Abaebrania 6

1Neryo tugende embere omo myatsi eyĩhĩkene, tũsĩganaye erĩkangĩrĩrya lyʼerĩtsũka lyʼengulu ya Kristo. Situsibe omo myatsi eyĩ yʼekibanza: eribinduka nʼerireka ebibi byʼemĩbĩrĩ yʼobusa, nʼerĩkĩrĩrya uku Nyamuhanga, 2nʼerĩkangĩrĩrya lyʼerĩbatĩsya mũsĩndo-mũsĩndo, nʼeryʼerĩhĩra kwʼebyala, nʼerĩlũbũka lyʼabaholĩ, nʼeritswera lya kera na kera. 3Netu twasyakola tutya, nʼerilaba embere, Nyamuhanga amalĩga.

4Kusangwa siritokekene erĩsũbya abandu bʼokwʼibinduka, ababiritoga kwenene. Kusangwa babya erĩmbere omo kyakakala kya Nyamuhanga. Babirirenga olũsũnzo lwʼelubula, kandi babirisangira oko Mũlĩmũ Abũyĩrĩre. 5Kandi babirirenga ebibuya byʼekĩnywa kya Nyamuhanga, kandi babirirenga obũtokĩ bwʼomugulu owakandisyasa. 6Neryo bamabitoga, siryetokekana kubo eriswabinduka nʼerireka ebibi kusangwa bakaswabamba Omugala wa Nyamuhanga oko musalaba, nʼeriswamuhemula. 7Nyamuhanga akatsumula ekitaka ekikabana embũla eyikawa kukyo engendo nyingi, ekitaka ekyo kĩkalasaya esyombuto syowene busana nʼabakalima kukyo. 8Nĩkwa ekitaka ekyo kyamalasya amahwa nʼamatolũ, sikiwite ndũndĩ. Kiri hakũhĩ nʼeritakirwa na Nyamuhanga, nʼendũlĩ yakyo nĩʼhĩsĩbwa.

9Nomo twangabũga tutya, abanze, nĩkwa busana nenyũ, tũnasĩ ndeke ngoko munawite emyatsi yowene eyikakwama erilama. 10Kusangwa Nyamuhanga sialikola ekitatunganene. Siangibirirwa omũbĩrĩ wenyũ, nʼolwanzo olo mwakangaya busana naye, imwabirikolera, kandi mukinakolera abandu ba Nyamuhanga. 11Kandi twanzĩre kutsibu obuli mundu gʼũkwʼĩnywe akangaye omũhwa wuwe erĩhĩka oko ndũlĩ, nʼerĩberererya amaha wuwe. 12Tuti Simubye nʼobũtowa nĩkwa mubye mũkagerereraya abĩkĩrĩraya nʼerĩyĩyĩnĩa nʼeriangirira ebyo Nyamuhanga alaga.

Erilaga lyʼekwenene lya Nyamuhanga

13Kusangwa omugulu Nyamuhanga alaga Abrahamũ, mwayĩlahĩryako, kusangwa sihabya ogundi mukulu ukwʼiye wʼerĩlahĩryako. 14Mwabũga ati, Kwenene nasyakutsumula, kandi kwenene nasyakanyĩrĩrya abana bawe. 15Abrahamũ mwalindirira nʼeritindaluha, neryo mwasunga ebyo Nyamuhanga alaga. 16Kusangwa abandu bakalahĩraya oko mundu mukulu kubo, kandi erĩlahĩrya likabuga obuhaka. 17Litya Nyamuhanga abya anzĩre erĩkangya abalagawa ngoko ate angabindula eriyisoha liwe, neryo mwalahĩrya kulyo. 18Neryo hali myatsi ĩbĩrĩ eyĩ eyitetoka eribinduka, kandi Nyamuhanga sialitoka eribiha muyo. Busana nʼemyatsi eyĩ, tukahanda emitima yo kutsibu, ĩtwe twabirisagira uku Nyamuhanga, tuhambe ndeke amaha awabĩrĩhĩrwa embere syetu. 19Tuwite amaha aya awakasĩkaya emitima yetu. Amaha aya ni wʼekwenene, asĩkĩre, kandi akingira enyũma wʼekĩsũkũlĩryo kyʼeHekalũ, 20aho Kristo abiriingira busana netu, iniabiribya mũhererĩ mukulu oko bahererĩ bosĩ, wa kera na kera omo muhanda wa Melkĩsedekĩ.

Currently Selected:

Abaebrania 6: KB80

Highlight

Copy

Compare