Matayo 10
10
Abakwenda ĩkũmĩ nʼababiri
(Mk 3.13-19; Lk 6.12-16)
1Yesu mwabirikira abiga buwe ĩkũmĩ nʼababiri, neryo mwahabo ehamũlĩ oko bĩrĩmũ bibi, erihigirabyo eyĩhya, nʼerĩlamya obuli mũsĩndo wʼerilwala, nʼobuli mũsĩndo wʼamakonĩ. 2Aya ni mena wʼabakwenda ĩkũmĩ nʼababiri: owʼerĩtsũka, Sĩmonĩ, oyukahulawa mo Petero, na mugala wabo Anderea; na Yakobo, mugala wa Zebedayo na mugala wabo Yoane; 3Fĩlĩpo, na Bartolomayo; Toma na Matayo mũsolesya; Yakobo mugala wa Alufayo, na Tadeo; 4Sĩmonĩ Mukanana, na Yũda Ĩskarĩota, oyo wamuhotera.
Yesu akatuma erĩkũmĩ nʼababiri erĩyakangĩrĩrya
(Mk 6.7-13; Lk 9.1-6)
5Yesu mwatuma abakwenda ĩkũmĩ nʼababiri abihanabo, ati, Simuye oko kihugo kyʼEbihanda, kandi simwingire omo mũyi wʼAbasamarĩa. 6Nĩkwa muye oko mbũlĩ sitere syʼekihanda kya Ĩsraelĩ. 7Nʼomugulu mukagenda, mũtũlego muti, Obwami bwʼelubula buli hakũhĩ. 8Mũlamaye abakonĩ, mũlũbũkaye abaholĩ, mũlamaye abahaga, muhigire esyombĩnga syʼeyĩhya. Mwabiryangirira butsira eririha, muhe abandi butsira erĩrĩhĩsya. 9Sĩmũsondaye esyamagetsi, kutse ebĩtsĩpa, kutse esyʼemiringa syʼomo matũsĩ wenyũ; 10kutse engunza busana nʼolugendo lwenyũ, kutse esyokanzu ĩbĩrĩ, kutse esyongendero, kutse mũtso; kusangwa omũhĩngĩ anatolere ebyo angalya.
11Omugulu mũkahĩka oko mũyĩ kutse oko kayĩ, mwingire, mũbũlaye nga hane mundu oyo wangabakokya, neryo imwĩkala omuwe, erĩhĩka aho mwasyalũĩraho. 12Kandi omugulu mukingira omo nyũmba eyo, mũkerayebo. 13Neryo abandu bʼenyũmba eyo bamabakokya, Obuholo bwenyũ bubye kubo; nĩkwa bamatendĩbakokya, Obuholo bwenyũ ibwabasubako. 14Nʼomundundi oyutebakokaya, kutse erĩowa ebĩnywa byenyũ, omugulu mũkalũa omo nyũmba eyo kutse omo mũyĩ oyo, mukungute olũtũtũ lʼoko bisando byenyũ. 15Kwenene ngabũga nenyũ nyiti, Oko kiro kyʼeritswera, olubanza lwʼekihugo kyʼemĩyĩ yʼeSodomo nʼeGomoro lwasyabya luke oko lʼomũyĩ oyo.
Erĩendererya erikandisyasa
(Mk 13.9-13; Lk 21.12-17)
16Lebaya, ngabatuma ngʼesyombũlĩ omo katĩkatĩ kʼesyombwa syʼomolĩ. Neryo mubye nʼamenge ngʼesyonzoka, kandi mubye bandu bolo ngʼehĩrĩkũkũ. 17Nĩkwa mũyĩtegaye busana nʼabandu; kusangwa basyabahotera omo hʼerĩbũgĩro, nʼerĩbaswĩrĩrya omo manyũmba wabo wʼerĩhĩndanamo. 18Kandi, mwasyakurirwa embere syʼabatabalĩ bakulu, nʼembere wʼabami busana nage, busana nʼerĩtũla Engulu Yowene kubo, nʼoko bandu bʼEbihanda. 19Nĩkwa omugulu basyabahotera, sĩmũhahũkaye emitima nga mwasyabũgakĩ kutse nga mwasyabũga muti. Kusangwa oko ndambĩ eyo mwasyahabwa ebyo mwasyabũga. 20Kusangwa ebĩnywa mũkabũga sĩ byenyũ; byasyalũa oko Mũlĩmũ wa Tata wenyũ oyũkabũgĩra omwisi wenyũ.
