Matayo 9
9
Yesu akalamaya omundu oyũbasĩre
(Mk 2.1-12; Lk 5.17-26)
1Neryo Yesu mwingira omo bwato, mwasokera eyisirya wʼengetsi oko mũyĩ wʼeka wuwe. 2Neryo abandu mobamuletera omundu oyũbasĩre, iniagotsere oko ngingo. Nĩkwa Yesu mwalangira erĩkĩrĩrya lyabo, neryo mwabwira oyũbasĩre ati, Mwana wage, Ũsĩkaye omutima! Ebibi byawe byamabibuyirwa. 3Neryo lebaya, abandi bʼoko bakangĩrĩrya bʼEmigambo mobayibwira bati, Omundu oyũ akatsuma. 4Neryo Yesu mwaminya amalengekanĩa wabo, mwabũga ati, Busana nakĩ mukaganĩraya ebibi byʼomo mitima yenyũ kwehĩ? 5Ekyolo ni kyahi, erĩbũga nyiti, Ebibi byawe byamabibuyirwa, kutse erĩbũga nyiti, Hangana, ugende, kwehĩ? 6Nĩkwa mutoke eriminya kʼomugala wʼomundu awite hamũlĩ omo kihugo eribuyira ebibi, Yesu mwabwira oyũbasĩre ati, Hangana, wĩmaye engingo yawe, uye eka wenyũ! 7Neryo omundu oyo mwahangana, mwaya eka wabo. 8Nĩkwa omugulu abandu balangira ekyo mobubaha, mobapipa Nyamuhanga oyo waha ehamũlĩ iri ngʼeyĩ yʼoko bandu.
Yesu akabirikira Matayo
(Mk 2.13-17; Lk 5.27-32)
9Neryo Yesu abere alaba akalũaho, mwalangira omundu oyukahulawa mo Matayo, ĩnĩanĩkere aho bakasoleseraya. Nĩkwa Yesu mwamubwira ati, Unyikwame, neryo Matayo mwahangana, mwamukwama.
10Neryo omugulu Yesu abya akalira omo nyũmba, abasolesya bangi nʼabakola-nabi mobasa, mobalya haguma na Yesu nʼabiga buwe. 11Kandi omugulu Abafarĩsayo balangira batya, mobabwira abiga buwe bati, Busana nakĩ Omũkangĩrĩrya wenyũ akalya haguma nʼabasolesya nʼabakola-nabi kwehĩ? 12Nĩkwa omugulu Yesu owa ekĩ, mwabũga ati, Abakalĩre sibali nʼobwaga bwʼomunganga, nĩkwa abalwere. 13Nĩkwa mugende mwige ekĩsakĩre kiti, Ngasonda eriganyira, butsira obuhere bwʼesyonyama; kusangwa sinasa eribirikira abatunganene, nĩkwa abakolanabi.
Omwatsi wʼeritsira akalyo
(Mk 2.18-22; Lk 5.33-39)
14Neryo abiga ba Yoane Mũbatĩsya mobahĩka uku Yesu bati, Busana nakĩ ĩtwe nʼAbafarĩsayo tukatsira akalyo, nĩkwa abiga bawe sibetsira akalyo kwehĩ? 15Yesu mwasũbĩryabo ati, Kwʼabĩra bʼĩba wʼomũherũkĩ banganakwa ngitsi omugulu akine haguma nabo kwehĩ? Nĩkwa ebiro byasyasa omugulu ĩba wʼomũherũkĩ asyalũsĩbwa kubo, neryo oko mugulu oyo basyatsira akalyo.
16Sihali omundu oyukalandira ekitomeko kihya-kihya oko lukimba lwa kera, kusangwa ekitomeko kihya-kihya kikatula olukimba, ilwatulika kwilaba erĩmbere. 17Kutse sihali omundu oyũkũtũlĩra ebĩnyũ bihya-bihya omo bihu bikulu-kulu byʼebĩnyũ. Kite kitya ebihu byʼebĩnyũ bikatulika, nʼebĩnyũ bĩkũtĩka, nʼebihu byʼebĩnyũ bikatsanda; nĩkwa bakahĩra ebĩnyũ bihya-bihya omo bihu bihyabihya byʼebĩnyũ, nʼebyosĩ bikabya ndeke.
