Abaebrania 5

1Obuli mũhererĩ mukulu oko bahererĩ bosĩ akayisogawa omo katĩkatĩ kʼabandu, akahĩrawa erikolera Nyamuhanga busana nʼabandu. Naye akaha olũsũnzo nʼamahere busana nʼebibi. 2Akatoka erikola lyolo-lyolo nʼabandu abatasĩ kindu nʼabakatala, kusangwa naye ni molo nibya. 3Neryo litolere iniahera amahere busana nʼebibi biwe ngoko akaherera ebibi byʼabandu. 4Kandi sihali omundu oyukayisoga erĩsĩkĩbwa ngʼomũhererĩ mukulu oko bahererĩ bosĩ, nĩkwa ni Nyamuhanga oyukabirikira omundu busana nʼomũbĩrĩ oyũ, ngoko abirikira Harũnĩ.

5Litya Kristo mwatayĩhamya eribya mũhererĩ mukulu oko bahererĩ bosĩ, nĩkwa Nyamuhanga mwamubwira ati,

Uli Mugala wage,

Namakubuta mũnabwĩre.

6Kandi mwabũga ehandi ati,

Uli mũhererĩ kera na kera

Ngʼomuhanda wʼobũhererĩ bwa Melkĩsedekĩ.

7Omugulu Yesu abya eno ngʼomundu, mwasaba nʼeriremba-lemba uku Nyamuhanga, omwʼilakirira nʼemĩsonĩa, ukwʼoyo abya nʼamaka wʼerĩmũlamya oko luholo, kandi Nyamuhanga mwamowa busana nʼobugenge buwe. 8Nomo anabya Mugala wa Nyamuhanga, mwiga erĩowa omo myatsi agalawamo. 9Kandi abere abiyirwa mʼoyũhĩkene, mwabya nzũko yʼerilama erya kera na kera busana nʼabosĩ abakamowa. 10Nyamuhanga mwamwahula mo mũhererĩ mukulu oko bahererĩ bosĩ omo muhanda wa Melkĩsedekĩ.

Ehe-e-e busana nʼabakatoga

11Busana nʼomwatsi oyũ tuwite bingi byʼerĩbũga, kandi bĩkalĩre erĩbamĩnyĩsyabyo, kusangwa mwabiribya nʼobũtowa. 12Kusangwa manga-hano ĩnywe mwangabere abakangĩrĩrya, kwesĩ mwangaswakangĩrĩrĩbwa emyatsi yʼerĩmbere yʼebĩnywa bya Nyamuhanga. Mukinatolere amabere butsira akalyo. 13Kusangwa oyukalya amabere akine mwana, isialiabegera ebĩnywa byʼeritunganene. 14Nĩkwa akalyo ni kʼabandu bakulu, ababirikola nʼerĩgĩsĩbwa omo myatsi mingi, ibabiritoka erisombola ekibuya nʼekibi.

Currently Selected:

Abaebrania 5: KB80

Highlight

Copy

Compare