Abanya Fĩlĩpĩ 4

Erihana Abakristo

1Neryo, balĩkyetu banze, ngabakwa olukando eribalolako. Muli butseme bwage, kandi mukanyiretera erĩyĩsyandira. Abanze bage, mũsĩke erikwama Omukama.

2Ngahatikana Eodĩa na Sĩntĩke babye nʼobũlengekanĩa buguma ngʼabalĩkyetu bʼOmukama. 3Ega, nawe mũlĩkyetu, ngakusaba nyiti, ũwatĩkaye abakalĩ aba. Kusangwa babiriyitsinga kutsibu omo mũbĩrĩ wʼerĩgenda-gendya Engulu Yowene, haguma na Klementĩ, nʼabandi balĩkyetu, abawite amena wabo omo kitabu kyʼengebe kya Nyamuhanga.

4Mutseme omo migendere yenyũ busana nʼOmukama emigulu yosĩ; kandi ngababwira nyiti, Mutseme! 5Mũmĩnyĩkalaye eriyibombeka lyenyũ oko bandu bosĩ, Omukama ali hakũhĩ! 6Sĩmũhanga-hangaye emitima yenyũ, nĩkwa omo buli mwatsi mubwire Nyamuhanga obwaga bwenyũ, imukamusaba nʼerimuhatikana, imunemuha ewasĩngya. 7Nʼobuholo bwa Nyamuhanga, Obũlabĩre amenge gosĩ, bwasyateya emitima yenyu nʼamaganĩrya wenyũ omwisi wa Kristo Yesu.

8Ego, balĩkyetu, mũsũlaye amalengekanĩa wenyũ omo myatsi mibuya nʼeyangapipwa. Emyatsi eyo yeyĩ: ebyʼekwenene, ebyʼerĩsĩkĩbwa, ebitunganene, ebĩbũyĩrĩre, ebyanganzwa, ebyʼerĩsĩmwa. 9Mubye mukakola emyatsi eyo mwiga, nʼeyo mwangirira ewage, kandi emyatsi eyo mowa, nʼeyo mwalolako ngakola. Neryo Nyamuhanga Omwenye Obuholo asyabya nenyũ.

Ewasĩngya busana nʼolũsũnzo

10Nĩkwa monatsema kutsibu busana nʼOmukama, kusangwa enyũma wʼomugulu muli mwamasyanyibuka. Kwenene mwabya mukanyibuka, nĩkwa omwanya mwabula. 11Sĩndĩbũga nyiti ngabula kindu; kusangwa nabiriminya eritsema omo bike kutse omo bingi. 12Nyĩnasĩ eribyaho omo bindu bike, kandi nyĩnasĩ eribyaho omwʼikanya lyʼebindu. Nabiriga erĩkũmbo liti, lye ritsema omo myatsi yosĩ nʼoko migulu yosĩ, namabya nyĩgũtĩre, kutse nyĩkwĩre enzala; kandi namabya ngwite bingi kutse eribulabyo. 13Nyĩtokĩre erikola ebyosĩ busana nʼamaka wa Kristo oyũkanyĩtokesaya.

14Nĩkwa mwamakola ndeke erĩnyĩwatĩkya omo malĩge wage. 15Nenyũ, Banya Fĩlĩpĩ, mũnasĩ ndeke, omugulu natsũka erĩtũla Engulu Yowene, nabĩlũa eMakedonĩa, sihali eyindi kanĩsa eyanyĩwatĩkaya, ĩnywebene mo mwasangira nage omo kĩbo, haguma nʼerĩhĩtya nʼeribula ebindu. 16Omugulu nabya eTesalonĩka nabya nʼobwaga, momwabya mukanyitumira olũsũnzo. 17Sĩndĩbũga nyiti ngasonda olũsũnzo, nĩkwa ngasonda endũndĩ eyikakanyirira busana nenyũ embere wa Nyamuhanga. 18Nĩkwa nabiribana ebyosĩ, ngwite bingi; sindibula nʼekindu busana nʼolũsũnzo lwenyũ, olo Epafrodito aleta. Nĩ ʼhĩtya erikakumba ndeke, embere wa Nyamuhanga obuhere obutolere, obũkatsemesaya Nyamuhanga yo ndeke. 19Nyamuhanga wage asyabaha ebyosĩ ebyo muli nabyo bwaga, kusangwa awite obuteke bunene buwe, obwʼerĩkangabasanĩa, obukabanika busana na Kristo Yesu. 20Neryo olukengerwa lubye uku Nyamuhanga Tata wetu, kera na kera. Amina.

Erĩkerya

21Mũkeraye obuli mundu wa Nyamuhanga oyuli wa Kristo Yesu. Abalĩkyetu abali haguma nage bakabakeraya. 22Abandu bosĩ ba Nyamuhanga bakabakeraya. Nʼabali omo kikali kya Kaĩsarĩ.

23Olukogo lwʼOmukama Yesu Kristo lubye nʼemitima yenyũ.

Currently Selected:

Abanya Fĩlĩpĩ 4: KB80

Highlight

Copy

Compare