Erĩbĩsũlĩrwa 19

1Enyũma wʼemyatsi eyĩ, monowa ngʼomulenge munene wʼendeko nene omo lubula ati, Mupipe Nyamuhanga! Erilama, nʼolukengerwa, nʼobũtokĩ, ni bya Nyamuhanga wetu! 2Eritswera liwe ni ryʼekwenene, kandi ritunganene! Kusangwa abiritswera Omũmalaya mukulu oyo watsandaya ekihugo omwʼĩsĩngĩra liwe. Kandi Nyamuhanga abĩrĩkĩsya omusasi wʼabagombe buwe ukwʼiye. 3Neryo engendo yʼakabiri mobabũga, bati, Mupipe Nyamuhanga! Omũkĩ wʼomũyĩ oyo akahetuka endata kera na kera! 4Kandi abakulu makũmĩ abiri nʼabani, nʼebĩhangĩkĩrwe ebiriho bini mobatũlama ahisi mobaramya Nyamuhanga oyo wĩkere omo kĩtũmbĩ kyʼobwami bati, Amina! Mupipe Nyamuhanga!

Erirya lyʼerĩherũkya lyʼEkyana kyʼEmbũlĩ

5Neryo omulenge mwalũa oko kĩtũmbĩ kyʼobwami ati, Mupipe Nyamuhanga wetu, ĩnywe bagombe buwe bosĩ, nʼabandu bosĩ abakulu nʼabake-bake, abakamupipa! 6Neryo monowa omulenge ngʼowʼendeko nene, kandi ngʼomulenge wʼerihuha lyʼekisalala, kandi ngʼemĩlũmo minene-minene, iti, Mupipe Nyamuhanga! Kusangwa Omukama Nyamuhanga wetu Omũtokĩ Wʼebyosĩ, akatabala. 7Tutseme, tutsange, tumuhe olukengerwa! Kusangwa erĩherũkya lyʼEkyana kyʼEmbũlĩ lyabĩrĩhĩka, nʼomũherũkĩ wuwe abĩrĩyĩtegekanĩa. 8Kandi abirihabwa erĩambalĩbwa ekĩtanĩ kĩbũyahĩre, ekĩkangabasenĩe, nʼekibuya. Kusangwa ekĩtanĩ kĩbũyahĩre ekyo nĩ mĩbĩrĩ itunganene yʼabandu ba Nyamuhanga.

9Nʼomũlaĩka mwambwira ati, Usake uti, Obutseme buli nʼabo abakabirikirawa okwʼirya lyʼerĩherũkya lyʼEkyana kyʼEmbũlĩ. Kandi mwabũga nage ati, Ebĩ nĩ bĩnywa byʼekwenene bya Nyamuhanga. 10Neryo monatũlama ahisi embere syʼebisando biwe erĩmũramya. Naye mwabũga nage ati, Sukole utya! Ĩngye indi mugombe mũlĩkyenyũ haguma nawe, nʼabalĩkyenyũ abakatũla omwatsi wa Yesu. Ũramaye Nyamuhanga! Kusangwa erĩtũla omwatsi wa Yesu nĩ kĩrĩmũ kyʼeriminyerera.

Oyukagenda oko sabayĩrĩ nyeru-nyeru

11Neryo monalangira olubula ilukingukere, neryo lebaya, habya esabayĩrĩ nyeru-nyeru. Oyukagenda kuyo akahulawa mo Oyuteregula nʼowʼekwenene. Kandi omo litunganene akatswera nʼerilwa amalwa. 12Ameso wuwe ni kirimi kyʼomuliro, nʼesyombĩta nyingi siri oko mutwe wuwe. Kandi awite erĩna lĩmũsakĩreko, nĩkwa sihali mundu wasĩryo, nina ye ĩyowene. 13Neryo ekanzu abya ambite ĩnĩtoberĩbwe omo musasi, nʼerĩna liwe nĩ Kĩnywa kya Nyamuhanga. 14Neryo emilondo yʼelubula moyamukwama, ibambite ekĩtanĩ kĩbũyahĩre, kandi ibakagenda oko syosabayĩrĩ nyeru-nyeru. 15Kandi omũyalĩ owatwĩre mwalũa omo buno buwe. Neryo asyakĩnda ebihanda omo mũyalĩ oyo. Nĩkwa asyatabala oko bihanda ebyo, omo mũtso wʼekyuma, neryo asyakamira omo muhe ebĩnyũ byʼerihitana lĩkalĩre lya Nyamuhanga, Omũtokĩ Wʼebyosĩ. 16Oko kanzu yiwe nʼoko kihinga kiwe habya hasakĩre erĩna liti, Omwami wʼabami, nʼOmukama wʼAbakama.

17Neryo monalangira omũlaĩka inianimene omo lyuba. Naye mwabirikira omo mulenge munene iniakabwira esyonyonyũ syosĩ esikaguluka omo kyanya ati, Mwase, mũhĩndane busana nʼerirya ĩnene lya Nyamuhanga! 18Mwase, mulye esĩswĩ syʼabami, nʼesyʼabakulu bʼabasĩrĩkanĩ, nʼesĩswĩ syʼesyombangĩ, nʼesĩswĩ syʼesyosabayĩrĩ, nʼesyʼabandu abali oko syosabayĩrĩ, nʼesĩswĩ syʼabandu bosĩ, abandu abali nʼobwĩranda, nʼabakobe, abandu bake-bake, nʼabakulu-bakulu!

19Neryo monalangira enyama eyo, nʼabami bʼekihugo, nʼemilondo yabo, ĩbahĩndene erilwa nʼoyo wĩkere oko sabayĩrĩ, nʼerilwa nʼomulondo wuwe. 20Nĩkwa enyama eyo moyahambwa, nʼomũmĩnyererĩ wʼamabehĩ haguma nayo, oyo wabya akakola ebitiko-tiko embere syʼenyama eyo. Omũmĩnyererĩ wʼamabehĩ oyo mwatebabo omo bitiko-tiko ebyo bahĩrawako omo lusako lwʼenyama eyo, nʼerĩramya esanamu yayo. Ababiri aba, nʼenyama eyo, nʼomũmĩnyererĩ wʼamabehĩ, mobaguswa ibaneho, omo ngetsi yʼomuliro eyikagulumira nʼekirimi. 21Nʼabandi mobĩtwa omo mũyalĩ owakalũa omo buno bwʼoyo wĩkere oko sabayĩrĩ, nʼesyonyonyũ syosĩ mosyũgũta omo sĩswĩ syʼemibiri yabo.

Currently Selected:

Erĩbĩsũlĩrwa 19: KB80

Highlight

Copy

Compare