21Omundu asyahotera mugala wabo erĩĩtwa, nʼabotata basyahotera abana babo batya; nʼabana basyalwa nʼababũtĩ babo nʼerĩĩtĩsyabo. 22Kandi abandu bosĩ basyabakwa obusu busana nʼerĩna lyage. Nĩkwa oyo wasyayĩyĩnĩa erĩhĩka oko ndũlĩ yo wasyalamĩbwa. 23Nĩkwa omugulu bakabendereraya omo mũyĩ muguma imwatibita oko gundi mũyĩ. Kwenene ngabũga nenyũ nyiti, Simwendisyalaba omo mĩyĩ yosĩ ya Ĩsraelĩ, Omugala wʼomundu ate ahĩka.
24Omwiga sialengĩre omũkangĩrĩrya wuwe, kutse omukobe sialengĩre omukama wuwe. 25Omwiga angatsema eribya ngʼomũkangĩrĩrya wuwe, nʼomugombe angatsema eribya ngʼomukama wuwe. Bamahula omukulu wʼenyũmba mo Belzebũlĩ, basyahula abandu bʼenyũmba yiwe bʼomo mena mabi kwʼaho!
Twangubahandi?
(Lk 12.2-7)
26Neryo simubahe abandu. Kusangwa sihali ekĩkũnĩngĩre ekitendisyabĩsũlwa, kutse ekĩbĩsamĩre ekitendisyamĩnyĩkalĩbwa. 27Ebyo ngababwira omo mwĩrĩmya, mũbũgebyo omo kyakakala; nʼebyo mũkowa omo bihwehwe mũtũlaganayebyo oko lutwe lwʼenyũmba. 28Kandi simubahe abakĩta omubiri, nĩkwa sibetoka erĩĩta omutima; nĩkwa kumbe mwangubaha Nyamuhanga oyukatoka erĩherya omutima nʼomubiri omo Kũlĩmũ. 29Ebiswiri bibiri sibyegũlĩbawa oko sengĩ nguma kwehĩ? Kandi sihali nʼakaguma akakatogera ahisi lite erisonda lya Tata wenyũ. 30Nĩkwa esyonzwiri syʼoko mitwe yenyũ sĩganzĩrwe esyosĩ. 31Neryo simubahe, muli bʼobũgũlĩ bunene kwilaba obũgũlĩ bwʼebiswiri bingi!
Erĩkangya Kristo, nʼerigana Kristo
(Lk 12.8-9)
32Obuli mundu oyũkanyĩkanganaya embere syʼabandu, nage nasyamũkanganĩa embere sya Tata wage oyuli elubula. 33Nĩkwa oyukanyigana embere syʼabandu, neryo nage nibya nasyamugana embere sya Tata wage oyuli elubula.
Si buholo, nĩkwa nĩ mũyalĩ
(Lk 12.51-53; 14.26-27)
34Sĩmũganĩraye muti nasa nʼerireta Obuholo omo kihugo; mondasa erireta Obuholo, nĩkwa omũyalĩ. 35Kusangwa nasa nʼerĩkatĩsanĩa omundu nʼĩse, nʼomwali na nyĩnya wuwe, na mwalĩana na nyĩnyĩ-byala wuwe. 36Nʼesyonzĩgũ syʼomundu basyabya iba nʼabʼomo kĩtũnga kiwe.
37Oyo wanzĩre ĩse kutse nyĩnya kwilaba ngye sianyitolere; nʼoyo wanzĩre mugala kutse mwali kwilaba ngye, sianyitolere. 38Nʼomundu oyuteheka omusalaba wuwe nʼerinyikwama sianyitolere. 39Oyukalenga eribana engebe yiwe, asyatalyayo, nʼoyũkatalaya engebe yiwe busana nage asyabanayo.
Ebihembo
(Mk 9.41)
40Omundundi oyũkabakokaya akanyĩkokaya; nʼoyũkanyĩkokaya akakokaya oyo wanyituma. 41Oyũkakokaya omũmĩnyererĩ wa Nyamuhanga kusangwa nĩ mũmĩnyererĩ asyĩmya oluhembo lwʼomũmĩnyererĩ; nʼoyũkakokaya omundu utunganene kusangwa atunganene, asyĩmya oluhembo lwʼomundu utunganene. 42Nʼomundundi oyo wasyaha olũtehĩ lwʼamagetsi mũhũ omo lĩna lyʼomwiga oko muguma wʼabake-bake aba ati apũlayego, kwenene ngabũga nyiti, siendisyabula oluhembo luwe nʼahake.
Currently Selected:
Matayo 10: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.