Abaebrania 7

Omuhanda wʼobũhererĩ bwa Melkĩsedekĩ

1Melkĩsedekĩ oyũ, abya mwami wʼeSalemũ, kandi abya omũhererĩ wa Nyamuhanga Owendata Kutsibu. Neryo omugulu Abrahamũ abya akasubula akalũa eyo ayĩtĩra abami, mwahĩndana na Melkĩsedekĩ naye mwamutsumula. 2Kandi Abrahamũ mwamugabira ekihande kiguma ekyʼomwʼĩkũmĩ kyʼebyosĩ. Erĩna lya Melkĩsedekĩ riti, Omwami Wʼeritunganene; kandi abya mwami wʼeSalemũ, erĩna liti, Omwami wʼobuholo.

3Melkĩsedekĩ siabya awite ĩse, isiawite nyĩnya isiawite abotata-kulu, isiawite omugulu abutawa kutse erihwa lyʼengebe. Nĩkwa ahangikawa ngʼomugala wa Nyamuhanga. Akabya mũhererĩ ebiro byosĩ.

4Nĩkwa mũlebaye ngoko mundu oyũ abya mukulu. Abrahamũ, tata-kulu, mwamuha ekihande kiguma kyʼomwʼĩkũmĩ kyʼebindu ebyo ahũnga. 5Kandi abana ba Lawĩ abali bahererĩ bakahanawa omo Migambo erĩmya ekihande kiguma kyʼomwʼĩkũmĩ oko bandu abali bʼekihanda kyabo, nomo bangabya bʼolubuto lwa Abrahamũ. 6Melkĩsedekĩ mwatabya wʼekihanda kyabo, nĩkwa mwĩmya ekihande kiguma kyʼomwʼĩkũmĩ uku Abrahamũ, kandi mwatsumula Omwenye ndagane ya Nyamuhanga. 7Nĩkwa butsira buhaka omundu muke akatsumulawa nʼomukulu. 8Abahererĩ ni bandu bakahola nĩkwa bakahamba ekihande kiguma kyʼomwʼĩkũmĩ. Nĩkwa kĩsakĩre ko Melkĩsedekĩ oyuliho, mwĩmya ekihande kiguma kyʼomwʼĩkũmĩ. 9Kandi omundu anganabũga ati, omugulu Abrahamũ aliha ekihande kiguma kyʼomwʼĩkũmĩ, ye Lawĩ (oyũkĩmayakyo) naye mwalihakyo. 10Kusangwa Lawĩ abya isialiabutwa, abya iniakine omo mubiri wa Abrahamũ omugulu Melkĩsedekĩ ahĩndana naye.

11Kumbe erĩhĩkana lyatokekana busana nʼomũbĩrĩ wʼobũhererĩ bwa Lawĩ, kusangwa Emigambo yahabawa nʼabandu ba Ĩsraelĩ haguma nʼobũhererĩ bwa Lawĩ, kumbe Sihangabya obwaga bwʼerĩhanganĩa ogundi mũhererĩ oko muhanda wa Melkĩsedekĩ oyute wʼekihanda kya Harũnĩ. 12Kusangwa omugulu obũhererĩ bukabindulawa, litolere eribindula Emigambo nibya. 13Kandi Omukama wetu, oyukahulawa omo myatsi eyĩ, abya wʼekindi kihanda kyʼAbayũda. Kandi sihali mundu wʼekihanda ekĩ oyo wabya akahera amahere oko kiherero. 14Kusangwa kyasĩbwe ndeke kwʼOmukama wetu ni wʼomo kihanda kya Yũda. Musa mwatahula abahererĩ omo kihanda ekĩ.

Ogundi mũhererĩ omo muhanda wa Melkĩsedekĩ

15Omwatsi akũmayĩre ndeke ngoko ogundi mũhererĩ abirihuluka, oyuli nga Melkĩsedekĩ. 16Mwatayirwa mo mũhererĩ omo bihano byʼabandu, nĩkwa mwabya mũhererĩ omo bũtokĩ bwʼengebe eyitendisyahwa. 17Kusangwa kĩkatũlawa busana naye kiti,

Uli mũhererĩ kera na kera

Ngʼomuhanda wʼobũhererĩ bwa Melkĩsedekĩ.

18Kusangwa ekihano kyʼerĩmbere kĩkalũsĩbawaho busana nʼobolo bwakyo, kandi sikiri nʼendũndĩ. 19Kusangwa Emigambo ya Musa moyĩtahĩkanĩa kindu. Nĩkwa lino amaha awalengĩre abiriretwa; kandi busana nago tukasegera hakũhĩ na Nyamuhanga.

20Kandi hali erĩlahĩrya lya Nyamuhanga. 21Kusangwa abandi bahererĩ mobahĩrwaho butsira erĩlahĩrya. Nĩkwa Yesu mwahĩrwa mo mũhererĩ nʼerĩlahĩrya, kusangwa Nyamuhanga mwamubwira ati,

Omwami Mukulu abĩrĩlahĩrya,

Isiendĩsyakũbyalyo ati,

Uli mũhererĩ kera na kera.

22Ekĩ kikatuma ndeke Yesu iniabya muwato wʼendagane eyĩlabĩre eyindi.

23Kandi abahererĩ ba kera babya bangi kusangwa babya bakahola isibetoka erikola omũbĩrĩ wʼebiro byosĩ. 24Nĩkwa Yesu kusangwa akakota syalĩũmbaya erikola omũbĩrĩ wuwe wʼobũhererĩ. 25Busana nʼekyo akatoka erĩlamya lino nʼebiro byosĩ abakahĩka uku Nyamuhanga busana naye. Kandi akakota busana nʼerisabirabo.

26Kusangwa Yesu yo Mũhererĩ Mukulu oko bahererĩ bosĩ, oyutolere. Kandi abũyĩrĩre, oyute ko mwatsi, oyute ko kibi, oyo wabirihigulwa oko bakola-nabi, nʼerĩhamĩbwa endata oko matũkũ. 27Yesu siali ngʼabandi bahererĩ bakulu oko bahererĩ bosĩ. Ibo bakahera amahere ebiro byosĩ busana nʼebibi byabo, nʼakandi busana nʼebibi byʼabandu. Kusangwa Kristo mwahera obuhere bo ngendo nguma nyisa omugulu ayiha. 28Kandi Emigambo ya Musa ĩkahĩra abandu abali bolo, ngʼabahererĩ bakulu oko bahererĩ bosĩ. Nĩkwa ekĩnywa ekyalahĩrĩbawa mokyahĩka enyũma wʼEmigambo, kĩkahĩra Omugala, oyo wayirawa ahĩkene, erĩhĩka na kera.

Currently Selected:

Abaebrania 7: KB80

Highlight

Copy

Compare