Erĩbĩsũlĩrwa 17

Omũmalaya mukulu

1Nĩkwa omuguma wʼoko bamalaĩka balinda ababya nʼebibindi birinda mwambĩkako mwambwira ati, Wase hano, ngandĩkũkangya erisuyira lyʼomũmalaya mukulu gʼomũyĩ munene owahĩmbĩre hakũhĩ nʼesyonyũsĩ nyingi. 2Abami bʼekihugo mobasĩngĩra Omũmalaya mukulu oyo, nʼabandu abĩkere munakihugo mobakũnda omo bĩnyũ byʼerĩsĩngĩra liwe. 3Neryo omũlaĩka mwanyitwala omo Mũlĩmũ omo mbwarara. Nʼeyo monalangira omũkalĩ ĩnĩanĩkere oko nyama nʼamena mangi wʼebĩtsũmĩ, kandi iyiwite emitwe irinda, nʼamahembe ĩkũmĩ. 4Kandi omũkalĩ oyo abya ambite olukimba lʼomunyama nʼolukula-kula, inĩabĩrĩsũwa omo syamagetsi, nʼamabwe wʼobũgũlĩ bunene, nʼesyolulu. Nĩkwa abya awite omo byala biwe olũtehĩ lwʼesyamagetsi oloswĩre mwʼesyonye syʼemyatsi ĩtĩsĩrĩre yʼobũsĩngĩrĩ buwe. 5Neryo oko mbũmo yiwe habya erĩna erĩsakĩre lyʼerĩkũmbo liti, Babelĩ Mukulu, nyĩnya wʼabamalaya, nʼowʼesyonye syʼekihugo. 6Kandi monalangira omũkalĩ oyo, ĩnĩakũndĩre omo musasi wʼabandu ba Nyamuhanga, nʼomo musasi wʼabandu batũla omwatsi wa Yesu.

Neryo omugulu namulangira monasweka kutsibu. 7Neryo omũlaĩka mwanyĩbũlya ati, Ukasweka busana nakĩ kwehĩ? Ĩngye ngandikubwira erĩkũmbo lyʼomũkalĩ oyũ nʼeryʼenyama eyikamuheka, eyiwite emitwe irinda nʼamahembe ĩkũmĩ. 8Enyama eyo walangira yabyaho, nĩkwa siriho lino, nĩkwa lino ikasonda erihetuka erĩlũa omo buhya, kandi ĩkayaherĩbawa. Abandu abĩkere oko kihugo amena wabo atasakĩre omo kitabu kyʼengebe, ekihugo kite kyatsũka, basyasweka omugulu bakasamalira enyama eyo. Kusangwa enyama eyo yanabyaho, nĩkwa sikiriho, kandi yasyaswabutuka.

9Obũlengekanĩa obuwite amenge bobũ. Emitwe irinda ni bitwa birinda aho mũkalĩ ĩkere. Kandi ni bami balinda. 10Abatanu babiritoga, omuguma akinatabala, nʼogundi sĩalĩahĩka; ekiro asyasa asyĩkala katambĩ kake kasa. 11Nʼenyama eyabyaho, kandi siriho, oyũ ni mwami wʼomunani, kandi ni wʼabalinda, naye akayaherĩbawa.

12Nʼamahembe ĩkũmĩ ago walangira, ni bami ĩkũmĩ, abate basinga, nĩkwa basyahabwa ehamũlĩ eritabala ngʼabami esaa nguma haguma nʼenyama eyo. 13Abami ĩkũmĩ aba bawite erĩyĩsũnza liguma, kandi bakaha enyama eyo yʼobũtokĩ nʼehamũlĩ yabo. 14Aba basyalwa nʼEkyana kyʼEmbũlĩ, nĩkwa Ekyana kyʼEmbũlĩ, haguma nʼabakamukwama, ababirikirawa buwe, nʼabayisogawa, nʼabateregula buwe, basyakĩndabo, kusangwa iye ni Mukama wʼabakama, nʼOmwami wʼabami.

15Neryo omũlaĩka mwambwira ati, Amagetsi ago walangira, ago mũkalĩ mũmalaya ĩkereko, ni bandu, nʼesyondeko, nʼebihanda, nʼemĩbũge. 16Kandi amahembe ĩkũmĩ walangira, nʼenyama eyo, aba basyakwa Omũmalaya oyo yʼobusu. Basyamũtũtũla, nʼerimuyira ndũmbũ. Kandi basyalya omubiri wuwe, neryo basyamutalikirira omo muliro. 17Kusangwa Nyamuhanga mwahĩra omo mitima yabo erisonda erikola erĩyĩsũnza liwe, ibakabya nʼobũlengekanĩa buguma, nʼeriha obwami bwabo oko nyama eyo, erĩhĩka aho ebĩnywa bya Nyamuhanga byasyabererera.

18Omũkalĩ oyo walangira nĩ mũyĩ mukulu owakatabala oko bami bʼekihugo.

Currently Selected:

Erĩbĩsũlĩrwa 17: KB80

Highlight

Copy

Compare