Matayo 11
11
Abakwenda ba Yoane Mũbatĩsya
(Lk 7.18-35)
1Omugulu Yesu abuga eritegeka abiga buwe ĩkũmĩ nʼababiri, mwalũaho, mwayakangĩrĩrya nʼerĩtũlanganĩa omo mĩyĩ eyabya hakũhĩ nʼeyo.
2Neryo omugulu Yoane owĩra omo mũlĩkĩ emĩbĩrĩ ya Kristo, mwamutumira abiga buwe, 3erĩbũlya Yesu, ati, Nina we oyukasa, kutse tulindirire ogundi kwehĩ? 4Yesu mwasũbĩryabo ati, Mugende, mubwire Yoane emyatsi eyo mwamowa nʼebyo mwamalangira. 5Esyondĩmatĩme sirimulangira, nʼebirema birimugenda, abahaga bakalamĩbawa nʼabatsiha balĩmowa, nʼabaholĩ banemũlũbũkĩbwa, nʼEngulu Yowene ĩrĩmũtũlaganĩbwa oko bera. 6Kandi obutseme buli oko yũtehũkahũkaya omutima busana nage!
7Neryo abiga ba Yoane babere bakasubula, Yesu mwatsũka erĩbũga nʼesyondeko busana na Yoane ati, Mwaya omo mbwarara eriyalola mʼũkũkĩ kwehĩ? Mwayalangira ekibingu ekikatengatenganĩbawa nʼerihunga kwehĩ? 8Nĩkwa mwayayo eriyalangirakĩ kwehĩ? Muti, omundu oyo wambite esyongimba nyolo-nyolo kwehĩ? Mũlebaye abambite esyongimba esĩkangabasenĩe bali omo manyũmba wʼabami. 9Nĩkwa mwayayo busana nakĩ kwehĩ? Mwayalangira omũmĩnyererĩ kwehĩ? Ega, ngababwira mwabirilangira oyũlengĩre omũmĩnyererĩ. 10Kusangwa Yoane yoyo amasako ahula ati,
Lebaya, ngatuma omukwenda wage embere syenyũ,
Oyo wasyowanĩa enzira yawe embere syawe.
11Kwenene ngabũga nenyũ nyiti, Yoane Mũbatĩsya ni mukulu kwilaba abandu bosĩ ababutawa. Nĩkwa oyuli muke kutsibu omo Bwami bwʼelubula, amũlengĩre. 12Kandi erĩtsũka oko biro bya Yoane Mũbatĩsya, erĩhĩka na lino Obwami bwʼelubula bukalwiriranawa, nʼabandu bʼomwaga bakalenga erihamba obwami obo. 13Kusangwa amasako wʼabamĩnyererĩ bosĩ, nʼEmigambo ya Musa mobyaminyerera omwatsi wʼobwami erĩhĩka oko mugulu wa Yoane. 14Kandi wamanza erĩrĩga omwatsi wabo, Yoane nĩ Elĩa oyo wasyasa. 15Oyuwite amatwĩ, owe!
16Nĩkwa nasyalĩngĩrĩranĩa abandu ba sesene bo nakĩ kwehĩ? Bali ngʼabana abĩkere omo katale abakabirikirana, 17bati, Twabiribabuhira amalenga, neryo momutetasata; motwimba Olwimbo lwʼerita omundu, nenyũ momutetalira. 18Kusangwa Yoane mwasa, isialirya kutse erĩpũlya, neryo bakabũga bati, Ali ko mbinga! 19Omugala wʼomundu mwasa akalya nʼerĩpũlya, neryo bakabũga bati, Lebaya omundu oyũ! Ni wʼomururu nʼomũkũndĩrya, omwĩra wʼabasolesya nʼabakola-nabi. Nĩkwa amenge wa Nyamuhanga akaminyĩkala omo mĩbĩrĩ yago.
Emĩyĩ eyĩtĩkĩrĩrye
(Lk 10.13-15)
20Neryo Yesu mwatsũka erihayira emĩyĩ eyo akolera mwʼebitiko-tiko biwe bingi, kusangwa mobatabindula emitima erireka ebibi. 21Obũlĩge ukʼuwe Korazĩnĩ! Obũlĩge ukʼuwe Betesaĩda! Kusangwa kumbe ebitiko-tiko ebyakolawa omwisi wenyũ, bialikolawa eTĩro nʼeSĩdonĩ, kumbe babiribindula emitima nʼerireka ebibi byo kera, ibanambite emisarandwe nʼerĩĩkala omwʼĩbũ. 22Nĩkwa ngababwira nyiti, Oko kiro kyʼeritswera, olubanza lwʼeTĩro nʼeSĩdonĩ lwasyabya luke oko lwenyũ. 23Nawe Kapernaũmũ! Wabya wanzĩre erĩhamĩbwa elubula kwehĩ? Wasyaguswa omo Lĩfero. Kusangwa kumbe ebitiko-tiko ebyakolawa omo katĩkatĩ kenyũ, byalikolawa eSodomo, eSodomo ngʼikineho erĩhĩka na lino. 24Nĩkwa ngababwira nyiti, Oko kiro kyʼeritswera, olubanza lwʼekihugo kyʼeSodomo lwasyabya luke oko lwawe.
Mwase muluhuke
(Lk 10.21-22)
25Oko mugulu oyo Yesu mwasũbĩrya ati, Ngakupipa uwe Tata, Omukama wʼolubula nʼekihugo! Kandi wabĩrĩbĩsa emyatsi eyĩ oko bʼamenge nʼabʼeriminya, nĩkwa wabĩrĩbĩsũlĩrayo oko bana balere. 26Ega, Tata, kusangwa ko byakũtsemesaya bitya omo meso wawe.
27Tata wage abirimba emyatsi yosĩ. Sihali oyo wasĩ Omugala nina Tata, kandi sihali oyo wasĩ Tata nina Mugala, nʼomundu oyo Mugala anzĩre erĩmũbĩsũlĩra.
28Mwase ũkwʼĩngye, ĩnywe bosĩ ko mukanuba nʼeriheka ebĩrĩtohĩre, ngandibalũhũkya. 29Mwĩmaye engomo yage, muhekeyo, mwigire ũkwʼĩngye, kusangwa indi molo-molo nʼowʼomutima ahehere; nenyũ mwasyabana eriluhuka omo mitima yenyũ. 30Kusangwa engomo yage ni nyibuya, nʼomuheke wage angũhĩre.
Currently Selected:
Matayo 11: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.