼesyongimba syabo syʼomunyama, nʼesyongimba syʼeharĩrĩ, nʼesyongimba syʼolukula-kula; nʼemĩsĩndo yosĩ yʼemiti, ebikakumba ndeke, nʼemĩsĩndo yosĩ yʼebindu byʼameno wʼesyonzogũ, nʼebindu byosĩ byʼemiti yʼobũgũlĩ bunene, nʼebyʼomulinga, nʼebyʼebyuma, nʼebyʼamabwe ahenĩrye ndeke; 13na dalasĩnĩ, na karafũ, nʼobukwa, nʼamanũkato, na ũbanĩ; nʼebĩnyũ, nʼamagũta wʼemĩzeĩtũnĩ, nʼeyĩsyano yʼenzelele, nʼengano nʼesyonde, nʼesyombũlĩ, nʼesyosabayĩrĩ, nʼesyogalĩ, nʼabakobe, nʼemitima yʼabandu. 14Nʼebibuya ebyo wayĩtsũtsa byabĩrĩkũlũako, nʼobuteke bosĩ bwawe nʼebibuya byawe byabĩrĩkũlũako, nʼabandu sibendisyaswabanabyo kandi! 15Nĩkwa abatũndĩ bʼebindu ebĩ, ababya bateke busana nago, basyahangana hali kusangwa bakubaha eriagalwa lyago. Basyalira nʼerĩsũsũmana, 16bati, Obũlĩge, obũlĩge! Omũyĩ mukulu! Owabya akambala ekĩtanĩ kĩbũyĩrĩre, nʼolukimba lwʼomunyama, nʼolʼolukula-kula, nʼerĩyĩsũga omo syamagetsi, nʼamabwe wʼobũgũlĩ bunene, nʼesyolulu! 17Kusangwa omo saa nguma abĩrĩtalya obuteke bosĩ obũ! Nʼobuli mukulu wʼobwato, nʼobuli mundu oyukalendera omo bwato, nʼoyukakola omũbĩrĩ omo bwato, nʼabosĩ abakatunda omo ngetsi, mobahangana ehali, 18mobalaka omugulu balangira omũkĩ wʼerihya lyago bati, Omũyĩ wahi ali ngʼomũyĩ mukulu oyũ kwehĩ? 19Neryo mobagusa olũtũtũ oko mitwe yabo, ibakalira, nʼerĩsũsũmana bati, Obũlĩge! obũlĩge! Omũyĩ mukulu! Oyũ nĩ mũyĩ aho abosĩ abawite amato omo ngetsi mobabya bateke busana nʼebindu byago! Nĩkwa omo saa nguma abĩrĩtalya ebyosĩ!

20Uwe lubula, utsemerego! Nʼinywe bandu ba Nyamuhanga, nʼabakwenda, nʼabamĩnyererĩ, mutsemerego! Kusangwa Nyamuhanga abiritswerago busana nenyũ.

21Neryo omũlaĩka embangĩ mwatola erĩbwe ngʼoluso lunene mwagusalyo omo ngetsi ati, Litya omũyĩ munene go Babelĩ, asyaguswa ahisi omo mwaga, isiendisyaswabanika kandi. 22Neryo omulenge wʼabawatĩ bʼesyonanga, nʼabĩmbĩ bʼesyonyimbo, nʼababũhĩ bʼamalenga, nʼababũhĩ bʼesyongubi, sĩbendĩsyaswogũbwa ewawe! Kandi sihali omunyima-nyima wʼomũbĩrĩ wʼamenge oyo wasyaswabanika ewawe kandi. Nʼomulenge wʼoluso sĩendĩsyaswogũbwa ewawe kandĩ! 23Kandi ekyakakala kyʼetala sikyendisyaswakolerya ewawe kandi; kandi omulenge wʼĩba wʼomũherũkĩ nʼomũherũkĩ sĩyendĩsyaswogũbwa kandi ewawe; kusangwa abatũndĩ bawe babya bandu bakulu bʼekihugo, kusangwa ebihanda byosĩ byatebĩbawa omo busaki buwe!

24Kusangwa omusasi wʼabamĩnyererĩ, nʼomusasi wʼabandu ba Nyamuhanga, nʼomusasi wʼabosĩ abĩtawa omo kihugo, mwabanika omo mũyĩ oyo.

Currently Selected:

Erĩbĩsũlĩrwa 18: KB80

Highlight

Copy

Compare