Erĩbĩsũlĩrwa 16

Ebibindi byʼerihitana lya Nyamuhanga

1Kandi monowa omulenge munene owakalũa omo Hekalũ, owakabwira abamalaĩka balinda ati, Mugende, mũtũlĩre ebibindi birinda byʼerihitana lya Nyamuhanga byʼomo kihugo.

2Neryo omũlaĩka wʼerĩmbere mwayũtũlĩra ekibindi kiwe omo kihugo. Neryo ebironda bibi, ebĩkalĩre, mobyahulukira oko bandu ababya kʼolusako lwʼenyama eyo, kandi ukwʼabo abaramaya esanamu eyo.

3Neryo omũlaĩka wʼakabiri mũtũlĩra ekibindi kiwe kyʼomo ngetsi. Amagetsi wayo mwayahinduka ngʼomusasi wʼomundu ũholĩre, nʼobuli nyama eyabyaho omo ngetsi moyahola.

4Neryo omũlaĩka wʼakasatu mũtũlĩra ekibindi kiwe omo syonyũsĩ nʼomo sĩsoko syʼamagetsi, nasyo mosyahinduka mo musasi. 5Neryo monowa omũlaĩka oyũkategaya amagetsi akabũga ati, Uwe Oyũbũyĩrĩre, uwe Utunganene, oyuliho nʼoyutula, kusangwa wabiritswera emyatsi eyĩ! 6Kusangwa mobũta omusasi wʼabandu ba Nyamuhanga nʼowʼabamĩnyererĩ, nawe wabirihabo erĩpũlya omusasi. Nabo batolereryo. 7Neryo monowa ekiherero kĩkabũga kiti, Ega, Uwe Mukama Nyamuhanga, Omũtokĩ Wʼebyosĩ! Eritswera lyawe ni ryʼekwenene, kandi litunganene!

8Nʼomũlaĩka wʼakani mũtũlĩra ekibindi kiwe oko lyuba, nalyo molyahabwa ehamũlĩ yʼerĩhĩsya abandu omo muliro. 9Neryo abandu mobahĩsĩbwa omo bukangira bũkalĩre, neryo mobatsuma erĩna lya Nyamuhanga oyuwite ehamũlĩ oko malĩge aya. Nĩkwa abandu mobatabindula emitima yabo erireka ebibi, nʼeriha Nyamuhanga olukengerwa.

10Nʼomũlaĩka wʼakatanu mũtũlĩra ekibindi kiwe oko kĩtũmbĩ kyʼobwami kyʼenyama eyo. Nĩkwa omwĩrĩmya mwabya omo bwami bwʼenyama eyo, nʼabandu mobatakũnya esyondimi syabo busana nʼamagalĩ. 11Kandi mobatsuma Nyamuhanga wʼelubula busana nʼamagalĩ wabo nʼebironda byabo. Nĩkwa mobatabindula emitima yabo erireka emĩbĩrĩ mibi yabo.

12Nʼomũlaĩka wʼendatu mũtũlĩra ekibindi kiwe oko lũsĩ lunene, lwʼeEfũratĩ. Kandi amagetsi walo muma, enzira ĩkokotĩbawe busana nʼabami bakalũa eyo eryuba likahuluka. 13Neryo monalangira emĩrĩmũ ĩsatu ngʼebikere bisatu ebĩtũnda-tũndĩre bĩkalũa omo buno bwʼekiyoka, nʼomo buno bwʼenyama eyo, nʼomo buno bwʼomũmĩnyererĩ wʼamabehĩ. 14Ebikere ebĩ, nĩ bĩrĩmũ byʼesyombĩnga ebikakola ebitiko-tiko. Ebĩrĩmũ bisatu ebĩ bikaya oko bami bʼekihugo kyosĩ, erĩhĩndanĩabo omo malwa wʼekiro kinene kya Nyamuhanga Omũtokĩ Wʼebyosĩ.

15Mũlebaye! Ngasa ngʼomũrahĩ. Obutseme buli oko mundu oyuteyato, nʼoyũkategaya esyongimba siwe, akasyalendera ndũmbũ nʼerihemuka embere syʼabandu.

16Neryo mobahĩndanĩa abami haguma ahakahulawa omo Kiebrania mo Harmagedonĩ.

17Nʼomũlaĩka wʼakalinda mũtũlĩra ekibindi kiwe kyʼomo kyanya, neryo omulenge munene mwalũa oko kĩtũmbĩ kyʼobwami omo Hekalũ ati, Kyamakoleka! 18Neryo mohabya erĩpalya lyʼakarabyo, nʼemirenge, nʼemĩlũmo, kandi mohabya omũsĩkĩ owakalĩre kutsibu. Nĩkwa okwʼĩtsũka erihangikwa lyʼabandu, sihehatabya omũsĩkĩ munene nʼowʼamaka ngʼoyũ. 19Kandi omũyĩ mukulu mwatulwa mo bihande bisatu, nʼemĩyĩ yʼebihanda moyatera. Kandi Nyamuhanga mwibuka Babelĩ mukulu, neryo mwamũpũlĩsya ebĩnyũ omo lũtehĩ luwe, ebĩnyũ byʼerihitana liwe erĩkalĩre. 20Nʼobuli kitsira mokyatibita erya, nʼebitwa mobitaswabanika. 21Kandi amatwa manene-manene, obuli ritsuku liguma lyabya lyʼekĩlo makũmĩ ani nʼebitanu, nago mwatogongera abandu akalũa omo kyanya. Kandi abandu mobatsuma Nyamuhanga busana nʼobũlĩge bwʼamatsuku ayo, kusangwa obũlĩge obo bwabya bũkalĩre kutsibu.

Currently Selected:

Erĩbĩsũlĩrwa 16: KB80

Highlight

Copy

Compare