Abanya Fĩlĩpĩ 3

Eritunganene kwenene

1Ego, balĩkyetu, mutsemere Omukama! Sĩrĩkalĩre busana nage eribasakira emyatsi eyĩ, kandi ĩkabategaya. 2Mũyĩtegaye busana nʼesyombwa, abandu abakakola nabi, abakayibandanga. 3Kusangwa ĩtwebene tuli bʼeribana lyʼekwenene, tũkaramaya Nyamuhanga omo Mũlĩmũ wuwe, kandi tũkayĩsyandira omwisi wa Kristo Yesu. Situliyiketera emyatsi yʼomubiri. 4Nĩkwa ĩngye nanganabana ekyʼeriyiketera omo myatsi yʼomubiri. Kumbe hali mundu oyũkaganĩraya ati awite ekyʼeriyiketera omo myatsi yʼomubiri, ĩngye ngwite ekĩlabĩre. 5Nabanĩbawa oko kiro kyʼomunani enyũma wʼeributwa lyage. Nabutawa oko kihanda kya Ĩsraelĩ omo kĩtũnga kya Benyamĩna. Nyiri Mũyũda kũndũ. Omo mwatsi wʼerikwama Emigambo nabya Mũfarĩsayo. 6Nabya nʼomũhwa munene busana nʼerĩendererya ekanĩsa. Nabya nyĩkũmayĩre omwʼitunganana eryo likabanika omo Migambo. 7Nĩkwa busana na Kristo, emyatsi yosĩ eyo yabya ndũndĩ busana nage, ngaganzayo ngʼĩtalya. 8Kandi busana nʼobũgũlĩ bunene bwʼeriminya Kristo Yesu Omukama wage, ngaganza emyatsi yosĩ ngʼĩtalya. Busana na Kristo nabĩrĩtalya emyatsi yosĩ nʼeriganzayo ngʼebibaya, inatoka eribana Kristo mo ndũndĩ yage. 9Kandi nyibanike kwenene ko nyimatikene naye, isingwite ekitunganene ekikabanika omo Migambo, nĩkwa ekitunganene ekikabanika omwʼĩkĩrĩrya Kristo, kyo kitunganene ekĩkalũa ewa Nyamuhanga omo nzira yʼerĩkĩrĩrya. 10Ekiguma nyanzĩre nyiti, nyiminye Kristo kwenene, nʼobũtokĩ bwʼerĩlũbũka liwe, kandi nyĩsangĩre omo magalĩ wuwe, nʼeribya haguma naye omo luholo luwe. 11Inatoka erĩhĩka okwʼĩlũbũka oko baholĩ.

Erisimbirira ebyʼemuliro

12Sĩndĩbũga nyiti nabĩrĩhĩka kulyo kutse nga nabĩrĩhĩkana, nĩkwa ngakwamirira inatoka erihambalyo ngoko Kristo Yesu naye abirimbamba. 13Balĩkyetu, sindiganza nga nabiriwata kulyo, nĩkwa ekiguma ngakola; nyanzĩre eribirirwa emyatsi eyabirilaba, erisimbirira emyatsi eyiri emuliro. 14Ngayitsinga eritibita erĩhĩka oko ndũlĩ, eribana oluhembo, lye ribirikirwa lyʼendata na Nyamuhanga erimatikana na Kristo Yesu. 15Ĩtwe twabĩrĩhĩkana tubye nʼobũlengekanĩa obũ. Kandi mwamabya nʼobundi bũlengekanĩa, Nyamuhanga asyabamĩnyĩsyabo. 16Nĩkwa aho twabĩrĩhĩka, tũsĩke erikwamirirabo tutya.

17Balĩkyetu, mubye mũkanyĩgerererya. Mũlebaye ngʼabandi abakalendera omwʼitegeka lyetu. 18Kusangwa nabya ngababwira, kandi rino ngababwira omo mĩsonĩa nyiti, abangi bakalendera ngʼesyonzĩgũ syʼomusalaba wa Kristo. 19Endũlĩ yabo basyaherĩbwa, kandi babiriyira esyongumbu syabo mo nyamuhanga wabo. Bakayihalamba omo myatsi yʼesĩsonĩ, bandu bʼekihugo. 20Nĩkwa ewetu ye lubula, netu tukalindirira Omũlamya erĩlũa elubula, yo Mukama Yesu Kristo. 21Iye asyabindula omubiri wetu molo, nʼeriyirago ngʼomubiri wuwe wʼolukengerwa, busana nʼobũtokĩ buwe obukatoka erĩhĩra emyatsi yosĩ omo butabale buwe.

Currently Selected:

Abanya Fĩlĩpĩ 3: KB80

Highlight

Copy

Compare