Mwali wa Yaĩro nʼomũkalĩ oyo watũla oko lĩkotĩ rya Yesu
(Mk 5.21-43; Lk 8.40-56)
18Nĩkwa omugulu Yesu abya akabũga nabo emyatsi eyĩ, omukulu wʼenyũmba yʼerĩhĩndanamo mwasa, mũnama embere sya Yesu erĩmũramya ati, Mwali wage amahola; nĩkwa wase ũmũhĩre kwʼebyala byawe, akandibyaho. 19Neryo Yesu mwahangana mwamukwama, nʼabiga ba Yesu mobagenda haguma naye.
20Neryo omũkalĩ muguma, oyo wabya akwĩre obũkonĩ bwʼerĩlũsya omusasi, oko myaka erĩkũmĩ nʼeyĩbĩrĩ, mwasa enyũma uku Yesu, mwatũla oko mũsĩke wʼolukimba luwe. 21Kusangwa ayibwira ati, Nanatatũla oko lukimba luwe lusa, ngandilama. 22Nĩkwa Yesu mwabinduka mwamulangira, mwamubwira ati, Ubondere, mwali wage! Erĩkĩrĩrya lyawe lyamabĩkũlamya. Neryo-neryo omũkalĩ oyo mwalamĩbwa.
23Neryo Yesu mwaya omo nyũmba yʼomukulu oyo, mwalangira ababũhĩ bʼamalenga nʼendeko ikabũya olukanda. 24Neryo Yesu mwabũga ati, Mũlũeho! Kusangwa omwana-muto siaholĩre, nĩkwa alito! Nabo mobamuseka. 25Nĩkwa endeko yabere yabihigirwa eyĩhya, Yesu mwingira aho mwana-muto abya, mwamuhamba oko byala, nʼomwanamuto oyo mwahangana. 26Nʼengulu yʼomwatsi oyo moyatsungana omo kihugo kyosĩ ekyo.
Yesu akalamaya esyondĩmatĩme ĩbĩrĩ
27Neryo Yesu abere abĩlũaho, esyondĩmatĩme ĩbĩrĩ mosyamukwama, ibakabirikira kutsibu bati, Utuganyire, uwe Mugala wa Dawĩdĩ! 28Neryo Yesu abere abingira omo nyũmba, esyondĩmatĩme esyo mosyamũhĩkako, neryo Yesu mwabũlyabo ati, Mwĩkĩrĩrye muti, nangatoka erikola ekĩ kwehĩ? Nabo mobamubwira bati, Ega Mukama. 29Neryo Yesu mwatũla oko meso wabo, ati, Likoleke ũkwʼĩnywe ngʼerĩkĩrĩrya lyenyũ! 30Neryo ameso wabo mwalĩbũkala. Kandi Yesu mwahanabo kutsibu ati, Simubwire mundu omwatsi oyũ. 31Nĩkwa mobahuluka, mobatsũnganĩa engulu ya Yesu omo kihugo kyosĩ ekyo.
Yesu akalamaya emũmũ
32Neryo omugulu bahuluka, lebaya mobaletera Yesu yʼemũmũ oyuli kwʼembĩnga. 33Neryo embĩnga eyo yabere yabihigirwa eyĩhya, emũmũ eyo moyabũga, nʼendeko mobasweka bati, Erĩtsũka na kera ekĩsosĩre ekĩ sikyekyatalolwako omo Ĩsraelĩ! 34Nĩkwa Abafarĩsayo mobabũga bati, Omũtabalĩ wʼesyombĩnga yukaleka iniahigira esyombĩnga syʼeyĩhya.
Yesu akaganyira abandu
35Kandi Yesu mwalendera omo mĩyĩ yosĩ nʼoko hĩyĩ hyosĩ, iniakakangĩrĩraya omo manyũmba wabo wʼerĩhĩndanamo, nʼerĩtũlaganĩa Engulu Yowene yʼobwami, nʼerĩlamya obuli mũsĩndo wʼendwala nʼobuli mũsĩndo wʼobũkonĩ. 36Neryo Yesu abere alangira esyondeko, mwakwĩrasyo bũlĩge, kusangwa mobagalwa nʼeriluha ngʼesyombũlĩ sitawite mũlĩsya. 37Neryo Yesu mwabwira abiga buwe ati, Ebyʼerigesa ni bingi, nĩkwa abangagesa ni bake. 38Neryo musabe Omukama wʼerigesa yo kutsibu atume abahĩngĩ omwʼigesa liwe.
Currently Selected:
Matayo 9: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.